അമേരിക്കയിൽ അഞ്ചാംപനി വ്യാപനം രൂക്ഷം; പെൻസിൽവാനിയയിലും വിസ്കോൺസിനിലും മരണങ്ങൾ

വാഷിങ്ടൺ: അമേരിക്കയിൽ അഞ്ചാംപനി വ്യാപനം രൂക്ഷമാകുന്നതിനിടെ പെൻസിൽവാനിയയിലും വിസ്കോൺസിനിലും ഓരോ മരണം കൂടി റിപ്പോർട്ട് ചെയ്തു. വിസ്കോൺസിനിൽ മരിച്ചത് ഒരു കുട്ടിയാണെന്ന് സംസ്ഥാന ആരോഗ്യവകുപ്പ് സ്ഥിരീകരിച്ചു. പെൻസിൽവാനിയയിൽ ഈ വർഷത്തെ ഏഴാമത്തെ അഞ്ചാംപനി സംബന്ധമായ മരണമാണ് റിപ്പോർട്ട് ചെയ്തിരിക്കുന്നത്.

പെൻസിൽവാനിയയിലെ മോണ്ടൂർ കൗണ്ടിയിൽ വാക്സിൻ സ്വീകരിക്കാത്ത വ്യക്തിയാണ് മരിച്ചത്. സംസ്ഥാനത്ത് 46 കൗണ്ടികളിലായി ഈ വർഷം ഇതുവരെ 1,542 രോഗബാധകളാണ് സ്ഥിരീകരിച്ചത്. 305 പേർക്ക് ആശുപത്രിയിൽ ചികിത്സയും വേണ്ടിവന്നു. നവംബർ 9നുശേഷം മാത്രം 37 പുതിയ കേസുകളാണ് റിപ്പോർട്ട് ചെയ്തതെന്ന് സംസ്ഥാന ആരോഗ്യവകുപ്പ് അറിയിച്ചു.

വിസ്കോൺസിനിൽ ഈ വർഷം റിപ്പോർട്ട് ചെയ്യുന്ന രണ്ടാമത്തെ അഞ്ചാംപനി മരണമാണ് പുതിയ സംഭവം. മരിച്ച കുട്ടിയുടെ പ്രായമോ മറ്റ് വ്യക്തിഗത വിവരങ്ങളോ കുടുംബത്തിന്റെ സ്വകാര്യത കണക്കിലെടുത്ത് അധികൃതർ പുറത്തുവിട്ടിട്ടില്ല. ഓഗസ്റ്റ് മുതൽ സംസ്ഥാനത്തെ 20 കൗണ്ടികളിലായി 649 കേസുകൾ റിപ്പോർട്ട് ചെയ്തിട്ടുണ്ട്. 35 വർഷത്തിലേറെയായി സംസ്ഥാനത്ത് രേഖപ്പെടുത്തിയ ഏറ്റവും ഉയർന്ന രോഗബാധയാണിതെന്ന് ആരോഗ്യവകുപ്പ് വ്യക്തമാക്കി.

അമേരിക്കൻ രോഗനിയന്ത്രണ കേന്ദ്രമായ സി.ഡി.സി.യുടെ നവംബർ 13ന് പുതുക്കിയ കണക്കുകൾ പ്രകാരം നവംബർ 12 വരെ രാജ്യത്ത് 5,412 സ്ഥിരീകരിച്ച കേസുകളാണ് റിപ്പോർട്ട് ചെയ്തത്. 2025ൽ ആകെ 2,289 കേസുകളായിരുന്നു. വാക്സിനേഷൻ നിരക്കിലെ കുറവ് രോഗവ്യാപനത്തിന് പ്രധാന കാരണങ്ങളിലൊന്നാണെന്ന് ആരോഗ്യവിദഗ്ധർ ചൂണ്ടിക്കാട്ടുന്നു.

അഞ്ചാംപനി വളരെ വേഗത്തിൽ പകരുന്ന രോഗമാണ്. ന്യൂമോണിയ, മസ്തിഷ്കവീക്കം തുടങ്ങിയ ഗുരുതര സങ്കീർണതകൾക്കും രോഗം കാരണമാകാം. രണ്ട് ഡോസ് എം.എം.ആർ. വാക്സിൻ രോഗത്തിനെതിരെ ഏകദേശം 97 ശതമാനം സംരക്ഷണം നൽകുന്നുവെന്നാണ് ആരോഗ്യവകുപ്പിന്റെ വിലയിരുത്തൽ. വാക്സിനേഷൻ ഉറപ്പാക്കുന്നത് രോഗവ്യാപനം നിയന്ത്രിക്കുന്നതിനുള്ള ഏറ്റവും ഫലപ്രദമായ മാർഗമാണെന്ന് അധികൃതർ ഓർമിപ്പിച്ചു.