പ്രധാനമന്ത്രിമാരുടെ വിദേശയാത്രാ വിമാനരേഖകൾ പുറത്തുവിടേണ്ട; ഡൽഹി ഹൈക്കോടതി

ന്യൂഡൽഹി: പ്രധാനമന്ത്രി നരേന്ദ്ര മോദിയുടെയും മുൻ പ്രധാനമന്ത്രി മൻമോഹൻ സിങ്ങിന്റെയും ഇന്ത്യൻ വ്യോമസേനാ വിമാനങ്ങളിലെ വിദേശയാത്രകളുമായി ബന്ധപ്പെട്ട വിശദമായ രേഖകൾ പുറത്തുവിടാൻ നിർദേശിച്ച കേന്ദ്ര വിവരാവകാശ കമ്മീഷന്റെ ഉത്തരവ് ഡൽഹി ഹൈക്കോടതി റദ്ദാക്കി. രേഖകൾ വെളിപ്പെടുത്തുന്നത് ദേശീയ സുരക്ഷയെയും പ്രധാനമന്ത്രിയുടെ വ്യക്തിഗത സുരക്ഷയെയും ബാധിക്കാമെന്ന വിലയിരുത്തലിന്റെ അടിസ്ഥാനത്തിലാണ് നടപടി.

ജസ്റ്റിസ് അമിത് മഹാജൻ അധ്യക്ഷനായ ബെഞ്ച് ഒക്ടോബർ 15-ന് പുറപ്പെടുവിച്ച ഉത്തരവിലാണ് വ്യോമസേനയുടെ നിലപാട് അംഗീകരിച്ചത്. വിവരാവകാശ നിയമത്തിലെ 8(1)(a), 8(1)(g) വകുപ്പുകൾ പ്രകാരം വിവരങ്ങൾ പുറത്തുവിടുന്നത് ഒഴിവാക്കാൻ വ്യോമസേനയ്ക്ക് സാധിക്കുമെന്ന് കോടതി വ്യക്തമാക്കി.

വിരമിച്ച നാവികസേനാ ഉദ്യോഗസ്ഥൻ കമ്മഡോർ ലോകേഷ് കെ. ബത്ര 2018 ജൂൺ അഞ്ചിന് നൽകിയ വിവരാവകാശ അപേക്ഷയാണ് കേസിന് ആധാരം. 2013 ഏപ്രിൽ ഒന്നു മുതൽ അപേക്ഷ നൽകിയ തീയതി വരെയുള്ള പ്രധാനമന്ത്രിമാരുടെ ഇന്ത്യൻ വ്യോമസേനാ വിമാനങ്ങളിലെ വിദേശയാത്രകളുടെ വിശദാംശങ്ങളാണ് അദ്ദേഹം ആവശ്യപ്പെട്ടത്. വിമാനങ്ങൾ, ജീവനക്കാർ, യാത്രക്കാർ, പ്രധാനമന്ത്രിയുടെ സുരക്ഷാ സംഘത്തിലെ ഉദ്യോഗസ്ഥർ എന്നിവരെക്കുറിച്ചുള്ള വിവരങ്ങൾ ഉൾപ്പെടുന്ന സ്പെഷൽ ഫ്ലൈറ്റ് റിട്ടേൺസ് രേഖകളുടെ പകർപ്പുകളും അപേക്ഷയിൽ ആവശ്യപ്പെട്ടിരുന്നു.

വിവരങ്ങൾ നൽകാൻ വ്യോമസേന വിസമ്മതിച്ചതിനെത്തുടർന്ന് വിഷയം കേന്ദ്ര വിവരാവകാശ കമ്മീഷനിലെത്തി. 2020 ജൂലൈ എട്ടിന് സുരക്ഷാ ഉദ്യോഗസ്ഥരുടെ പേരുകളും തിരിച്ചറിയൽ വിവരങ്ങളും മറച്ചുവെച്ച് ലഭ്യമായ രേഖകൾ നൽകാൻ കമ്മീഷൻ നിർദേശിച്ചു. ഈ ഉത്തരവിനെ ചോദ്യം ചെയ്താണ് വ്യോമസേന ഹൈക്കോടതിയെ സമീപിച്ചത്.

സുരക്ഷാ ഉദ്യോഗസ്ഥരുടെ പേരുകൾ മറച്ചുവെച്ചാലും മറ്റ് വിവരങ്ങൾ പുറത്തുവിടുന്നത് സുരക്ഷാ ക്രമീകരണങ്ങളെക്കുറിച്ച് സൂചനകൾ നൽകാൻ ഇടയാക്കുമെന്ന് കോടതി നിരീക്ഷിച്ചു. പൊതുപണം ചെലവഴിച്ച യാത്രകളാണെന്ന കാര്യം മാത്രം സുരക്ഷയെ ബാധിക്കാവുന്ന വിവരങ്ങൾ പുറത്തുവിടുന്നതിന് മതിയായ കാരണമല്ലെന്നും കോടതി വ്യക്തമാക്കി.

ഇതോടെ രേഖകൾ വെളിപ്പെടുത്താനുള്ള കേന്ദ്ര വിവരാവകാശ കമ്മീഷന്റെ ഉത്തരവ് റദ്ദാക്കിയ ഹൈക്കോടതി, വ്യോമസേനയുടെ ഹർജി അനുവദിച്ചു.