ആണവാക്രമണം ഉണ്ടായാൽ എങ്ങനെ രക്ഷപ്പെടാം? പൗരന്മാർക്ക് അതിജീവന മാർഗനിർദേശങ്ങളുമായി ഇറാൻ

ടെഹ്‌റാൻ: അമേരിക്കയുമായുള്ള സംഘർഷം വീണ്ടും ശക്തമാകുന്നതിനിടെ, ആണവ സ്ഫോടനമുണ്ടായാൽ സ്വീകരിക്കേണ്ട മുൻകരുതലുകൾ വിശദീകരിച്ച് ഇറാൻ. രാജ്യത്തെ ഔദ്യോഗിക വാർത്താ ഏജൻസിയായ ഐ.ആർ.എൻ.എ (IRNA) ഒക്ടോബർ 29-ന് പ്രസിദ്ധീകരിച്ച എട്ടുമിനിറ്റ് ദൈർഘ്യമുള്ള വീഡിയോയിലാണ് ഇസ്ഫഹാൻ പ്രവിശ്യയിലെ അടിയന്തര സേവന വിഭാഗം ജനങ്ങൾ പാലിക്കേണ്ട സുരക്ഷാ നിർദേശങ്ങൾ വിശദീകരിച്ചത്. ആണവ സ്ഫോടനത്തിന്റെ ആഘാതം, അതിശക്തമായ ചൂട്, സ്ഫോടനത്തെ തുടർന്നുണ്ടാകാവുന്ന റേഡിയോ ആക്ടീവ് മലിനീകരണം എന്നിവയിൽനിന്ന് എങ്ങനെ രക്ഷപ്പെടാമെന്നാണ് വീഡിയോയിൽ വ്യക്തമാക്കുന്നത്.

സ്ഫോടനമുണ്ടായാൽ ആദ്യം ചെയ്യേണ്ടത് സുരക്ഷിതമായ കെട്ടിടത്തിനുള്ളിൽ അഭയം തേടുകയാണ്. ജനലുകൾക്കും പുറംചുമരുകൾക്കും സമീപം നിൽക്കാതെ കെട്ടിടത്തിന്റെ മധ്യഭാഗത്തുള്ള മുറികളിലോ ഭൂഗർഭ നിലകളിലോ കഴിയണം. വാതിലുകളും ജനലുകളും അടയ്ക്കുകയും പുറത്തുനിന്നുള്ള വായു അകത്തേക്ക് എത്തിക്കുന്ന എയർ കണ്ടീഷനിങ്, വെന്റിലേഷൻ സംവിധാനങ്ങൾ പ്രവർത്തനരഹിതമാക്കുകയും വേണം.

സ്ഫോടനസമയത്ത് പുറത്താണെങ്കിൽ പ്രകാശത്തിലേക്ക് നേരിട്ട് നോക്കരുത്. അടുത്തുള്ള ഉറപ്പുള്ള മറവിനു പിന്നിൽ അഭയം തേടി നിലത്തുകിടന്ന് തലയും മുഖവും സംരക്ഷിക്കണം. സ്ഫോടനത്തിന്റെ ആഘാതതരംഗം കടന്നുപോയശേഷം സുരക്ഷിതമായ കെട്ടിടത്തിലേക്ക് മാറണം. വാഹനങ്ങൾ ഇത്തരം സാഹചര്യങ്ങളിൽ മതിയായ സംരക്ഷണം നൽകില്ലെന്നും മുന്നറിയിപ്പിലുണ്ട്.

റേഡിയോ ആക്ടീവ് പൊടിപടലങ്ങൾ ശരീരത്തിൽ പതിച്ചിട്ടുണ്ടെങ്കിൽ പുറംവസ്ത്രങ്ങൾ ശ്രദ്ധയോടെ അഴിച്ചുമാറ്റി അടച്ച കവറുകളിൽ സൂക്ഷിക്കണം. വസ്ത്രങ്ങൾ കുടഞ്ഞ് പൊടിപടലങ്ങൾ പരത്തുന്നത് ഒഴിവാക്കണം. സോപ്പും വെള്ളവും ഉപയോഗിച്ച് ശരീരം കഴുകുകയും വേണം. മലിനീകരണ സാധ്യതയുള്ള സാഹചര്യത്തിൽ കുപ്പിവെള്ളവും അടച്ച പാക്കറ്റുകളിലുള്ള ഭക്ഷണവും ഉപയോഗിക്കാനാണ് നിർദേശം.

