വാഷിങ്ടൺ: ഇറാനുമായുള്ള സംഘർഷം അവസാനിപ്പിക്കാനുള്ള നയതന്ത്ര ശ്രമങ്ങളിൽ കാര്യമായ പുരോഗതിയുണ്ടായിട്ടില്ലെന്ന് അമേരിക്കൻ വിദേശകാര്യ സെക്രട്ടറി മാർക്കോ റൂബിയോ. ചർച്ചകൾക്ക് ഉടൻ വഴിത്തിരിവുണ്ടാകുമെന്ന് പ്രതീക്ഷിക്കുന്നില്ലെന്നും ഇറാൻ മുന്നോട്ടുവയ്ക്കുന്ന ചില ആവശ്യങ്ങൾ അംഗീകരിക്കാനാവാത്തതാണെന്നും അദ്ദേഹം വ്യക്തമാക്കി.
ഇതിനിടെ, ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽതാനിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ് തിങ്കളാഴ്ച വൈറ്റ് ഹൗസിൽ കൂടിക്കാഴ്ച നടത്തും. അമേരിക്കയും ഇറാനും തമ്മിലുള്ള സംഘർഷത്തിൽ മധ്യസ്ഥനായി ഖത്തർ നിർണായക പങ്കാണ് വഹിക്കുന്നത്. ഇറാന്റെ ആണവപദ്ധതിയുമായി ബന്ധപ്പെട്ട വിഷയങ്ങളിലും യുദ്ധം അവസാനിപ്പിക്കുന്നതിനുള്ള നിർദേശങ്ങളിലും ഇരുരാജ്യങ്ങൾക്കിടയിൽ ആശയവിനിമയം നടത്തുന്നതിൽ ഖത്തർ സജീവമാണ്.
ചർച്ചകൾ പുരോഗമിക്കുകയും ശക്തമായ കരാറിലെത്തുകയും ചെയ്താൽ ഇറാനെതിരെ വീണ്ടും സൈനികാക്രമണം നടത്തേണ്ട സാഹചര്യം ഉണ്ടാകില്ലെന്നാണ് ട്രംപിന്റെ നിലപാട്. എന്നാൽ സൈനിക നടപടി പുനരാരംഭിക്കേണ്ടിവന്നാൽ ലക്ഷ്യമിടാവുന്ന അടിസ്ഥാന സൗകര്യങ്ങൾ അമേരിക്ക നേരത്തെ കണ്ടെത്തിയിട്ടുണ്ടെന്നും അദ്ദേഹം മുന്നറിയിപ്പ് നൽകി. പാലങ്ങൾ ഉൾപ്പെടെയുള്ള ലക്ഷ്യങ്ങൾ പട്ടികയിലുണ്ടെന്നാണ് റിപ്പോർട്ട്.
അതേസമയം, ഉക്രൈൻ യുദ്ധവും ഇറാൻ സംഘർഷവും ലെബനനിലെ സുരക്ഷാ സാഹചര്യവും ചർച്ച ചെയ്യുന്നതിനായി ജി7 വിദേശകാര്യ മന്ത്രിമാർ പാരീസിൽ യോഗം ചേരും. ഉക്രൈനിൽ ശൈത്യകാലത്ത് വൈദ്യുതി വിതരണം തകർക്കാൻ റഷ്യ ഊർജകേന്ദ്രങ്ങളെ ലക്ഷ്യമിടുന്നതായുള്ള ആശങ്കയും യോഗത്തിൽ ഉയരും. അബുദാബിയിൽ ചൊവ്വ, ബുധൻ ദിവസങ്ങളിൽ നടക്കാനിരിക്കുന്ന അമേരിക്ക, റഷ്യ, ഉക്രൈൻ ത്രികക്ഷി ചർച്ചകൾക്ക് മുന്നോടിയായാണ് ജി7 യോഗം.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.