ഹരിയാനയിൽ 23 കാരിയായ കോൺഗ്രസ് പ്രവർത്തകയെ മരിച്ച നിലയിൽ കണ്ടെത്തിയ സംഭവം; രാഷ്ട്രീയ വിവാദം ചൂടുപിടിക്കുന്നു

ഹരിയാന: 23 കാരിയായ കോൺഗ്രസ് പ്രവർത്തക ഹിമാനി നർവാളിന്റെ മൃതദേഹം റോഹ്തക്-ഡൽഹി ഹൈവേയിലെ സംപ്ല ബസ് സ്റ്റാൻഡിന് സമീപം കണ്ടെത്തിയതിനെ തുടർന്ന് വലിയ രാഷ്ട്രീയ വിവാദം ഉടലെടുത്തിരിക്കുകയാണ് . സംസ്ഥാനത്തെ മുനിസിപ്പൽ തിരഞ്ഞെടുപ്പിന് തൊട്ടുപിന്നാലെയാണ് സംഭവം

സോനെപത്തിലെ കത്തൂറ ഗ്രാമത്തിൽ നിന്നുള്ള നർവാൾ റോഹ്തക്കിലെ യൂത്ത് കോൺഗ്രസിൽ സജീവമായിരുന്നു. മുൻ മുഖ്യമന്ത്രി ഭൂപീന്ദർ സിംഗ് ഹൂഡയുമായി അടുത്ത ബന്ധമുള്ള പ്രദേശമാണിത് . റോഹ്തക്കിൽ എംപി ദീപേന്ദർ ഹൂഡയ്‌ക്കൊപ്പം വിവിധ രാഷ്ട്രീയ പരിപാടികളിൽ പങ്കെടുത്ത നർവാൾ കോൺഗ്രസ് റാലികളിലും സാമൂഹിക ഒത്തുചേരലുകളിലും ഹരിയാൻവി നാടോടി കലാകാരന്മാർക്കൊപ്പം പ്രകടനങ്ങൾ നടത്തി ശ്രദ്ധേയയായിരുന്നു.

വെള്ളിയാഴ്ച സംപ്ല ബസ് സ്റ്റാൻഡിന് സമീപമുള്ള വലിയ നീല സ്യൂട്ട്കേസിലാണ് ഇവരുടെ മൃതദേഹം കണ്ടെത്തിയത്. കഴുത്തിൽ ഷാൾ ചുറ്റിയിരുന്നു. കൈകളിൽ മൈലാഞ്ചിയും ഉണ്ടായിരുന്നു.

മുൻ യൂത്ത് കോൺഗ്രസ് അധ്യക്ഷൻ ശ്രീനിവാസ് ബിവി അവരുടെ സംഭാവനകളെ അനുസ്മരിച്ചു . താൻ യൂത്ത് കോൺഗ്രസ് അധ്യക്ഷൻ ആയിരുന്ന സമയത്ത് റോഹ്തക് റൂറലിന്റെ ജില്ലാ വൈസ് പ്രസിഡന്റായി അവർ സേവനമനുഷ്ഠിച്ചിരുന്നതായി അദ്ദേഹം പറഞ്ഞു.

ഭാരത് ജോഡോ യാത്രയിൽ ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയെ നർവാൾ അനുഗമിച്ചിരുന്നു. ഹരിയാന നിയമസഭാ തിരഞ്ഞെടുപ്പ് പ്രചാരണ വേളയിൽ ഭൂപീന്ദർ ഹൂഡയ്‌ക്കും ദീപേന്ദർ ഹൂഡയ്‌ക്കുമൊപ്പം അവർ സജീവമായി പങ്കെടുത്തിരുന്നതായി കോൺഗ്രസ് എംഎൽഎ ഭാരത് ഭൂഷൺ ബത്ര എടുത്തുപറഞ്ഞു.

സംസ്ഥാനത്തെ ക്രമസമാധാന നിലയെക്കുറിച്ച് ഈ ദാരുണമായ സംഭവം ഗുരുതരമായ ആശങ്കകൾ ഉയർത്തിയിട്ടുണ്ട്. അവരുടെ മരണത്തെക്കുറിച്ചുള്ള സാഹചര്യങ്ങൾ കണ്ടെത്താൻ അധികാരികൾ വിശദമായ അന്വേഷണം നടത്തിവരികയാണ് .