ന്യൂഡൽഹി: ഫ്രാങ്ക്ഫർട്ടിൽനിന്ന് ഡൽഹിയിലേക്ക് വരികയായിരുന്ന എയർ ഇന്ത്യ വിമാനം സുരക്ഷാ മുന്നറിയിപ്പിനെത്തുടർന്ന് ജയ്പൂരിലേക്ക് തിരിച്ചുവിട്ട സംഭവത്തിൽ സാങ്കേതിക തകരാറുണ്ടായോയെന്ന് പരിശോധിക്കും. ബുധനാഴ്ച നടന്ന സംഭവത്തിൽ 306 പേരാണ് വിമാനത്തിലുണ്ടായിരുന്നത്.
AI2030 വിമാനത്തിന്റെ ട്രാൻസ്‌പോണ്ടറിൽ ഹൈജാക്ക് അല്ലെങ്കിൽ നിയമവിരുദ്ധ ഇടപെടൽ സൂചിപ്പിക്കുന്ന 7500 കോഡ് രേഖപ്പെടുത്തിയതിനെത്തുടർന്നാണ് വ്യോമഗതാഗത നിയന്ത്രണ വിഭാഗം വിമാനം ജയ്പൂരിൽ ഇറക്കാൻ നിർദേശിച്ചത്. ബോയിങ് 787-9 വിമാനം സുരക്ഷിതമായി ജയ്പൂർ വിമാനത്താവളത്തിലെത്തി.
വിമാനവും ജീവനക്കാരെയും സുരക്ഷാ ഏജൻസികൾ വിശദമായി പരിശോധിച്ചു. പരിശോധനയ്ക്കുശേഷം യാത്ര തുടരാൻ അനുമതി ലഭിച്ച വിമാനം പിന്നീട് ഡൽഹിയിലെത്തി. സംഭവത്തെത്തുടർന്ന് യാത്രക്കാർക്ക് മണിക്കൂറുകളോളം വൈകൽ നേരിട്ടു.
വിമാനത്തിന്റെ പൈലറ്റുമാർ മനഃപൂർവം ഹൈജാക്ക് കോഡ് നൽകിയതാണോ അതോ വ്യോമഗതാഗത നിയന്ത്രണ സംവിധാനത്തിലെ സാങ്കേതിക പിഴവാണോ മുന്നറിയിപ്പിന് കാരണമായതെന്ന് ഇതുവരെ വ്യക്തമായിട്ടില്ല. പൈലറ്റുമാർ ഹൈജാക്ക് സംഭവിക്കുന്നില്ലെന്ന് അറിയിച്ചിരുന്നുവെന്നാണ് റിപ്പോർട്ടുകൾ.
സംഭവത്തിൽ വ്യോമഗതാഗത നിയന്ത്രണ സംവിധാനത്തിലെ സാങ്കേതിക പിഴവിന്റെ സാധ്യത ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ പരിശോധിക്കും. വിമാനത്തിന്റെ രേഖകളും നിയന്ത്രണ സംവിധാനത്തിലെ വിവരങ്ങളും പരിശോധിച്ച ശേഷമേ മുന്നറിയിപ്പിന്റെ യഥാർഥ കാരണം വ്യക്തമാകൂ.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.