ന്യൂഡൽഹി: ഡ്രൈവിങ് ലൈസൻസ് നേടുന്നതിനുള്ള നടപടിക്രമങ്ങളിൽ മാറ്റങ്ങൾ നിർദേശിച്ച് കേന്ദ്ര റോഡ് ഗതാഗത, ഹൈവേ മന്ത്രാലയം. ലേണേഴ്‌സ് ലൈസൻസ് പരീക്ഷയുടെ വിജയമാർക്ക് 60 ശതമാനത്തിൽനിന്ന് 75 ശതമാനമായി ഉയർത്തുക, അപേക്ഷകരുടെ ആരോഗ്യവിവരങ്ങൾ കൂടുതൽ വിശദമായി ശേഖരിക്കുക തുടങ്ങിയ നിർദേശങ്ങളാണ് കരട് ഭേദഗതിയിലുള്ളത്. ഇവ അന്തിമമായി വിജ്ഞാപനം ചെയ്ത് പ്രാബല്യത്തിൽ വരുന്നതുവരെ നിർദേശങ്ങളായി മാത്രമേ കണക്കാക്കാനാകൂ.
നിർദേശപ്രകാരം, അപേക്ഷകർ റോഡ് അടയാളങ്ങൾ, ഗതാഗത നിയമങ്ങൾ, അപകടത്തിനുശേഷമുള്ള ഡ്രൈവറുടെ ഉത്തരവാദിത്തങ്ങൾ എന്നിവ ഉൾക്കൊള്ളുന്ന കുറഞ്ഞത് 30 മിനിറ്റ് ദൈർഘ്യമുള്ള ഓൺലൈൻ ട്യൂട്ടോറിയൽ പൂർത്തിയാക്കണം. ട്യൂട്ടോറിയൽ പൂർത്തിയാക്കിയശേഷം ഏഴ് ദിവസത്തിനുള്ളിൽ ലേണേഴ്‌സ് ലൈസൻസ് പരീക്ഷ എഴുതണമെന്നും നിർദേശമുണ്ട്.
മരുന്നുകളോടുള്ള അലർജി, ശരീരത്തിലുള്ള മെഡിക്കൽ അല്ലെങ്കിൽ ശസ്ത്രക്രിയാ ഇംപ്ലാന്റുകൾ തുടങ്ങിയ ആരോഗ്യവിവരങ്ങൾ അപേക്ഷയിൽ വെളിപ്പെടുത്തേണ്ടിവരും. രക്തഗ്രൂപ്പ്, മൊബൈൽ നമ്പർ, അടിയന്തര സാഹചര്യത്തിൽ ബന്ധപ്പെടേണ്ട വ്യക്തിയുടെ വിവരങ്ങൾ എന്നിവയും നിർബന്ധിതമാക്കാനാണ് നിർദേശം.
അപസ്മാരം ഉൾപ്പെടെയുള്ള ആരോഗ്യപ്രശ്നങ്ങളുമായി ബന്ധപ്പെട്ട വിവരങ്ങൾ അപേക്ഷയിൽ പ്രത്യേകം രേഖപ്പെടുത്തണം. കഴിഞ്ഞ മൂന്ന് വർഷത്തിനിടെ അപസ്മാരമോ സീഷറോ ഉണ്ടായിട്ടുണ്ടോ, നിലവിൽ അതിനുള്ള മരുന്ന് കഴിക്കുന്നുണ്ടോ തുടങ്ങിയ കാര്യങ്ങൾ പരിശോധിക്കുന്ന വ്യവസ്ഥകളും കരടിലുണ്ട്. നിർദിഷ്ട സാഹചര്യങ്ങളിൽ മെഡിക്കൽ ക്ലിയറൻസ് ലഭിക്കുന്നതിന് നിയന്ത്രണങ്ങളുണ്ടാകും.
പുതിയ പി.വി.സി. ഡ്രൈവിങ് ലൈസൻസ് കാർഡുകളിൽ ക്യുആർ കോഡ് റീഡ് ചെയ്യാവുന്ന സംവിധാനം കൊണ്ടുവരാനും ആധാർ ഓതന്റിക്കേഷൻ വഴി നടത്തുന്ന ചില ഓൺലൈൻ സേവനങ്ങൾക്ക് ഫീസ് ഒഴിവാക്കാനും നിർദേശമുണ്ട്. കരട് ഭേദഗതികളിൽ പൊതുജനങ്ങൾക്ക് നിർദേശങ്ങളും എതിർപ്പുകളും അറിയിക്കാൻ അനുവദിച്ച സമയപരിധിക്കുശേഷം അന്തിമ നടപടികൾ സ്വീകരിക്കും.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.