കുറ്റിപ്പുറത്ത് കുടിവെള്ള പ്രതിസന്ധി രൂക്ഷം; പ്രതിഷേധവുമായി ജനപ്രതിനിധികളും സി.പി.ഐ.എം നേതാക്കളും

കുറ്റിപ്പുറം: കുറ്റിപ്പുറം പഞ്ചായത്തിൽ നിലനിൽക്കുന്ന രൂക്ഷമായ കുടിവെള്ള പ്രശ്നത്തിന് ശാശ്വതമായ പരിഹാരം കാണണമെന്നാവശ്യപ്പെട്ട് ജനപ്രതിനിധികളും സി.പി.ഐ.എം നേതാക്കളും പ്രതിഷേധവുമായി രംഗത്ത്. കുടിവെള്ളക്ഷാമം രൂക്ഷമായതോടെ നൂറുകണക്കിന് കുടുംബങ്ങളാണ് ദുരിതത്തിലായിരിക്കുന്നത്.

പഞ്ചായത്തിലെ കുടിവെള്ള ക്ഷാമത്തിന് അടിയന്തര പരിഹാരം കാണണമെന്നാവശ്യപ്പെട്ട് ഗ്രാമപഞ്ചായത്ത് അംഗങ്ങളായ കോമള ടീച്ചർ, കെ.എം. സരിത, ജയചിത്ര, റസീന എന്നിവരുടെ നേതൃത്വത്തിൽ പഞ്ചായത്ത് അസിസ്റ്റന്റ് സെക്രട്ടറിയെ ഉപരോധിച്ചു. വിഷയത്തിൽ ഉടൻ നടപടിയെടുക്കാമെന്ന ഉറപ്പിനെ തുടർന്നാണ് ഉപരോധം അവസാനിപ്പിച്ചത്.

സി.പി.ഐ.എം നേതാക്കളും പഞ്ചായത്ത് അസിസ്റ്റന്റ് സെക്രട്ടറിയെ കണ്ട് പ്രശ്നത്തിന് ഉടൻ പരിഹാരം കാണണമെന്ന് ആവശ്യപ്പെട്ടു. ഏരിയാ കമ്മിറ്റി അംഗം സി.കെ. ജയകുമാർ, നടുവട്ടം ലോക്കൽ കമ്മിറ്റി സെക്രട്ടറി വി.കെ. രാജേന്ദ്രൻ, ലോക്കൽ സെന്റർ അംഗം കെ.പി. ഗോപാലൻ എന്നിവരാണ് അസിസ്റ്റന്റ് സെക്രട്ടറിയെ സമീപിച്ചത്

അടിയന്തരമായി പ്രശ്നം പരിഹരിക്കാത്ത പക്ഷം കുറ്റിപ്പുറം ഗ്രാമപഞ്ചായത്ത് ഓഫീസ് ഉപരോധിക്കുന്നതുൾപ്പെടെയുള്ള ശക്തമായ സമരപരിപാടികൾക്ക് നേതൃത്വം നൽകുമെന്ന് നേതാക്കൾ അറിയിച്ചു.