ഡബ്ലിൻ: കായിക, ബൗദ്ധിക രംഗങ്ങളിൽ ശ്രദ്ധേയമായ നേട്ടങ്ങൾ കൈവരിച്ച മലയാളി യുവപ്രതിഭകളെ ആദരിക്കാൻ വേൾഡ് മലയാളി ഫെഡറേഷൻ അയർലൻഡ് ഒരുങ്ങുന്നു. ക്രിക്കറ്റ്, ബാഡ്മിന്റൺ, ചെസ് മേഖലകളിൽ അയർലൻഡിനെ പ്രതിനിധീകരിച്ച് നേട്ടങ്ങൾ സ്വന്തമാക്കിയ ആറ് യുവപ്രതിഭകളെയാണ് സംഘടന ആദരിക്കുന്നത്.
ക്രിക്കറ്റിൽ അയർലൻഡ് അണ്ടർ-19 ടീമിലേക്ക് തിരഞ്ഞെടുക്കപ്പെട്ട സിദ്ധാർഥ് ബിജുവും ശ്രാവൺ ബിജുവും പട്ടികയിൽ ഇടംപിടിച്ചു. ടീമിന്റെ ക്യാപ്റ്റനായി സിദ്ധാർഥ് തിരഞ്ഞെടുക്കപ്പെട്ടത് നേട്ടത്തിന് കൂടുതൽ തിളക്കമേകുന്നു. 2028-ലെ അണ്ടർ-19 ലോകകപ്പിനുള്ള തയ്യാറെടുപ്പുകളുടെ ഭാഗമായി നടക്കുന്ന അന്താരാഷ്ട്ര മത്സരങ്ങളിലും പരിശീലന പരിപാടികളിലും ഇരുവരും പങ്കെടുക്കുന്നുണ്ട്.
ബാഡ്മിന്റൺ താരം ഹന്ന ഷോച്ചനാണ് മറ്റൊരു ശ്രദ്ധേയ സാന്നിധ്യം. 2026-ലെ ഡക്കാർ യൂത്ത് ഒളിമ്പിക്സിൽ അയർലൻഡ് ടീമിന്റെ ഉദ്ഘാടനച്ചടങ്ങിലെ പതാകവാഹകയായി ഹന്ന തിരഞ്ഞെടുക്കപ്പെട്ടിരുന്നു. അന്താരാഷ്ട്ര വേദിയിൽ അയർലൻഡിനെ പ്രതിനിധീകരിച്ച ഹന്നയുടെ സഹോദരി മിഷേൽ ഷോച്ചനും ബാഡ്മിന്റൺ രംഗത്ത് ശ്രദ്ധേയമായ പ്രകടനങ്ങൾ കാഴ്ചവെച്ചുവരുന്നു.
ചെസ് രംഗത്ത് ദേശീയ-അന്തർദേശീയ തലങ്ങളിൽ നേട്ടങ്ങൾ കൈവരിച്ച സഹോദരങ്ങളായ ഏയ്ഞ്ചൽ ബോബി, എയ്ഡൻ ബോബി എന്നിവരും ആദരിക്കപ്പെടും. 2025-ൽ അണ്ടർ-12 പെൺകുട്ടികളുടെ വിഭാഗത്തിൽ ഐറിഷ് ജൂനിയർ ചെസ് ചാമ്പ്യനായ ഏയ്ഞ്ചൽ 2026-ൽ അണ്ടർ-14 പെൺകുട്ടികളുടെ ദേശീയ ചാമ്പ്യൻ പട്ടവും സ്വന്തമാക്കി. 2025-ൽ കൊളംബിയയിൽ നടന്ന വേൾഡ് യൂത്ത് അണ്ടർ-16 ചെസ് ഒളിമ്പ്യാഡിൽ അയർലൻഡിനെ പ്രതിനിധീകരിച്ച ഏയ്ഞ്ചൽ വെയിൽസിലെ ഗ്ലോർണി ഇന്റർനാഷണൽ ഫൈവ് നേഷൻസ് ടൂർണമെന്റിലും പങ്കെടുത്തിട്ടുണ്ട്.
2025-ലെ ഐറിഷ് ജൂനിയർ ചെസ് ചാമ്പ്യൻഷിപ്പിൽ അണ്ടർ-10 വിഭാഗത്തിൽ രണ്ടാം സ്ഥാനം നേടിയ എയ്ഡൻ ബോബി, അതേ വർഷം ഗ്ലോർണി ടൂർണമെന്റിലും അയർലൻഡിനായി മത്സരിച്ചു. 2026 മാർച്ചിൽ മൊണാക്കോയിൽ നടന്ന 13-ാമത് ചെസ്മേറ്റ്സ് ഇന്റർനാഷണൽ യൂത്ത് ടീം ടൂർണമെന്റിലും എയ്ഡൻ പങ്കെടുത്തു.
യുവതലമുറയുടെ നേട്ടങ്ങളെ അംഗീകരിക്കുകയും കൂടുതൽ ഉയരങ്ങളിലേക്ക് മുന്നേറാൻ പ്രചോദനം നൽകുകയും ചെയ്യുക എന്ന ലക്ഷ്യത്തോടെയാണ് ആദരവ് സംഘടിപ്പിക്കുന്നതെന്ന് വേൾഡ് മലയാളി ഫെഡറേഷൻ അയർലൻഡ് അറിയിച്ചു.
നവംബർ 14-ന് ഡബ്ലിനിലെ സെയ്ന്റ് മാർഗരറ്റ്‌സ് ഹാൾ, സാൻഡിഹില്ലിൽ നടക്കുന്ന വേൾഡ് മലയാളി ഫെഡറേഷൻ അയർലൻഡ് ഫാമിലി മീറ്റ് 2026-ന്റെ ഭാഗമായാണ് പ്രത്യേക ആദരവ് ചടങ്ങ് സംഘടിപ്പിക്കുന്നത്. യുവപ്രതിഭകളുടെ നേട്ടങ്ങൾ ആഘോഷിക്കുന്നതിനൊപ്പം അയർലൻഡിലെ മലയാളി സമൂഹത്തിന് അഭിമാനവും പുതുതലമുറയ്ക്ക് പ്രചോദനവുമാകുന്ന സംഗമമായി പരിപാടി മാറുമെന്നാണ് സംഘാടകരുടെ പ്രതീക്ഷ.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.