തൊടുപുഴ മൂലമറ്റം തുമ്പിച്ചി മലയിൽ വൻ തീപിടുത്തം.

ഇടുക്കി : മൂലമറ്റം തുമ്പിച്ചി മലയിലുണ്ടായ തീപിടുത്തത്തിൽ ഏക്കറുകണക്കിന് സ്ഥലം കത്തി നശിച്ചു. ചൊവ്വാഴ്ച 3 ഓടെ തോളത്തില്‍ മാണിക്ക്യന്റെ പുരയിടത്തിലാണ് തീ പിടുത്തം ഉണ്ടായത്.

പ്രദേശവാസികള്‍ ചേര്‍ന്ന് തീ തല്ലിക്കെടുത്താന്‍ ശ്രമിച്ചെങ്കിലും തീയണയ്ക്കാന്‍ സാധിച്ചില്ല. തുടര്‍ന്ന് മൂലമറ്റം ഫയര്‍ഫോഴ്‌സ് എത്തി തീയണയ്ക്കുകയായിരുന്നു.

തീ പിടിക്കാനുണ്ടായ കാരണം വ്യക്തമല്ലെന്ന് ഫയര്‍ഫോഴ്‌സ് അധികൃതര്‍ പറഞ്ഞു.വേനൽ കടുത്ത സാഹചര്യത്തിൽ ജനങ്ങൾ അതീവ ശ്രദ്ധ പുലർത്തണമെന്നും ചപ്പു ചവറുകൾ കൂട്ടിയിട്ട് കത്തിക്കുന്ന പ്രവണത അവസാനിപ്പിക്കണമെന്നും അധികൃതർ പറഞ്ഞു.