പാലാ - തൊടുപുഴ റോഡിൽ നിയന്ത്രണം വിട്ട കാർ മതിലിടിച്ച് തകർത്ത് വീട്ടുമുറ്റത്തേക്ക് മറിഞ്ഞു;

പാലാ: പാലാ - തൊടുപുഴ റോഡിൽ ഐങ്കൊമ്പിൽ കാർ നിയന്ത്രണം വിട്ട് വീടിന്റെ മതിലിടിച്ച് തകർത്ത് മുറ്റത്തേക്ക് മറിഞ്ഞു.

ഞായറാഴ്ച വൈകിട്ട് അഞ്ചുമണിയോടെയായിരുന്നു അപകടം. കാറിലുണ്ടായിരുന്ന യാത്രക്കാർ പരിക്കുകളൊന്നുമില്ലാതെ അത്ഭുതകരമായി രക്ഷപ്പെട്ടു.

ഐങ്കൊമ്പ് പുത്തൻപുരയിൽ അജിത്തിന്റെ വീടിന്റെ മതിലാണ് കാറിടിച്ച് തകർത്തത്. നിയന്ത്രണം വിട്ട വാഹനം മതിൽ തകർത്ത് വീടിന്റെ മുറ്റത്തേക്ക് തലകീഴായി മറിയുകയായിരുന്നു.

തൊടുപുഴ മുതലക്കോടം സ്വദേശികളാണ് അപകടത്തിൽപ്പെട്ട കാറിലുണ്ടായിരുന്നത്. കോട്ടയം മലരിക്കലിൽ സന്ദർശനം കഴിഞ്ഞ് മടങ്ങുകയായിരുന്നു ഇവർ. വാഹനം ഓടിച്ചിരുന്നയാൾക്ക് ഉണ്ടായ ഉറക്കംതൂക്കലാണ് അപകടത്തിന് കാരണമായതെന്നാണ് പ്രാഥമിക നിഗമനം. അപകടത്തിൽ വീടിന്റെ മതിലിനും കാറിനും സാരമായ കേടുപാടുകൾ സംഭവിച്ചിട്ടുണ്ട്