ഗാർഡയുടെ കനത്ത മുന്നറിയിപ്പ്, ഇന്ധന പ്രതിഷേധങ്ങൾക്ക് പുതിയ വേദി

ഡബ്ലിൻ — റോഡുകൾ തടയുന്നതിനെതിരെ 'സീറോ ടോളറൻസ്' (വിട്ടുവീഴ്ചയില്ലാത്ത നടപടി) സ്വീകരിക്കുമെന്ന ഗാർഡയുടെ (പോലീസ്) കർശന മുന്നറിയിപ്പിനെത്തുടർന്ന്, വെള്ളിയാഴ്ച നടത്താനിരുന്ന രാജ്യവ്യാപക ഇന്ധന പ്രതിഷേധ റാലികൾ റദ്ദാക്കി.

പങ്കെടുക്കുന്ന ട്രക്ക് ഡ്രൈവർമാർക്കും കർഷകർക്കും പെനാൽറ്റി പോയിന്റുകൾ, കനത്ത പിഴ, നിയമനടപടികൾ എന്നിവ നേരിടേണ്ടി വരുമെന്ന ഭീഷണി ചൂണ്ടിക്കാട്ടിയാണ് പ്രതിഷേധങ്ങൾ വേണ്ടെന്നുവെച്ചതായി സംഘാടകർ സോഷ്യൽ മീഡിയ വഴി അറിയിച്ചത്.

"പെനാൽറ്റി പോയിന്റുകൾ, പിഴ, പ്രോസിക്യൂഷൻ എന്നിവയുടെ അപകടസാധ്യത അവഗണിക്കാൻ കഴിയില്ല," എന്ന് സംഘാടകർ വ്യക്തമാക്കി. ഡ്രൈവിംഗ് ലൈസൻസുകളും ജോലിയും ജീവിതമാർഗ്ഗവും അപകടത്തിലാക്കാൻ കഴിയില്ലെന്നും, ബജറ്റിന് ശേഷം പ്രതിഷേധങ്ങളുടെ ആവേശം കുറഞ്ഞതായും അവർ സമ്മതിച്ചു.

എന്നാൽ, പ്രാദേശിക റാലികൾ റദ്ദാക്കിയെങ്കിലും, "വെള്ളിയാഴ്ച ഉച്ചയ്ക്ക് ഡബ്ലിൻ നഗരമധ്യത്തിൽ നടക്കുന്ന പ്രത്യേക സമരത്തിന്" തങ്ങളുടെ പൂർണ്ണ പിന്തുണ തുടരുമെന്ന് സംഘാടകർ അറിയിച്ചു.

പ്രധാന ഗതാഗത പാതകളോ റോഡുകളോ മനപ്പൂർവ്വം തടസ്സപ്പെടുത്തുന്നവർക്കെതിരെ ശക്തമായ നടപടി സ്വീകരിക്കുമെന്ന് ഗാർഡ അധികൃതർ നേരത്തെ മുന്നറിയിപ്പ് നൽകിയിരുന്നു.

അതേസമയം, രാജ്യത്തിന്റെ ചരിത്രത്തിലെ തന്നെ ഏറ്റവും വലിയ സുരക്ഷാ സന്നാഹങ്ങൾക്കാണ് ഡബ്ലിൻ നഗരം സാക്ഷ്യം വഹിക്കുന്നത്. കൺവെൻഷൻ സെന്ററിൽ നടക്കുന്ന യൂറോപ്യൻ പൊളിറ്റിക്കൽ കമ്മ്യൂണിറ്റി (ഇ.പി.സി) ഉച്ചകോടിയിൽ പങ്കെടുക്കാൻ അമ്പതോളം ലോകനേതാക്കളാണ് തലസ്ഥാനത്തെത്തുന്നത്.

ചൊവ്വാഴ്ച മുതൽ തന്നെ ഡബ്ലിൻ ഡോക്ക്‌ലാൻഡ്‌സിലും സമീപ പ്രദേശങ്ങളിലും കടുത്ത ഗതാഗത നിയന്ത്രണങ്ങൾ ഏർപ്പെടുത്തിയിട്ടുണ്ട്. വ്യാഴാഴ്ചയോടെ കൂടുതൽ നിയന്ത്രണങ്ങൾ നിലവിൽ വരും.

ഉച്ചകോടിക്കായി വിദേശ പ്രതിനിധികൾ എത്തുന്നതിനാൽ ഡബ്ലിൻ എയർപോർട്ട്, കേസ്‌മെന്റ് എയറോഡ്രോം എന്നിവിടങ്ങളിലേക്കുള്ള വഴികളിലും പ്രത്യേക എസ്കോർട്ട് വാഹനങ്ങൾ കടന്നുപോകുന്നതിനായി ഇടവിട്ട് ഗതാഗതം തടയും. ഡബ്ലിൻ മേഖലയിലുടനീളം യാത്രക്കാർ കാലതാമസം മുൻകൂട്ടി കണ്ട് ഇതര വഴികൾ സ്വീകരിക്കണമെന്ന് നിർദ്ദേശിച്ചിട്ടുണ്ട്.