നേപ്പാളിൽ പർവതാരോഹണത്തിനിടയിൽ മലയാളി യുവതി കുടുങ്ങി; അടിയന്തര രക്ഷാപ്രവർത്തനം തേടി കുടുംബം

തിരുവനന്തപുരം: നേപ്പാളിലെ ലൊബൂച്ചെ (Lobuche) പർവതത്തിൽ ട്രക്കിങ്ങിനിടയിൽ മലയാളി പർവതാരോഹക കുടുങ്ങി. 

പത്തനംതിട്ട തിരുവല്ല മഞ്ഞാടി സ്വദേശിനിയായ സീന സാറ മജ്നുവാണ് (41) അപകടത്തിൽ പെട്ടത്. പർവതാരോഹണ ദൗത്യം പൂർത്തിയാക്കി താഴേക്ക് ഇറങ്ങുന്നതിനിടയിൽ കാൽതെറ്റി വീഴുകയായിരുന്നു.

താൻ അപകടത്തിൽ പെട്ട വിവരം സീന തന്നെയാണ് സമൂഹമാധ്യമങ്ങളിൽ പങ്കുവെച്ച വീഡിയോയിലൂടെ പുറത്തുവിട്ടത്. ഇറങ്ങിവരുന്ന വഴി താൻ വീണുവെന്നും കൈ അനക്കാൻ ആവുന്നില്ലെന്നും അവശനിലയിൽ വീഡിയോയിൽ വ്യക്തമാക്കുന്നുണ്ട്. ഒപ്പമുണ്ടായിരുന്നയാൾ താഴേക്ക് ഇറങ്ങിപ്പോയെന്നും അദ്ദേഹത്തെ കാണാനില്ലെന്നും വീഡിയോയിൽ പറയുന്നു. ഇനി എപ്പോഴാണ് താഴെ എത്താൻ കഴിയുക എന്നറിയില്ലെന്നും കടുത്ത അനിശ്ചിതത്വത്തിലാണെന്നും സീന സാറ കുടുംബത്തെയും സുഹൃത്തുക്കളെയും അറിയിച്ചിട്ടുണ്ട്.

കഴിഞ്ഞ ഒക്ടോബർ 21-നാണ് സീന പർവതാരോഹണത്തിനായി നേപ്പാളിലേക്ക് പോയത്. വിവരം അറിഞ്ഞതിനെ തുടർന്ന് സീനയെ എത്രയും പെട്ടെന്ന് സുരക്ഷിതമായി നാട്ടിലെത്തിക്കാനുള്ള അടിയന്തര നടപടികൾ സ്വീകരിക്കണമെന്ന് ആവശ്യപ്പെട്ട് കുടുംബം അധികാരികളെ സമീപിച്ചു. കുടുംബത്തിന്റെ അപേക്ഷയെ തുടർന്ന് ബിജെപി സംസ്ഥാന ജനറൽ സെക്രട്ടറി അനൂപ് ആന്റണി വിഷയത്തിൽ ഇടപെടുകയും, വിദേശകാര്യ മന്ത്രാലയത്തോടും നേപ്പാളിലെ ഇന്ത്യൻ എംബസിയോടും സംസാരിച്ച് രക്ഷാപ്രവർത്തനം വേഗത്തിലാക്കാൻ ആവശ്യപ്പെടുകയും ചെയ്തിട്ടുണ്ട്.

തിരുവല്ല നാഷണൽ കോളേജ് ഡയറക്ടറും അഭിഭാഷകയുമായ സീന സാറ മജ്നു, ഇതിനുമുമ്പും കിളിമഞ്ചാരോ ഉൾപ്പെടെയുള്ള നിരവധി സാഹസിക പർവതാരോഹണ ദൗത്യങ്ങൾ വിജയകരമായി പൂർത്തിയാക്കിയിട്ടുള്ള വ്യക്തിയാണ്. യൂറോപ്പിലെ ഏറ്റവും ഉയർന്ന കൊടുമുടിയായ മൗണ്ട് എൽബ്രസ് കീഴടക്കി ഇന്ത്യൻ ദേശീയ പതാക ഉയർത്തിയും ഇവർ വാർത്തകളിൽ ഇടംനേടിയിട്ടുണ്ട്. സീനയെ സുരക്ഷിതമായി തിരിച്ചെത്തിക്കാനുള്ള തീവ്രശ്രമത്തിലാണ് ബന്ധുക്കളും അധികാരികളും.