ലണ്ടൻ: ഓവർസീസ് ഫ്രണ്ട്സ് ഓഫ് ബിജെപി (OFBJP) യുകെ കേരള ഘടകത്തിന്റെയും ബിജെപി പ്രവാസി സെൽ (കേരള) യുകെ യൂണിറ്റിന്റെയും സംയുക്താഭിമുഖ്യത്തിൽ കാര്യകർത്താ ശിൽപശാല സംഘടിപ്പിച്ചു.
നവംബർ 7-ന് ലണ്ടനിലെ വാട്ഫോർഡിലുള്ള ഹോളിറൂഡ് ചർച്ച് ഹാളിൽ (Holyrood Church Hall) നടന്ന ശിൽപശാലയിൽ യുകെയുടെ വിവിധ ഭാഗങ്ങളിൽ നിന്നായി എഴുപത്തഞ്ചോളം പ്രവർത്തകർ പങ്കെടുത്തു.
OFBJP യുകെ നാഷണൽ കൺവീനർ ബിക്രം ബാനർജി, ബിജെപി പ്രവാസി സെൽ (കേരള) സംസ്ഥാന കൺവീനർ രമേഷ് മാണിക്കോത്ത് എന്നിവർ ചേർന്ന് ശിൽപശാല ഉദ്ഘാടനം ചെയ്തു.
വിദേശരാജ്യങ്ങളിലെ സംഘടനാ പ്രവർത്തനങ്ങൾ കൂടുതൽ കാര്യക്ഷമവും സുസംഘടിതവുമാക്കുക എന്ന ലക്ഷ്യത്തോടെയാണ് ശിൽപശാല സംഘടിപ്പിച്ചത്. സംഘടനയുടെ ലക്ഷ്യങ്ങൾ, പ്രവർത്തനരീതികൾ, ആശയപരമായ അടിത്തറ, സംഘടനാ ഘടന, പ്രവർത്തകരുടെ ഉത്തരവാദിത്തങ്ങൾ, പ്രവാസി സമൂഹത്തിൽ നടത്തേണ്ട ഇടപെടലുകൾ തുടങ്ങിയ വിഷയങ്ങളിൽ വിശദമായ ചർച്ചകൾ നടന്നു.
കേരളത്തിൽ നിന്നുള്ള മുതിർന്ന ബിജെപി നേതാക്കളായ സംസ്ഥാന ജനറൽ സെക്രട്ടറി അഡ്വ. എസ്. സുരേഷ്, സംസ്ഥാന ജനറൽ സെക്രട്ടറിയും സെല്ലുകളുടെ പ്രഭാരിയുമായ അനൂപ് ആന്റണി, സംസ്ഥാന സെൽ കോർഡിനേറ്റർ അഡ്വ. വി. കെ. സജീവൻ, തിരുവനന്തപുരം മേയർ വി. വി. രാജേഷ് എന്നിവർ ശിൽപശാലയിൽ പങ്കുചേർന്ന് പ്രവർത്തകർക്ക് മാർഗനിർദേശങ്ങൾ നൽകി.
ബിജെപി പ്രവാസി സെൽ (കേരള) സംസ്ഥാന കൺവീനർ രമേഷ് മാണിക്കോത്ത്, OFBJP യുകെ നാഷണൽ കൺവീനർ ബിക്രം ബാനർജി, മുൻ നാഷണൽ ജനറൽ സെക്രട്ടറി സുരേഷ് മംഗളഗിരി എന്നിവർ ശിൽപശാലയിൽ നേരിട്ട് പങ്കെടുത്ത് പ്രവർത്തകരുമായി സംവദിക്കുകയും അവരുടെ സംശയങ്ങൾക്ക് മറുപടി നൽകുകയും ചെയ്തു.
പ്രവാസി മലയാളികൾക്കിടയിൽ ബിജെപിയുടെ ആശയങ്ങളും സംഘടനാ പ്രവർത്തനങ്ങളും പരിചയപ്പെടുത്തുന്നതിനുള്ള വിവിധ പ്രവർത്തനരീതികളെക്കുറിച്ച് നേതാക്കൾ വിശദീകരിച്ചു. അന്താരാഷ്ട്ര സമൂഹത്തിൽ ഇന്ത്യയുടെ നേട്ടങ്ങളും വികസന പ്രവർത്തനങ്ങളും അവതരിപ്പിക്കുന്നതിൽ പ്രവാസി സമൂഹത്തിന് വഹിക്കാനാകുന്ന പങ്കിനെക്കുറിച്ചും ചർച്ചകൾ നടന്നു.
യുകെയിലെ സംഘടനാ സംവിധാനം കൂടുതൽ ഏകോപിപ്പിക്കുന്നതിനും പ്രവർത്തനങ്ങൾ വിപുലീകരിക്കുന്നതിനുമുള്ള നിർദേശങ്ങളും ശിൽപശാലയിൽ ഉയർന്നു. വരുംദിവസങ്ങളിൽ നടപ്പാക്കേണ്ട സംഘടനാ പ്രവർത്തനങ്ങൾ സംബന്ധിച്ച കർമപദ്ധതികളും നേതൃത്വം വിശദീകരിച്ചു.
യുകെയിലെ വിവിധ പ്രദേശങ്ങളിൽ നിന്നുള്ള പ്രവർത്തകരെ ശിൽപശാലയിലേക്ക് ഏകോപിപ്പിക്കുന്നതിലും സംഘാടക പ്രവർത്തനങ്ങളിൽ പങ്കാളികളായ മറ്റ് പ്രവർത്തകരെയും നേതൃത്വം പ്രത്യേകം അഭിനന്ദിച്ചു.
സംഘടനാ പ്രവർത്തനങ്ങൾ കൂടുതൽ ഏകോപിതമായി മുന്നോട്ടുകൊണ്ടുപോകുന്നതിനായി പതിനൊന്നംഗ കമ്മിറ്റിയെയും ശിൽപശാലയിൽ തിരഞ്ഞെടുത്തു.
പ്രവാസി പ്രവർത്തകർക്കിടയിൽ ആശയവിനിമയം ശക്തിപ്പെടുത്തുന്നതിനും സംഘടനാ പ്രവർത്തനങ്ങൾക്ക് വ്യക്തമായ ദിശാബോധം നൽകുന്നതിനും ശിൽപശാല സഹായകമായതായി ഭാരവാഹികൾ അഭിപ്രായപ്പെട്ടു. യുകെയിലെ വിവിധ മേഖലകളിൽ സംഘടനാ പ്രവർത്തനങ്ങൾ കൂടുതൽ സജീവമാക്കുന്നതിനുള്ള തുടർനടപടികൾ സ്വീകരിക്കുമെന്നും നേതൃത്വം അറിയിച്ചു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.