'ഹോട്ടല്‍ അടച്ചു പൂട്ടേണ്ടി വന്നാലും ദലിതര്‍ക്കു ഭക്ഷണം വിളമ്പാനാകില്ല'; ദലിത് യുവാക്കളെ ഇറക്കിവിട്ട ഹോട്ടല്‍ ഉടമയും ബന്ധുവും അറസ്റ്റില്‍,,

 ബെംഗളൂരു: ദലിത് യുവാക്കള്‍ക്കു ഭക്ഷണം നല്‍കാൻ വിസമ്മതിച്ചതിന് ഹോട്ടല്‍ ഉടമയെയുള്‍പ്പെടെ 2 പേരെ അറസ്റ്റ് ചെയ്ത് പൊലീസ്.,

കുരുഗോഡുവിലെ ഗുട്ടേഗനുർ ഗ്രാമത്തില്‍ ഹോട്ടല്‍ നടത്തുന്ന നാഗേവാണി, ഇയാളുടെ ബന്ധു വീരഭദ്രപ്പ എന്നിവരെയാണ് പൊലീസ് അറസ്റ്റ് ചെയ്തത്. ഹോട്ടല്‍ അടച്ചു പൂട്ടേണ്ടി വന്നാലും ദലിതർക്കു ഭക്ഷണം വിളമ്പാനാകില്ലെന്നും പറഞ്ഞ് ഇരുവരും ഒരു സംഘം യുവാക്കളെ ഹോട്ടലില്‍ നിന്നും ഇറക്കി വിട്ടിരുന്നു.

സംഭവത്തിന്റെ വിഡിയോ സമൂഹമാധ്യമങ്ങളില്‍ പ്രചരിച്ചിരുന്നു. തുടർന്ന് ദലിത് സംഘടനകള്‍ പ്രതിഷേധവുമായി രംഗത്തെത്തി. വിവേചനത്തിനു ഇരയായ മഹേഷ് എന്ന യുവാവാണ് പൊലീസില്‍ പരാതി നല്‍കിയത്.

ഹോട്ടലില്‍ എത്തുന്ന ദലിതരെ ഇവർ ബലം പ്രയോഗിച്ചു ഇറക്കി വിട്ടിരുന്നതായും ഇതിനു ശേഷം ഹോട്ടലും പരിസരവും വൃത്തിയാക്കിയിരുന്നതായും പരാതിയില്‍ പറയുന്നു. സംഭവത്തിന്റെ പശ്ചാത്തലത്തില്‍ തഹസില്‍ദാർ രാഘവേന്ദ്രയുടെ നേതൃത്വത്തില്‍ ഗ്രാമത്തില്‍ സമാധാന യോഗം വിളിച്ചു.

ജാതിവിവേചനം നടത്തിയതായി ശ്രദ്ധയില്‍പെട്ടാല്‍ കർശന നടപടി സ്വീകരിക്കുമെന്നു കട ഉടമകള്‍ക്കു ഉള്‍പ്പെടെ നിർദേശം നല്‍കിയതായി തഹസില്‍ദാർ അറിയിച്ചു.