ടെഹ്റാൻ: അമേരിക്കയുടെ ആവശ്യങ്ങൾക്കും നിബന്ധനകൾക്കും പകരമായി ഇറാന്റെ നിർദേശങ്ങൾ അംഗീകരിക്കുകയാണെങ്കിൽ രണ്ട് ദിവസത്തിനകം ഹോർമുസ് കടലിടുക്കിലൂടെയുള്ള കപ്പൽ ഗതാഗതം പുനഃസ്ഥാപിക്കാനാകുമെന്ന് ഇറാൻ. അമേരിക്കയുമായുള്ള സംഘർഷം അവസാനിപ്പിക്കുന്നതിനായി ഖത്തറിന്റെ മധ്യസ്ഥതയിൽ നടക്കുന്ന നയതന്ത്ര ചർച്ചകളിലാണ് ഇറാൻ പുതിയ നിർദേശം മുന്നോട്ടുവച്ചത്.
നേരത്തെ ഏഴ് ദിവസത്തിനകം കടലിടുക്ക് തുറക്കാമെന്നായിരുന്നു ഇറാന്റെ നിർദേശം. എന്നാൽ ഖത്തറിന്റെ മധ്യസ്ഥതയിലുള്ള ചർച്ചകൾക്കു പിന്നാലെ ഇത് രണ്ട് ദിവസമായി ചുരുക്കിയതായി ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കിയിരുന്നു. നിർദേശപ്രകാരം ആദ്യ ദിവസം അമേരിക്ക ചില നടപടികൾ സ്വീകരിക്കുകയും രണ്ടാം ദിവസം കടലിടുക്കിലൂടെയുള്ള കപ്പൽ ഗതാഗതം സാധാരണ നിലയിലാക്കുകയും ചെയ്യുന്നതാണ് ലക്ഷ്യം.
ഇറാന്റെ വിദേശകാര്യ മന്ത്രാലയ വക്താവ് എസ്മായിൽ ബഖായി തിങ്കളാഴ്ചയും ഈ സാധ്യത സ്ഥിരീകരിച്ചു. അമേരിക്ക ഇറാന്റെ ആവശ്യങ്ങൾ അംഗീകരിച്ചാൽ കടലിടുക്കിലെ സുരക്ഷ പുനഃസ്ഥാപിക്കാനും ചർച്ചകൾ തുടരാനും കഴിയുമെന്ന് അദ്ദേഹം പറഞ്ഞു.
അതേസമയം, ഖത്തറിന്റെ മധ്യസ്ഥതയിൽ ദോഹയിൽ നടന്ന തുടർച്ചയായ ചർച്ചകൾക്കുശേഷം ഇറാൻ പ്രതിനിധികൾ മടങ്ങിയെങ്കിലും നയതന്ത്ര നീക്കങ്ങൾ അവസാനിച്ചിട്ടില്ല. അമേരിക്കയുമായി ധാരണയിലെത്തുന്നതിനുള്ള കരട് നിർദേശം ഇപ്പോൾ പരിഗണനയിലാണെന്ന് ചർച്ചകളുമായി ബന്ധപ്പെട്ട ഒരു ഉദ്യോഗസ്ഥൻ അറിയിച്ചു.
എന്നാൽ കടലിടുക്ക് തുറക്കുന്നതുമായി ബന്ധപ്പെട്ട് അമേരിക്കയും ഇറാനും തമ്മിൽ അന്തിമ ധാരണയിലെത്തിയിട്ടില്ല. ഇറാന്റെ നിർദേശങ്ങൾ അമേരിക്ക അംഗീകരിക്കുമോ എന്നതിനെ ആശ്രയിച്ചായിരിക്കും തുടർനീക്കങ്ങൾ. ആഗോള എണ്ണവിതരണത്തിനും സമുദ്രവ്യാപാരത്തിനും നിർണായകമായ ഹോർമുസ് കടലിടുക്കിലെ ഗതാഗതം പുനഃസ്ഥാപിക്കപ്പെടുമോ എന്നതിലാണ് രാജ്യാന്തര ശ്രദ്ധ.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.