നഗരത്തിനൊപ്പം അവരും സ്മാർട്ട് ആകട്ടെ, തിരുവനന്തപുരം നഗരസഭയ്ക്ക് വയോസേവന പുരസ്കാരം: അഭിമാനകരമായ നേട്ടമെന്ന് മേയര്‍ ആര്യ രാജേന്ദ്രൻ,

തിരുവനന്തപുരം: വയോജനങ്ങള്‍ക്ക് വേണ്ടി നടപ്പാക്കിയ ക്ഷേമ പ്രവർത്തനങ്ങള്‍ക്ക് സംസ്ഥാന സർക്കാരിന്‍റെ വയോസേവന പുരസ്കാരം 2024 തിരുവനന്തപുരം നഗരസഭയ്ക്ക് ലഭിച്ചു.

വയോജനങ്ങളുടെ ക്ഷേമം സമൂഹത്തിന്റെ കൂടെ ഉത്തരവാദിത്തമാണെന്നും നാടും നഗരവും വികസനത്തിന്റെ പാതയില്‍ കുതിക്കുമ്പോള്‍ നമുക്കൊപ്പം ചേർത്ത് നിർത്തേണ്ടവർ തന്നെയാണ് വയോജനങ്ങളെന്നും മേയർ ആര്യ രാജേന്ദ്രൻ പറഞ്ഞു. 

ഒട്ടേറെ ക്ഷേമ പദ്ധതികള്‍ വയോജനങ്ങള്‍ക്കായി തിരുവനന്തപുരം നഗരസഭ ആസൂത്രണം ചെയ്ത് നടപ്പാക്കിയെന്നും ആ പ്രവർത്തനങ്ങള്‍ക്കാകെ ലഭിച്ച അംഗീകാരമാണ് ഈ നേട്ടമെന്നും ആര്യ രാജേന്ദ്രൻ പ്രതികരിച്ചു. 

അഭിമാനകരമായ നേട്ടമാണിത്. നഗരത്തിലെ മുതിർന്ന പൗരന്മാരുടെ ജീവിത സാഹചര്യങ്ങള്‍ മെച്ചപ്പെടുത്തുവാൻ നടത്തുന്ന പ്രവർത്തനങ്ങള്‍ ഫലപ്രദമാകുന്നുണ്ട് എന്നാണ് ഇത് തെളിയിക്കുന്നതെന്ന് മേയർ അഭിപ്രായപ്പെട്ടു. 

വയോജനോത്സവം പോലുള്ള പുതിയ പദ്ധതികള്‍ കൂടി നടപ്പിലാക്കി വയോജനങ്ങള്‍ക്ക് മികച്ച ജീവിതാനുഭവങ്ങളും ഉയർന്ന ജീവിത നിലവാരവും ഉറപ്പാക്കുന്ന തരത്തിലുള്ള പ്രവർത്തനങ്ങള്‍ നടപ്പിലാക്കുമെന്ന് ആര്യ രാജേന്ദ്രൻ പറഞ്ഞു. 

വയോജന സൗഹൃദ നഗരമെന്ന ഖ്യാതിയിലേക്ക് ഒരുമിച്ചുയരാം. നഗരത്തിനൊപ്പം അവരും സ്മാർട്ട് ആകട്ടെയെന്നും മേയർ പ്രതികരിച്ചു.