വിജയത്തിന് കാരണഭൂതനായില്ല: മുഖ്യമന്ത്രി പ്രസംഗിച്ച ബൂത്തുകളില്‍ ചാണ്ടി ഉമ്മന് വൻ ലീഡ്, ജെയ്ക്കിന് പാര്‍ട്ടിവോട്ടും കിട്ടിയില്ല,

കോട്ടയം: പുതുപ്പള്ളിയില്‍ എല്‍ ഡി എഫ് സ്ഥാനാര്‍ത്ഥിയുടെ വിജയം ഉറപ്പിക്കാനായി മുഖ്യമന്ത്രി പിണറായി വിജയൻ പ്രസംഗിച്ച ബൂത്തുകളില്‍ യു ഡി എഫ് സ്ഥാനാര്‍ത്ഥി ചാണ്ടി ഉമ്മന് വൻ ലീഡ്.

മുന്നൂറില്‍പ്പരം വോട്ടുകളുടെ ലീഡാണ് ഈ ബൂത്തുകളില്‍ യു ഡി എഫ് നേടിയതെന്നാണ് റിപ്പോര്‍ട്ടുകള്‍. സി പി എമ്മിന്റെ ശക്തികേന്ദ്രങ്ങളില്‍ പാര്‍ട്ടി വോട്ടുകള്‍ പോലും ജെയ്‌കിന് ലഭിച്ചിട്ടില്ലെന്നുവേണം കരുതാൻ. എല്‍ ഡി എഫ് ഏറെ പ്രതീക്ഷ പുലര്‍ത്തിയിരുന്ന മണര്‍കാട് പഞ്ചായത്തില്‍ ലീഡ് ഉയര്‍ത്താൻ ജെയ്ക്കിനായില്ല. ഈ പഞ്ചായത്തിലെ മുഴുവൻ ബൂത്തുകളിലും ചാണ്ടി ഉമ്മനാണ് ലീഡ്.

പോസ്റ്റല്‍ വോട്ടുകള്‍ എണ്ണിത്തുടങ്ങിയപ്പോള്‍ തുടങ്ങിയ ലീഡ് ചാണ്ടി ഉമ്മൻ അതിവേഗം ഉയര്‍ത്തുകയായിരുന്നു. ഒരിക്കല്‍പ്പോലും ചാണ്ടി ഉമ്മന്റെ ലീഡിന് അടുത്തെത്താൻ പോലും ജെയ്ക്കിനായില്ല. ബി ജെ പി ചിത്രത്തിലേ ഇല്ലാത്ത സ്ഥിതിയാണ്. കഴിഞ്ഞ തവണത്തേക്കാൻ വോട്ടുനില കുറഞ്ഞാല്‍ വോട്ട് യു ഡി എഫിന് വിറ്റുവെന്ന ആരോപണം ബി ജെ പി കേള്‍ക്കേണ്ടി വരും. തിരഞ്ഞെടുപ്പ് കഴിഞ്ഞപ്പോള്‍ തന്നെ ഇത്തരത്തിലുള്ള ആരോപണങ്ങളുമായി എല്‍ ഡി എഫ് നേതാക്കള്‍ രംഗത്തെത്തിയിരുന്നു.

 അന്തരിച്ച മുൻ മുഖ്യമന്ത്രി ഉമ്മൻ ചാണ്ടി നേടിയ റെക്കാഡ് ഭൂരിപക്ഷത്തെയും മകൻ ചാണ്ടി ഉമ്മൻ മറികടന്നു.