ഡ്രൈവിംഗ് ലേണർ പെർമിറ്റ് നിബന്ധനകൾ കടുപ്പിച്ച് അയര്‍ലണ്ട് ; നവംബർ 1 മുതൽ പുതിയ മാറ്റങ്ങൾ പ്രാബല്യത്തിൽ

ഡബ്ലിൻ: ഡ്രൈവിംഗ് ടെസ്റ്റിന് അപേക്ഷിച്ചാൽ മാത്രം മൂന്നാമത്തെയോ നാലാമത്തെയോ ലേണർ പെർമിറ്റ് ലഭിക്കില്ലെന്ന കർശന വ്യവസ്ഥയുമായി റോഡ് സേഫ്റ്റി അതോറിറ്റി (ആർഎസ്എ). ഡ്രൈവിംഗ് ടെസ്റ്റ് എഴുതാതെ, ടെസ്റ്റ് ബുക്ക് ചെയ്തെന്ന കാരണം കാണിച്ച് വർഷങ്ങളോളം ലേണർ പെർമിറ്റ് പുതുക്കി വാഹനമോടിക്കുന്ന രീതി തടയാനാണ് നവംബർ ഒന്ന് മുതൽ പുതിയ നിയന്ത്രണങ്ങൾ നടപ്പിലാക്കുന്നത്.

പ്രധാന മാറ്റങ്ങൾ:

• മൂന്നാമത്തെ പെർമിറ്റ്: മൂന്നാമത്തെ ലേണർ പെർമിറ്റിന് അപേക്ഷിക്കുന്നവർ കഴിഞ്ഞ രണ്ട് വർഷത്തിനുള്ളിൽ ഡ്രൈവിംഗ് ടെസ്റ്റ് എഴുതിയിരിക്കണം. ടെസ്റ്റിന് അപേക്ഷിച്ചാൽ മാത്രം ഇനി പെർമിറ്റ് പുതുക്കി നൽകില്ല.
• നാലാമത്തെ പെർമിറ്റ്: നാലാമത്തെ പെർമിറ്റിനും ടെസ്റ്റ് എഴുതിയിരിക്കണമെന്ന നിബന്ധന ബാധകമാണ്. കൂടാതെ, നാലാമത്തെ പെർമിറ്റിന്റെ കാലാവധി ഇനി മുതൽ രണ്ട് വർഷത്തിന് പകരം ഒരു വർഷമായി ചുരുക്കും.
• പരമാവധി നാല് പെർമിറ്റുകൾ: നാലാമത്തെ പെർമിറ്റിന് ശേഷം ഇനി ലേണർ പെർമിറ്റുകൾ അനുവദിക്കില്ല. അഞ്ചാമതും പെർമിറ്റ് ആവശ്യമുള്ളവർ 12 നിർബന്ധിത ഡ്രൈവിംഗ് പാഠങ്ങൾ (EDT) ഉൾപ്പെടെയുള്ള 'ലേണിംഗ്-ടു-ഡ്രൈവ്' പ്രക്രിയ തുടക്കം മുതൽ വീണ്ടും പൂർത്തിയാക്കേണ്ടി വരും.
• ആദ്യ രണ്ട് പെർമിറ്റുകൾ: ഒന്നും രണ്ടും ലേണർ പെർമിറ്റുകൾക്ക് അപേക്ഷിക്കുന്നവർക്ക് നിലവിലെ ചട്ടങ്ങളിൽ മാറ്റമില്ല.

റോഡ് സുരക്ഷ ഉറപ്പാക്കുന്നതിനും ഡ്രൈവിംഗ് നിലവാരം ഉയർത്തുന്നതിനുമാണ് പുതിയ തീരുമാനമെന്ന് ആർ‌എസ്‌എ ചീഫ് ഓപ്പറേറ്റിംഗ് ഓഫീസർ ബ്രെൻഡൻ വാൽഷ് വ്യക്തമാക്കി. ലേണർ പെർമിറ്റിൽ സ്ഥിരമായി വാഹനമോടിക്കാൻ വേണ്ടി മാത്രം പരീക്ഷ ബുക്ക് ചെയ്യുന്ന പ്രവണത സമൂഹത്തിന് അംഗീകരിക്കാനാവില്ലെന്നും, യോഗ്യതാ സർട്ടിഫിക്കറ്റ് നേടാൻ ആളുകളെ പ്രേരിപ്പിക്കുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു.

ആർഎസ്എയുടെ കണക്കുകൾ പ്രകാരം നിലവിൽ മൂന്നാമത്തെ പെർമിറ്റിൽ തുടരുന്ന 74,000 പേരും, 11 തവണയിലധികം പെർമിറ്റ് പുതുക്കിയ 12,000-ത്തോളം പേരും രാജ്യത്തുണ്ട്. പുതിയ നിയമങ്ങൾ പ്രാബല്യത്തിൽ വരാനിരിക്കെ, ടെസ്റ്റ് പാസാകാൻ ഡ്രൈവിംഗ് സ്കൂളുകളെ സമീപിക്കുന്ന മുതിർന്ന പഠിതാക്കളുടെ എണ്ണത്തിൽ വലിയ വർദ്ധനവുണ്ടായതായി ഡ്രൈവിംഗ് ഇൻസ്ട്രക്ടർമാർ റിപ്പോർട്ട് ചെയ്യുന്നു.