ആലപ്പുഴ ചേർത്തലയിൽ കെഎസ്ആർടിസി ബസും സ്വകാര്യ ബസും കൂട്ടിയിടിച്ച് വൻ അപകടം '20 യാത്രക്കാർക്ക് പരുക്ക്.

ആലപ്പുഴ: ചേർത്തല വെള്ളിയാകുളത്ത് കെഎസ്ആർടിസി ബസും സ്വകാര്യ ബസും കൂട്ടിയിടിച്ച് 20 യാത്രക്കാർക്ക് പരുക്ക്. വൈകിട്ട് ആറരയോടെയായിരുന്നു അപകടം. സ്വകാര്യ ബസ് ഡ്രൈവറുടെ പരുക്ക് ഗുരുതരമാണ്.

ഇടിയുടെ ആഘാതത്തിൽ ഇരു ബസുകളുടെയും മുൻഭാഗം പൂർണമായും തകർന്നു. ചേർത്തലയിൽനിന്നും കോട്ടയത്തേക്ക് പോവുകയായിരുന്ന കെഎസ്ആർടിസി ബസും, കോട്ടയത്തുനിന്ന് ചേർത്തലയിലേക്ക് വരികയായിരുന്ന സ്വകാര്യ ബസും തമ്മിലാണ് കൂട്ടിയിടിച്ചത്. സ്വകാര്യ ബസ് സമീപത്തെ മതിലിൽ ഇടിച്ചു നിന്നതിനാൽ വലിയ ദുരന്തം ഒഴിവായി.

പരുക്കേറ്റവരെ ചേർത്തല - കോട്ടയം മെഡിക്കൽ കോളജ്, ചേർത്തല താലൂക്ക് ആശുപത്രി, സ്വകാര്യ  ആശുപത്രി എന്നിവിടങ്ങളിലേക്ക് മാറ്റി. ചേർത്തലയിൽനിന്ന് പൊലീസും അഗ്നിരക്ഷാസേനയും സ്ഥലത്തെത്തിയാണു വാഹനങ്ങൾ മാറ്റിയത്. മണിക്കൂറുകളോളം ഗതാഗതം തടസ്സപ്പെട്ടു.