കോർക്കിലെ പ്രവാസി മലയാളി അമൃത സദാനന്ദന് അയർലൻഡിൽ 'നഴ്‌സ് ഓഫ് ദി ഇയർ' പുരസ്‌കാരം

ഡബ്ലിൻ: കുട്ടികളുടെ സങ്കീർണ്ണ ആരോഗ്യ പരിചരണ രംഗത്തെ മികച്ച സേവനത്തിന് പ്രവാസി മലയാളി അമൃത സദാനന്ദന് അയർലൻഡിൽ അംഗീകാരം. 

ഹോം & കമ്മ്യൂണിറ്റി കെയർ അയർലൻഡ് (HCCI) സിഇഒ ജോസഫ് മസ്‌ഗ്രേവ്, ആർസിഎസ്ഐ (RCSI) പ്രതിനിധി മാർക്ക് വൈറ്റ് എന്നിവരിൽ നിന്ന് അമൃത സദാനന്ദന് (MyHomeCare.ie) വേണ്ടിയുള്ള 'നഴ്‌സ് ഓഫ് ദി ഇയർ' പുരസ്കാരം ജെന്നിഫർ ലാർക്കിൻ ഏറ്റുവാങ്ങി.

ഹോം & കമ്മ്യൂണിറ്റി കെയർ അയർലൻഡ് (HCCI) ഏർപ്പെടുത്തിയ 2026-ലെ ‘നഴ്‌സ് ഓഫ് ദി ഇയർ’ പുരസ്‌കാരത്തിനാണ് കോർക്കിൽ താമസിക്കുന്ന അമൃത അർഹയായത്.

നാസിലെ കില്ലാഷി ഹോട്ടലിൽ (Killashee Hotel, Naas) വെച്ച് നടന്ന എച്ച്.സി.സി.ഐയുടെ വാർഷിക സമ്മേളനത്തിൽ പുരസ്‌കാരം സമ്മാനിച്ചു. രാജ്യത്തിന്റെ വിവിധ ഭാഗങ്ങളിൽ നിന്നായി ഒൻപത് വിഭാഗങ്ങളിലായി ഷോർട്ട്‌ലിസ്റ്റ് ചെയ്യപ്പെട്ട 44 നോമിനേഷനുകളിൽ നിന്നാണ് അമൃതയെ ഈ വർഷത്തെ മികച്ച നഴ്സായി ജൂറി തെരഞ്ഞെടുത്തത്.

2025 ജനുവരി മുതൽ 'MyHomeCare.ie' എന്ന സ്ഥാപനത്തിൽ കുട്ടികളുടെ കോംപ്ലക്സ് കെയർ (Complex Care) വിഭാഗത്തിൽ പ്രവർത്തിച്ചു വരികയാണ് അമൃത. ഗുരുതരമായ ആരോഗ്യപ്രശ്നങ്ങൾ നേരിടുന്ന കുട്ടികൾക്ക് വീടുകളിലെത്തി നൽകുന്ന സുരക്ഷിതമായ നഴ്സിംഗ് പരിചരണവും, ക്ലിനിക്കൽ വൈദഗ്ധ്യവും കുടുംബങ്ങളുമായി പുലർത്തുന്ന മികച്ച ഏകോപനവുമാണ് ഇവരെ പുരസ്‌കാരത്തിന് അർഹയാക്കിയത്.

അയർലൻഡിലെ ആരോഗ്യപരിപാലന മേഖലയിൽ പ്രവാസി മലയാളികളുടെ കർമ്മശേഷിയും പങ്കാളിത്തവും ഒരിക്കൽക്കൂടി അടിവരയിടുന്ന ഈ നേട്ടം അയർലൻഡിലെ മലയാളി സമൂഹത്തിന് ഒന്നടങ്കം അഭിമാനമായി മാറിയിരിക്കുകയാണ്.

2025 ജനുവരിയിലാണ് അമൃത MyHomeCare.ie-യിൽ ചേർന്നത്. തുടർന്ന് കുട്ടികൾക്ക് വീടുകളിൽ പ്രത്യേക നഴ്‌സിംഗ് പരിചരണം നൽകുന്ന 'ചിൽഡ്രൻസ് കോംപ്ലക്സ് കെയർ' വിഭാഗത്തിലെ മികച്ചൊരു അംഗമായി അവർ ചുരുങ്ങിയ കാലം കൊണ്ട് മാറി. അമൃതയുടെ ശാന്തവും കരുണാർദ്രവുമായ സമീപനത്തെയും രോഗികളുടെ കുടുംബങ്ങളോടുള്ള കരുതലിനെയും മികച്ച ക്ലിനിക്കൽ വൈദഗ്ധ്യത്തെയും 2026-ലെ ഹോം & കമ്മ്യൂണിറ്റി കെയർ അയർലൻഡ് (HCCI) അവാർഡ് സംഘാടകർ പ്രശംസിച്ചു.

​രോഗികളോടുള്ള ആത്മാർത്ഥതയിലൂടെയും അർപ്പണബോധത്തിലൂടെയും കുട്ടികളുടെ കുടുംബങ്ങളുടെയും സഹപ്രവർത്തകരുടെയും വിശ്വാസ്യത നേടിയെടുക്കാൻ അവർക്ക് സാധിച്ചു. ഗുരുതരമായ ആരോഗ്യപ്രശ്നങ്ങളുള്ള കുട്ടികൾക്ക് വീടുകളിൽ സുരക്ഷിതവും കൃത്യവുമായ പരിചരണം ഉറപ്പാക്കാൻ അമൃത നൽകിയ സേവനം വലുതാണെന്ന് സംഘാടകർ വ്യക്തമാക്കി.

​അയർലൻഡിലെ ഹോം കെയർ നഴ്‌സുമാർക്ക് മികച്ചൊരു മാതൃകയാണ് അമൃത. എന്നാൽ രാജ്യത്തുടനീളം ഇത്തരത്തിലുള്ള കൂടുതൽ പരിചരണ ജീവനക്കാരുടെ ആവശ്യകതയുണ്ടെന്നാണ് കണക്കുകൾ വ്യക്തമാക്കുന്നത്. ഹോം കെയറിനായുള്ള കാത്തിരിപ്പ് പട്ടിക അതിവേഗം വർദ്ധിക്കുകയാണെന്നും പരിചരണ സേവന ലഭ്യതയിലെ പ്രാദേശിക അസമത്വങ്ങൾ കൂടുകയാണെന്നും എച്ച്.സി.സി.ഐ (HCCI) മുന്നറിയിപ്പ് നൽകുന്നു. 2040-ഓടെ രാജ്യത്ത് ഹോം കെയർ ആവശ്യകതയിൽ 91% വരെ വർദ്ധനവുണ്ടാകുമെന്നാണ് കണക്കാക്കുന്നത്.