സ്ഫോടനത്തിനുശേഷം കുറഞ്ഞത് 24 മണിക്കൂറെങ്കിലും സുരക്ഷിതമായ കെട്ടിടത്തിനുള്ളിൽ തുടരണമെന്നും ഔദ്യോഗിക നിർദേശമില്ലാതെ പുറത്തേക്ക് ഇറങ്ങരുതെന്നും മുന്നറിയിപ്പിൽ പറയുന്നു. ആശയവിനിമയ സംവിധാനങ്ങൾ തകരാറിലാകാനുള്ള സാധ്യത കണക്കിലെടുത്ത് ബാറ്ററിയിൽ പ്രവർത്തിക്കുന്ന റേഡിയോയും കരുതണം.

റേഡിയോ ആക്ടീവ് അയഡിൻ ശരീരത്തിൽ ആഗിരണം ചെയ്യുന്നത് കുറയ്ക്കാൻ ചില സാഹചര്യങ്ങളിൽ അയഡിൻ ഗുളികകൾ സഹായിക്കുമെങ്കിലും എല്ലാത്തരം വികിരണങ്ങളിൽനിന്നും അവ സംരക്ഷിക്കില്ല. അതിനാൽ ഡോക്ടർമാരുടെ നിർദേശമില്ലാതെ ഗുളികകൾ കഴിക്കരുതെന്നും അധികൃതർ മുന്നറിയിപ്പ് നൽകുന്നു.

ഇറാനിലെ നതാൻസ് ഉൾപ്പെടെയുള്ള ആണവ കേന്ദ്രങ്ങളെച്ചൊല്ലി അമേരിക്കയുമായുള്ള സംഘർഷം നിലനിൽക്കുന്ന സാഹചര്യത്തിലാണ് മാർഗനിർദേശങ്ങൾ ശ്രദ്ധ നേടുന്നത്. ഇസ്ഫഹാൻ പ്രവിശ്യയിൽ സ്ഥിതിചെയ്യുന്ന ആണവ കേന്ദ്രങ്ങളെ ലക്ഷ്യമിട്ട് അമേരിക്കൻ ആക്രമണമുണ്ടാകാമെന്ന അഭ്യൂഹങ്ങളും ഇതിനിടെ പ്രചരിക്കുന്നുണ്ട്. എന്നാൽ മാർഗനിർദേശങ്ങൾ ഒരു ആസന്നമായ ആണവാക്രമണത്തെക്കുറിച്ചുള്ള ഔദ്യോഗിക മുന്നറിയിപ്പാണെന്ന് ഇറാൻ വ്യക്തമാക്കിയിട്ടില്ല. വാർഷിക പ്രതിരോധ ബോധവത്കരണ പരിപാടിയുടെ ഭാഗമായാണ് ഇവ പ്രസിദ്ധീകരിച്ചത്.

അതേസമയം, ഇറാനിൽ ആണവ സ്ഫോടനമുണ്ടായാൽ കാറ്റിന്റെ ഗതിയും സ്ഫോടനത്തിന്റെ ശക്തിയും മറ്റ് കാലാവസ്ഥാ ഘടകങ്ങളും അനുസരിച്ച് റേഡിയോ ആക്ടീവ് പദാർഥങ്ങൾ അയൽരാജ്യങ്ങളിലേക്ക് വ്യാപിക്കാനുള്ള സാധ്യതയുണ്ടെന്ന് വിദഗ്ധർ ചൂണ്ടിക്കാട്ടുന്നു. ചില സാഹചര്യങ്ങളിൽ പാകിസ്താൻ വഴി ഇന്ത്യയുടെ വടക്കുപടിഞ്ഞാറൻ മേഖലകളിലും കുറഞ്ഞ അളവിൽ വികിരണപടലങ്ങൾ എത്തിയേക്കാമെന്ന വിലയിരുത്തലുകളുണ്ട്. എന്നാൽ ഇത് സ്ഥിരീകരിക്കപ്പെട്ട പ്രവചനമല്ല. ആണവ സംഘർഷത്തിന്റെ പ്രത്യാഘാതങ്ങൾ ഒരു രാജ്യത്തിന്റെ അതിർത്തിയിൽ മാത്രം ഒതുങ്ങിനിൽക്കണമെന്നില്ലെന്ന ആശങ്കയാണ് പുതിയ സംഭവവികാസങ്ങൾ ഉയർത്തുന്നത്.