ആപ്പുകളെ അന്ധമായി വിശ്വസിക്കരുത്, ആപ്പ് പറഞ്ഞ വഴി വിശ്വസിച്ച് മലകയറി; കാനഡയിൽ മലയിടുക്കിൽ കുടുങ്ങി പതിനാറുകാരൻ

കാനഡ: AI ആപ്പായ ‘ക്ലോഡ്’ നൽകിയ തെറ്റായ വഴി പിന്തുടർന്ന് ദുർഘടമായ മലയിടുക്കിൽ കുടുങ്ങിയ പതിനാറുകാരനെ രക്ഷാപ്രവർത്തകർ ഹെലികോപ്റ്ററിൽ രക്ഷപെടുത്തി.

ബ്രിട്ടീഷ് കൊളംബിയയിലുള്ള ക്രൗൺ മൗണ്ടനിലെ ‘വിഡോമേക്കർ അരെറ്റ്’ എന്ന 1,700 അടി ഉയരമുള്ള പാറക്കെട്ടിലാണ് കൗമാരക്കാരനായ ബ്രൈസ് വിൻസെന്റ് ഗൗറിലുക് ശനിയാഴ്ച കുടുങ്ങിയത്. മൗണ്ടനിലേക്ക് പോകുന്നതിനിടെ സമീപത്തുള്ള ക്രൗൺ മൗണ്ടനിലേക്ക് പോയി മടങ്ങാനുള്ള വഴി ചോദിച്ചാണ് ബ്രൈസ് ‘ക്ലോഡ്’ എഐ ചാറ്റ്‌ബോട്ടിനെ സമീപിച്ചത്

. സാധാരണ എട്ട് മണിക്കൂർ സമയമെടുക്കുന്നതും പരിചയസമ്പന്നരായ യാത്രക്കാർക്ക് മാത്രം സാധ്യമാകുന്നതുമായ പാതയാണിത്. എന്നാൽ എഐ നൽകിയ നിർദേശങ്ങൾ പിന്തുടർന്ന് സഞ്ചരിച്ച കുട്ടി, പ്രധാനപ്പെട്ട വഴിയിൽ നിന്ന് മാറി റോക്ക് ക്ലൈംബിംഗ് നടത്തുന്നവർ മാത്രം കയറുന്ന അപകടകരമായ പാറക്കെട്ടിന് മുന്നിലാണ് എത്തിച്ചേർന്നത്.

റോപ്പുകളും മറ്റ് സുരക്ഷാ ഉപകരണങ്ങളും ഇല്ലാതെ മുന്നോട്ട് പോകാൻ കഴിയില്ലെന്നും വഴിതെറ്റിയെന്നും മനസ്സിലായതോടെ ബ്രൈസ് ഉടൻ തന്നെ അമ്മയെയും തുടർന്ന് എമർജൻസി സർവീസിനെയും ഫോണിൽ വിവരമറിയിക്കുകയായിരുന്നു. വിവരമറിഞ്ഞെത്തിയ ‘നോർത്ത് ഷോർ റെസ്ക്യൂ’ ടീം പാറക്കെട്ടിന് സമീപം ഹെലികോപ്റ്റർ നിറുത്തി നിർത്തി രണ്ട് അംഗങ്ങളെ താഴെയിറക്കിയാണ് കുട്ടിയെ സുരക്ഷിതമായി മുകളിലേക്ക് ഉയർത്തിയത്. 

തുടർന്ന് കുട്ടിയെ സമീപത്തെ റെസ്ക്യൂ ബേസിലേക്ക് മാറ്റി. കൃത്യമായ പ്ലാനിംഗും പരിശീലനവുമില്ലാതെ യാത്രാ വഴികൾക്കായി ഇത്തരം എഐ ആപ്പുകളെ അന്ധമായി വിശ്വസിക്കരുതെന്ന് രക്ഷാപ്രവർത്തകർ മുന്നറിയിപ്പ് നൽകി.