മൊബൈല്‍ ഫോണ്‍ പൊട്ടിത്തെറിച്ച് കരടിയുടെ വായില്‍പ്പെട്ട 15കാരന് അത്ഭുത രക്ഷ: രണ്ടാം ജന്മമെന്ന് ദൃക്‌സാക്ഷി,

മോസ്‌കോ: ആക്രമിച്ച കരടിയുടെ വായില്‍ മൊബൈല്‍ ഫോണ്‍ പൊട്ടിത്തെറിച്ചതോടെ 15കാരന് രണ്ടാം ജന്മം. റഷ്യയിലെ അല്‍ത്തായ് മേഖലയിലാണ് സംഭവം.

കരടിയുടെ ആക്രമണത്തില്‍ ഗുരുതരമായി പരിക്കേറ്റ ബാലനെ വിദഗ്ദ്ധ ചികിത്സയ്ക്കായി മോസ്‌കോയിലെ ആശുപത്രിയിലേക്ക് മാറ്റിയിട്ടുണ്ട്. ഒരു പ്രമുഖ ബ്രിട്ടീഷ് മാദ്ധ്യമമാണ് സംഭവം റിപ്പോർട്ട് ചെയ്തത്. വിദൂര മേഖലയിലെത്തിയതായിരുന്നു

 കൗമാരക്കാരനും സുഹൃത്തും. ഇതിനിടെ കരടി അടുത്തേക്ക് വരുന്നതുകണ്ട് ഭയന്ന കുട്ടി സമീപത്തെ മരത്തില്‍ കയറി രക്ഷപ്പെടാൻ ശ്രമിച്ചു. എന്നാല്‍ പിന്നാലെയെത്തിയ കരടി കുട്ടിയെ പിടികൂടി താഴേക്ക് വലിച്ചിട്ടശേഷം കടിക്കുകയും മാന്തുകയും ചെയ്തു. സംഭവം കണ്ട ഒരാള്‍ കരടിയെ ഓടിക്കാൻ നായ്ക്കളെ അഴിച്ചുവിട്ടു. 

ഇതിനിടെ കരടി കുട്ടിയുടെ പോക്കറ്റിലുണ്ടായിരുന്ന മൊബൈല്‍ ഫോണില്‍ കടിച്ചു. കടുത്ത സമ്മർദത്തെത്തുടർന്ന് ഫോണിലെ ബാറ്ററി തീപിടിച്ച്‌ പൊട്ടിത്തെറിച്ചതായാണ് റിപ്പോർട്ട്. അപ്രതീക്ഷിത സ്‌ഫോടനത്തില്‍ പരിഭ്രാന്തനായ കരടി കുട്ടിയെ വിട്ട് കാട്ടിലേക്ക് ഓടി മറയുകയായിരുന്നു.

കരടി കുട്ടിയുടെ പിൻഭാഗത്ത് കടിച്ച സമയത്താണ് പോക്കറ്റിലുണ്ടായിരുന്ന ഫോണിന്റെ ബാറ്ററി പൊട്ടിത്തെറിച്ചതെന്നും ഇതാണ് മൃഗത്തെ പിന്തിരിപ്പിച്ചതെന്നും ദൃക്സാക്ഷി പറയുന്നു. കരടിയുടെ ആക്രമണത്തില്‍ തലയിലും തലയോട്ടിയിലും മുഖത്തെ അസ്ഥികളിലും കഴുത്തിലും ഉള്‍പ്പെടെ കുട്ടിക്ക് ഗുരുതരമായി പരിക്കേറ്റിട്ടുണ്ട്. 

പൊട്ടിത്തെറിച്ച ഫോണില്‍നിന്നുള്ള പൊള്ളലും ഏറ്റു. സുഹൃത്ത് സഹായം തേടിയതോടെ കുട്ടിയെ ഉടൻ ആശുപത്രിയിലെത്തിച്ചു.  നില ഗുരുതരമായതിനെത്തുടർന്ന് പിന്നീട് വിദഗ്ദ്ധ ചികിത്സയ്ക്കായിമോസ്‌കോയിലേക്ക് വിമാനമാർഗം മാറ്റുകയായിരുന്നു.

 സോള്‍ട്ടണ്‍ എന്ന വിദൂര ഗ്രാമത്തില്‍നിന്ന് ഏകദേശം 12 മൈല്‍ അകലെയാണ് ആക്രമണം നടന്നതെന്നാണ് റിപ്പോർട്ട്. ആക്രമണം നടത്തിയ കരടിയെ കണ്ടെത്താൻ അധികൃതരും വന്യജീവി ഉദ്യോഗസ്ഥരും ശ്രമം തുടരുകയാണ്.