കളമശേരി: സ്ഫോടനത്തിലെ പ്രതി തമ്മനം സ്വദേശി ഡൊമിനിക് മാര്ട്ടിന്റെ വീട്ടില് പൊലീസ് പരിശോധന തുടരുന്നു. തമ്മനത്ത് കുടുംബത്തോടൊപ്പം വാടകയ്ക്ക് താമസിക്കുന്ന വീട്ടിലാണ് പരിശോധന നടക്കുന്നത്. മാര്ട്ടിന് പുലര്ച്ചെ അഞ്ച് മണിക്കാണ് വീട്ടില് നിന്ന് പോയതെന്നും എങ്ങോട്ടാണ് പോകുന്നതെന്ന് പറഞ്ഞിരുന്നില്ലെന്ന് ഭാര്യ മിനി കളമശേരി പൊലീസിനെ അറിയിച്ചു.
.jpg)
സ്ഫോടനം നടത്തിയത് ഡൊമിനിക് മാര്ട്ടിനാണെന്ന് സ്ഥിരീകരിച്ചതിന് പിന്നാലെ ഇയാല് ഉപയോഗിച്ചിരുന്ന വാഹനം സ്കൂട്ടറാണെന്ന് പൊലീസ് സ്ഥിരീകരിക്കുകയായിരുന്നു. മുൻപ് അവിടെ നിന്നും പോയ നീല കാറിനെക്കുറിച്ചു പോലീസ് അന്വേഷണം ഊർജിതമാക്കിയിരുന്നു. സിസിടിവി ദൃശ്യങ്ങളിലെ കാര് മാര്ട്ടിന്റേത് അല്ലെന്നും സ്ഥിരീകരിച്ചു. കണ്വെന്ഷന് സെന്ററില് ഐഇഡി സ്ഥാപിച്ചശേഷം സ്റ്റേജിന്റെ പിറകുവശത്തുപോയശേഷമാണ് റിമോട്ട് ഉപയോഗിച്ച് ഇയാള് സ്ഫോടനം നടത്തിയത്.
സ്ഫോടനം നടത്തുന്നതിന്റെ ദൃശ്യങ്ങള് മൊബൈലില് പകര്ത്തുകയും ചെയ്തു. സ്ഫോടനം നടത്തിയതിന് പിന്നാലെ സ്കൂട്ടറില് ഹൈവേയിലെത്തി തൃശ്ശൂര് ഭാഗത്തേക്ക് ഇയാള് പോവുകയായിരുന്നു. തുടര്ന്ന് കൊടകര പൊലീസ് സ്റ്റേഷനില് സ്കൂട്ടറിലെത്തി താനാണ് സ്ഫോടനം നടത്തിയതെന്ന് വെളിപ്പെടുത്തുകയും ദൃശ്യങ്ങള് കാണിക്കുകയുമായിരുന്നു. തൃശ്ശൂരിലേക്ക് പോകുന്നതിന് മുമ്പായാണ് ഇയാല് ഫേയ്സ്ബുക്കിലൂടെ വീഡിയോ പുറത്തുവിട്ടത്.
സ്ഫോടനത്തില് മരിച്ച സ്ത്രീയുമായി മാര്ട്ടിന് എന്തെങ്കിലും തരത്തില് പ്രശ്നങ്ങളുണ്ടായിരുന്നോ എന്നും പൊലീസ് അന്വേഷിക്കുന്നുണ്ട്. കളമശേരിയില് യഹോവ സാക്ഷികളുടെ പ്രാര്ത്ഥനായോഗത്തിലാണ് ഇന്ന് രാവിലെ 9.30യോടെ സ്ഫോടനം നടന്നത്. സംഭവത്തില് ഒരാള് കൊല്ലപ്പെടുകയും 52 പേര്ക്ക് പരിക്കേല്ക്കുകയും ചെയ്തിട്ടുണ്ട്. 90 ശതമാനത്തിലേറെ പൊള്ളലേറ്റ 12 വയസുള്ള കുട്ടി ഗുരുതരാവസ്ഥയില് ആശുപത്രിയിലാണ്.
അതേസമയം, സ്ഫോടക വസ്തു ഉണ്ടാക്കാന് ആരെങ്കിലും സഹായം നല്കിയിട്ടുണ്ടോയെന്നത് ഉള്പ്പെടെയുള്ള മറ്റുകാര്യങ്ങളെക്കുറിച്ചും കൂടുതല് അന്വേഷണം നടത്തേണ്ടതുണ്ടെന്നാണ് പൊലീസ് പറയുന്നത്. സ്ഫോടനം നടത്തിയത് ഡൊമിനിക് തന്നെയാണ് സ്ഥിരീകരിച്ച പൊലീസ് ഇയാളുടെ ഫോണില് നിന്ന് നിര്ണായക തെളിവുകളും കണ്ടെടുത്തിട്ടുണ്ട്. റിമോട്ട് ഉപയോഗിച്ച് ബോംബ് ട്രിഗര് ചെയ്യുന്ന ദൃശ്യങ്ങള് പൊലീസിന് മൊബൈലില് നിന്നും ലഭിച്ചിട്ടുണ്ട്.
ഇന്റര്നെറ്റ് വഴിയാണ് സ്ഫോടക വസ്തുവുണ്ടാക്കാന് പരിശീലനം നേടിയതെന്നാണ് ഡൊമിനിക്കിന്റെ മൊഴി. അതേസമയം, മാര്ട്ടിന് ബോംബ് ഉണ്ടാക്കാന് പഠിച്ചത് ആറ് മാസം കൊണ്ടാണെന്ന് പൊലീസ് പറഞ്ഞു. ഇന്റര്നെറ്റിലൂടെയാണ് ബോംബുണ്ടാക്കാന് പഠിച്ചത്. പ്രാര്ത്ഥനായോഗ സ്ഥലത്ത് പെട്രോള് നിറച്ച കുപ്പിക്കൊപ്പമാണ് ഇയാള് ബോംബ് വെച്ചത്. അതുപോലെ തന്നെ സ്ഫോടക വസ്തു വാങ്ങിയ കടകളെക്കുറിച്ചും വിവരം ലഭിച്ചതായി പൊലീസ് വ്യക്തമാക്കി.
സ്ഫോടനം നടത്തിയത് താനാണെന്ന അവകാശവാദവുമായി മാര്ട്ടിന് ഉച്ചയോടെ തൃശൂര് കൊടകര പൊലീസ് സ്റ്റേഷനില് കീഴടങ്ങിയിരുന്നു. കീഴടങ്ങുന്നതിന് മുന്പ് ഡൊമിനിക് മാര്ട്ടിന് ഫേസ്ബുക്കില് കുറ്റസമ്മതമൊഴി അടങ്ങുന്ന വീഡിയോയും പോസ്റ്റ് ചെയ്തിരുന്നു. വിശദമായ ചോദ്യം ചെയ്യലിനൊടുവിലാണ് ഡൊമിനിക് മാര്ട്ടിന് തന്നെയാണ് സ്ഫോടനത്തിന് പിന്നിലെ പ്രതിയെന്ന് പൊലീസ് സ്ഥിരീകരിച്ചത്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.