പൊന്‍കുന്നം: കുടുംബസമേതം കാറില്‍ യാത്ര ചെയ്യുന്നതിനിടെ മദ്യപിച്ചെത്തിയ ബൈക്ക് യാത്രക്കാരന്‍ വാഹനത്തിലിടിക്കുകയും ചോദ്യം ചെയ്ത പൊലീസുകാരനെ കൈയേറ്റം ചെയ്യുകയും ചെയ്ത സംഭവത്തില്‍ തുടര്‍നടപടികള്‍ വിവാദത്തില്‍.
കഴിഞ്ഞദിവസം പൊന്‍കുന്നം പൊലീസ് സ്റ്റേഷനു മുന്നിലായിരുന്നു സംഭവം. കൂരാലി ഭാഗത്തുനിന്നെത്തിയ ബൈക്ക് പൊലീസുകാരന്‍ കുടുംബസമേതം സഞ്ചരിച്ചിരുന്ന കാറിലിടിക്കുകയായിരുന്നു. ബൈക്ക് യാത്രക്കാരന്‍ മദ്യപിച്ചിരുന്നതായി ശ്രദ്ധയില്‍പ്പെട്ടതിനെത്തുടര്‍ന്ന് വാഹനം നിര്‍ത്തി അപകടത്തെക്കുറിച്ച്‌ ചോദിച്ചപ്പോള്‍ തര്‍ക്കമുണ്ടാവുകയും ഇയാള്‍ പൊലീസുകാരനെ കൈയേറ്റം ചെയ്യുകയുമായിരുന്നു. ഉദ്യോഗസ്ഥന്റെ പുറത്തും കഴുത്തിലും വയറ്റിലും കൈകാലുകളിലും പരിക്കേറ്റതായാണ് വിവരം.
പൊലീസുകാരനെ ആക്രമിച്ചതിനും മദ്യപിച്ച്‌ വാഹനമോടിച്ചതിനും ബൈക്ക് യാത്രക്കാരനെതിരേ രണ്ട് കേസുകള്‍ രജിസ്റ്റര്‍ ചെയ്തിട്ടുണ്ട്. ഇതിനു പിന്നാലെയാണ് പരാതിക്കാരനായ ഉദ്യോഗസ്ഥനും ഭാര്യയ്ക്കും സഹോദരിക്കുമെതിരേ കേസെടുത്തത്. ആക്രമണത്തിന്റെ സിസിടിവി ദൃശ്യങ്ങള്‍ ലഭ്യമായിരിക്കെ, തെളിവുകള്‍ പരിശോധിച്ചാണോ തുടര്‍നടപടികള്‍ സ്വീകരിച്ചതെന്ന ചോദ്യമാണ് ഉയരുന്നത്.
മദ്യപിച്ച്‌ വാഹനമോടിച്ചുള്ള അപകടങ്ങള്‍ തടയാന്‍ പൊലീസ് സ്‌പെഷ്യല്‍ ഡ്രൈവ് നടത്തിവരുന്നതിനിടെയുണ്ടായ സംഭവമാണ് വിവാദമായത്. നിയമലംഘനങ്ങള്‍ക്കെതിരേ കര്‍ശന നടപടി സ്വീകരിക്കേണ്ട ഘട്ടത്തില്‍, പരാതിക്കാരനായ ഉദ്യോഗസ്ഥനും കുടുംബാംഗങ്ങള്‍ക്കുമെതിരേ കേസെടുത്തത് പൊലീസിന്റെ നടപടിക്രമങ്ങളെക്കുറിച്ച്‌ സംശയങ്ങള്‍ക്കിടയാക്കിയിട്ടുണ്ട്.
ഭാര്യയുടെയും രണ്ടുമാസം പ്രായമുള്ള കുഞ്ഞിന്റെയും മുന്നില്‍വെച്ച്‌ ആക്രമണത്തിനിരയായ ഉദ്യോഗസ്ഥനെതിരേയും കുടുംബാംഗങ്ങള്‍ക്കെതിരേയും കേസെടുത്തതില്‍ സേനയ്ക്കുള്ളില്‍ കടുത്ത അതൃപ്തിയുണ്ടെന്നാണ് സൂചന. സ്വാധീനമുള്ളവര്‍ പ്രതികളാകുമ്പോള്‍ പരാതിക്കാരനും പ്രതിയാകുന്ന സാഹചര്യമാണോ നിലനില്‍ക്കുന്നതെന്ന വിമര്‍ശനവും ഉയരുന്നുണ്ട്.
ഇരുവിഭാഗങ്ങളുടെയും പരാതികളില്‍ കേസെടുക്കുന്നത് നിയമനടപടിയുടെ ഭാഗമാണെങ്കിലും സിസിടിവി ദൃശ്യങ്ങളും ദൃക്‌സാക്ഷിമൊഴികളും വിശദമായി പരിശോധിച്ച്‌ ഓരോരുത്തരുടെയും പങ്ക് വിലയിരുത്തേണ്ടതുണ്ട്. സംഭവത്തില്‍ ഉന്നത പൊലീസ് ഉദ്യോഗസ്ഥര്‍ ഇടപെട്ട് നിഷ്പക്ഷമായ അന്വേഷണം ഉറപ്പാക്കണമെന്നും തെളിവുകളുടെ അടിസ്ഥാനത്തില്‍ തുടര്‍നടപടികള്‍ സ്വീകരിക്കണമെന്നും ആവശ്യമുയരുന്നു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.