കുട്ടികളുടെ സാമൂഹികമാധ്യമ ഉപയോഗത്തിന് നിയന്ത്രണം വേണം; കേന്ദ്രത്തോടും ബാലാവകാശ കമ്മിഷനോടും സുപ്രീംകോടതി വിശദീകരണം തേടി

ന്യൂഡൽഹി: കുട്ടികളുടെ സാമൂഹികമാധ്യമ ഉപയോഗവുമായി ബന്ധപ്പെട്ട അപകടസാധ്യതകൾ നിയന്ത്രിക്കാൻ സമഗ്രമായ നിയമചട്ടക്കൂട് വേണമെന്ന ഹർജിയിൽ കേന്ദ്ര സർക്കാരിനോടും ദേശീയ ബാലാവകാശ സംരക്ഷണ കമ്മിഷനോടും സുപ്രീംകോടതി വിശദീകരണം തേടി. കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിനുള്ള നടപടികൾക്ക് വഴിയൊരുക്കുന്നതാണ് കോടതിയുടെ ഇടപെടൽ.

ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് വനിതാ-ശിശു വികസന മന്ത്രാലയം, നിയമ-നീതി മന്ത്രാലയം, ദേശീയ ബാലാവകാശ സംരക്ഷണ കമ്മിഷൻ എന്നിവയ്ക്ക് നോട്ടീസ് അയച്ചത്. മധ്യപ്രദേശിലെ ഇൻഡോർ ആസ്ഥാനമായ എമറാൾഡ് ഹൈറ്റ്സ് ഇന്റർനാഷണൽ സ്കൂളും അക്കാദമിക് വിഭാഗം ഡയറക്ടർ സിദ്ധാർഥ് സിങ് ഗിർനാറുമാണ് ഹർജി നൽകിയത്.

സാമൂഹികമാധ്യമങ്ങളിൽ അക്കൗണ്ട് തുടങ്ങുന്നതിന് പ്രായപരിധി നിശ്ചയിക്കുക, പ്രായം കൃത്യമായി പരിശോധിക്കുന്ന സംവിധാനം ഏർപ്പെടുത്തുക, രക്ഷിതാക്കളുടെ സ്ഥിരീകരിക്കാവുന്ന സമ്മതം ഉറപ്പാക്കുക തുടങ്ങിയ നിർദേശങ്ങളാണ് ഹർജിയിലുള്ളത്. സൈബർ അധിക്ഷേപം, ലൈംഗിക ചൂഷണം, പ്രായത്തിന് അനുയോജ്യമല്ലാത്ത ഉള്ളടക്കങ്ങളിലേക്കുള്ള പ്രവേശനം, അമിതമായ സ്ക്രീൻ ഉപയോഗം എന്നിവയിൽനിന്ന് കുട്ടികളെ സംരക്ഷിക്കേണ്ടതിന്റെ ആവശ്യകതയും ഹർജി ചൂണ്ടിക്കാട്ടുന്നു.

കുട്ടികളെ ദോഷകരമായി ബാധിക്കുന്ന തരത്തിൽ ഉപയോക്താക്കളെ കൂടുതൽ സമയം പ്ലാറ്റ്ഫോമുകളിൽ നിലനിർത്തുന്ന സംവിധാനങ്ങൾ ഉൾപ്പെടെയുള്ള കാര്യങ്ങൾ നിയന്ത്രിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്. രക്ഷിതാക്കൾക്കും വിദ്യാഭ്യാസ സ്ഥാപനങ്ങൾക്കും മാത്രം ഇത്തരം അപകടസാധ്യതകൾ ഫലപ്രദമായി നേരിടാനാകില്ലെന്നും അതിനാൽ നടപ്പാക്കാൻ കഴിയുന്ന ദേശീയതല നിയന്ത്രണ സംവിധാനം വേണമെന്നും ഹർജിക്കാർ വാദിക്കുന്നു.

നിലവിലുള്ള മറ്റൊരു ഹർജിക്കൊപ്പം ഈ ഹർജിയും പരിഗണിക്കാൻ കോടതി തീരുമാനിച്ചു. ഡിസംബർ ഏഴിന് കേസ് വീണ്ടും പരിഗണിക്കും. കുട്ടികളുടെ സാമൂഹികമാധ്യമ ഉപയോഗത്തിന് രാജ്യവ്യാപകമായി പുതിയ നിയന്ത്രണങ്ങൾ വേണമോ എന്ന വിഷയത്തിൽ തുടർനടപടികൾ നിർണായകമാകും.