'ഉളുപ്പില്ലേ നിങ്ങള്‍ക്ക്'; മഹാകുംഭമേളയില്‍ പങ്കെടുത്തുവെന്ന രീതിയില്‍ വ്യാജ ചിത്രം പ്രചരിപ്പിച്ചവര്‍ക്കെതിരെ പരാതി നല്‍കി പ്രകാശ് രാജ്

 ഉത്തർപ്രദേശ്:  പ്രയാഗ്‌രാജിലെ മഹാ കുംഭമേളയില്‍ പങ്കെടുക്കുന്നുവെന്ന തരത്തില്‍ സോഷ്യല്‍ മീഡിയയില്‍ വ്യാജ ചിത്രം പ്രചരിപ്പിച്ചവർക്കെതിരെ നടൻ പ്രകാശ് രാജ് പരാതി നല്‍കി.

അദ്ദേഹത്തിന്റേതെന്ന തരത്തില്‍ ഒരു എഐ ജനറേറ്റഡ് ചിത്രം വ്യാപകമായി സോഷ്യല്‍ മീഡിയയില്‍ പ്രചരിക്കുന്നുണ്ട്. ഈ ചിത്രം അടക്കം ഉള്‍പ്പെടുത്തി എക്സിലാണ് പ്രകാശ് രാജ് ഇപ്പോള്‍ പ്രതികരണവുമായി രംഗത്ത് വന്നിരിക്കുന്നത്.

”എല്ലാ പാപങ്ങളും ഇതോടെ തീരും” എന്ന തലക്കെട്ടില്‍ ഫേസ്ബുക്കിലാണ് ഈ ചിത്രം ആദ്യം പ്രത്യക്ഷപ്പെട്ടത്. ഈ ചിത്രം പ്രകാശ് രാജിന്റെയും ശ്രദ്ധയില്‍പ്പെട്ടതോടെയാണ് അദ്ദേഹം പ്രതികരണവുമായി രംഗത്ത് വന്നത്.

ചിലർ ഇത്തരത്തില്‍ വ്യാജ വിവരങ്ങള്‍ പങ്കുവെക്കുന്നത് അങ്ങേയറ്റം നാണക്കേടാണെന്നും ഈ എഐ ജനറേറ്റഡ് ചിത്രം സോഷ്യല്‍ മീഡിയയില്‍ പങ്കുവെച്ചവർക്കെതിരെ പരാതി കൊടുത്തിട്ടുണ്ടെന്നും അദ്ദേഹം എക്സ് പോസ്റ്റില്‍ വ്യക്തമാക്കിയിട്ടുണ്ട്.