എട്ടുമാസം പ്രായമുള്ള കുഞ്ഞിന് ശ്വാസതടസ്സം; തൊണ്ടയില്‍ കണ്ടെത്തിയത് 'കൊമ്പൻചെല്ലി"

കണ്ണൂര്‍; ശ്വാസതടസ്സം നേരിട്ട് ആശുപത്രിയിലെത്തിയ പിഞ്ചുകുഞ്ഞിന്റെ തൊണ്ടയില്‍ കൊമ്പൻചെല്ലി വണ്ട്. കഴിഞ്ഞ ദിവസം കണ്ണൂര്‍ തലശ്ശേരി ഇന്ദിരാ ഗാന്ധി സഹകരണ ആശുപത്രിയിലാണ് സംഭവം..

രാത്രിയില്‍ ശ്വാസതടസ്സവുമായി  വന്ന എട്ട് മാസം പ്രായമുള്ള കുഞ്ഞിന്റെ തൊണ്ടയിലാണ് കൊമ്പൻചെല്ലി വണ്ടിനെ കണ്ടെത്തിയത്.

ആശുപത്രി അത്യാഹിത വിഭാഗത്തിലെത്തിയ കുഞ്ഞിന് നല്‍കിയ പ്രാഥമിക ചികിത്സയില്‍ മാറ്റമൊന്നും വരാത്തതിനാല്‍ എൻഡോസ്‌കോപ്പി ചെയ്യുകയായിരുന്നു. അപ്പോഴാണ് കൊമ്പൻചെല്ലി വണ്ട് തൊണ്ടയില്‍ കുടുങ്ങിയതായി കണ്ടെത്തിയത്.

തുടര്‍ന്ന് അപ്പോള്‍ തന്നെ ആശുപത്രിയിലെ എമര്‍ജൻസി വിഭാഗവും കുട്ടികളുടെ വിഭാഗവും ഇഎൻടി വിഭാഗവും സംയുക്തമായി ഇടപെട്ട് കുഞ്ഞിന്റെ തൊണ്ടയില്‍ നിന്നും വണ്ടിനെ പുറത്തെടുത്ത് അത്ഭുതകരമായി രക്ഷപ്പെടുത്തുകയായിരുന്നു.

അതേസമയം കുഞ്ഞ് ആശുപത്രിയില്‍ സുഖംപ്രാപിച്ചു വരികയാണ്. ചികിത്സ വൈകിയിരുന്നെങ്കില്‍ കുഞ്ഞിന്റെ നില ഗുരുതരമാകുമായിരുന്നുവെന്ന് ഡോക്ടര്‍മാര്‍ പറഞ്ഞു.