ഇന്ധനവില കുതിച്ചുയരുന്നു: ഡീസൽ ശേഖരം വിട്ടുനൽകിയില്ലെങ്കിൽ കയറ്റുമതി നിരോധനം; ഫ്രാൻസിനും ജർമനിക്കും മുന്നറിയിപ്പുമായി യുഎസ്,

വാഷിങ്ടൺ : ഡീസൽ ശേഖരം പുറത്തുവിട്ടില്ലെങ്കിൽ അമേരിക്കയിൽ നിന്നുള്ള കയറ്റുമതി നിരോധിക്കുമെന്ന് ഫ്രാൻസിനും ജർമ്മനിക്കും മുന്നറിയിപ്പ് നൽകി ട്രംപ് ഭരണകൂടം.

ആഗോള വിപണിയിൽ ഇന്ധനവില കുതിച്ചുയരുന്ന പശ്ചാത്തലത്തിൽ അടിയന്തരമായി ഡീസൽ ശേഖരം വിപണിയിലെത്തിക്കണമെന്നാണ് അമേരിക്കയുടെ ആവശ്യം. അടുത്ത ആറുമാസത്തിനുള്ളിൽ 120 ദശലക്ഷം ബാരൽ ഡീസൽ പുറത്തുവിടണമെന്നാണ് അമേരിക്ക ആവശ്യപ്പെട്ടിരിക്കുന്നതെന്ന് ഉദ്ധരണികൾ വ്യക്തമാക്കുന്നു. നവംബറിലെ മിഡ്‌ടേം തിരഞ്ഞെടുപ്പിന് മുന്നോടിയായി ഇന്ധനവില പിടിച്ചുനിർത്താനാണ് ഡൊണാൾഡ് ട്രംപിന്റെ നീക്കം.

അമേരിക്കയുടെ ഈ അന്ത്യശാസനം യൂറോപ്യൻ രാജ്യങ്ങൾക്ക് കടുത്ത പ്രതിസന്ധിയാണ് സൃഷ്ടിച്ചിരിക്കുന്നത്. ആഭ്യന്തര വിപണിയിൽ വില കുറയ്ക്കാൻ കരുതൽ ശേഖരം ഉപയോഗിക്കേണ്ടി വരുമെങ്കിലും, ഇറാനുമായുള്ള സമാധാന ചർച്ചകൾ പരാജയപ്പെട്ടാൽ ഇന്ധന പ്രതിസന്ധി കൂടുതൽ വഷളാകുമെന്ന ആശങ്കയുമുണ്ട്. 

ഈ വിഷയം ചർച്ച ചെയ്യാൻ 27 അംഗ യൂറോപ്യൻ യൂണിയൻ രാജ്യങ്ങളുടെയും യൂറോപ്യൻ കമ്മീഷന്റെയും പ്രതിനിധികൾ വെള്ളിയാഴ്ച രാവിലെ യോഗം ചേരുന്നുണ്ട്. ഫ്രാൻസ്, ജർമ്മനി, ഇറ്റലി, ബ്രിട്ടൻ, അയർലൻഡ് തുടങ്ങിയ രാജ്യങ്ങൾ കഴിഞ്ഞ ദിവസവും വിഷയം ചർച്ച ചെയ്തിരുന്നു.

റഷ്യയിൽ നിന്നുള്ള ഇറക്കുമതി നിരോധിച്ചതിനും മിഡിൽ ഈസ്റ്റിലെ സംഘർഷങ്ങൾ വിതരണത്തെ ബാധിച്ചതിനും പിന്നാലെ യൂറോപ്പ് ഇന്ധനത്തിനായി അമേരിക്കയെയാണ് കൂടുതലായി ആശ്രയിക്കുന്നത്. എന്നാൽ നേരത്തെ നൽകിയ വാഗ്ദാനങ്ങൾ ജർമ്മനിയും ഫ്രാൻസും പൂർണ്ണമായി പാലിച്ചില്ലെന്ന് യു.എസ് ഉദ്യോഗസ്ഥർ ആരോപിക്കുന്നു. 

അതേസമയം, അന്താരാഷ്ട്ര ഊർജ്ജ ഏജൻസിയുടെ (ഐ.ഇ.എ) മാർഗ്ഗനിർദ്ദേശപ്രകാരം കരുതൽ ശേഖരം സംബന്ധിച്ച് ജർമ്മൻ സാമ്പത്തിക മന്ത്രാലയത്തിന് ഇതുവരെ ഔദ്യോഗിക നിർദ്ദേശം ലഭിച്ചിട്ടില്ല. റഷ്യ ഡീസൽ കയറ്റുമതി നിരോധനം ഒക്ടോബർ അവസാനം വരെ നീട്ടിയതും, ചൈന ആഭ്യന്തര കരുതൽ ശേഖരത്തിനായി കയറ്റുമതി നിർത്തിവെച്ചതും വിപണിക്ക് കനത്ത ആഘാതമായിട്ടുണ്ട്.

 ശൈത്യകാലവും കാർഷിക സീസണും കണക്കിലെടുത്ത് ഡീസൽ വിപണിയിലെത്തിക്കാൻ ഉചിതമായ സമയമാണിതെന്ന് യു.എസ് ഊർജ്ജ സെക്രട്ടറി ക്രിസ് റൈറ്റ് വ്യക്തമാക്കി. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ജി7 രാജ്യങ്ങളുടെ വീഡിയോ കോൺഫറൻസ് വിളിച്ച് പ്രതിസന്ധി ചർച്ച ചെയ്യുമെന്ന് അധികൃതർ അറിയിച്ചു.