വട്ടംകുളം ഗ്രാമപഞ്ചായത്തിൽ അംഗനവാടി കലോത്സവം: കുരുന്നുകളുടെ കലാവിരുന്ന്

എടപ്പാൾ: വട്ടംകുളം ഗ്രാമപഞ്ചായത്തിൽ ആദ്യമായ് സംഘടിപ്പിച്ച അംഗനവാടി കലോത്സവം പൂമ്പാറ്റ കുരുന്നുകളുടെ ആട്ടവും പാട്ടുമായി മനോഹരമായ ദൃശ്യാനുഭവമായി . 

കുരുന്നുകളുടെ സർഗവാസനകൾ പീലി വിടർത്തിയ കലോത്സവം ആയിരത്തിലധികം പേരുടെ സാന്നിധ്യം കൊണ്ട് ഉജ്ജ്വലമായി.

പരിപാടി വട്ടംകുളം ഗ്രാമപഞ്ചായത്ത് പ്രസിഡന്റ് എം. എ. നജീബ് ഉദ്ഘാടനം നിർവഹിച്ചു. വൈസ് പ്രസിഡണ്ട് ഫസീല സജീബ അധ്യക്ഷയായിരുന്നു.

ചടങ്ങിൽ അസൈനാർ നെല്ലിശ്ശേരി, എൻ. ഷീജ, കഴുങ്ങിൽ മജീദ്, ഇബ്രാഹിം മൂതൂർ, കെ. പി. റാബിയ, അക്ബർ പനച്ചിക്കൽ, ദിലീപ് എരുവപ്ര, ഇ. എസ്. സുകുമാരൻ, ഇ. ബിന്ദു കെ, നീന, കെ. സതീഷ് എന്നിവർ പങ്കെടുത്തു.

നൃത്തചുവടുകളിലും ഗാനാലാപനങ്ങളിലും കുരുന്നുകൾ തങ്ങളിലെ മികവ് തെളിയിച്ചപ്പോൾ, അത് കാഴ്ചക്കാർക്ക് മനോഹരമായ വിരുന്നായി . ബാല മനസ്സുകളുടെ കലാവൈഭവങ്ങളുടെ ആഘോഷമായ ഈ പരിപാടി കുട്ടികളിലെ കഴുവുകൾ കണ്ടെത്താനും പരിപോഷിപ്പിക്കാനും ഉള്ള മികച്ച വേദിയായി.