ന്യൂഡൽഹി: റിലയൻസ് ചെയർമാൻ മുകേഷ് അംബാനിക്കെതിരെ സമൂഹമാധ്യമങ്ങളിൽ കടുത്ത വിമർശനങ്ങളുമായി രംഗത്തെത്തിയിരുന്ന ടെസ്‌ല, സ്‌പേസ് എക്‌സ് മേധാവി ഇലോൺ മസ്ക് ഒടുവിൽ അനുരഞ്ജന പാതയിലേക്ക്.
അംബാനിയെ പരസ്യമായി ആക്ഷേപിച്ചുകൊണ്ട് സംസാരിച്ചിരുന്ന മസ്ക്, ഇന്ത്യയിലെ നിയമങ്ങളും ചട്ടങ്ങളും പൂർണ്ണമായി അനുസരിച്ച് മാത്രമേ സ്റ്റാർലിങ്ക് രാജ്യത്ത് പ്രവർത്തിക്കൂ എന്ന നിലപാടിലേക്ക് പെട്ടെന്ന് മാറിയത് ആഗോള രാഷ്ട്രീയ–ബിസിനസ് വൃത്തങ്ങളിൽ വലിയ ചർച്ചയായിട്ടുണ്ട്. മസ്കിന്റെ ഈ മലക്കംമറിച്ചിലിന് പിന്നിൽ യുഎസ് സ്റ്റേറ്റ് സെക്രട്ടറി മാർക്കോ റൂബിയോയുടെ നേതൃത്വത്തിലുള്ള ഉന്നതതല സംഘത്തിന്റെ അപ്രതീക്ഷിത ഇന്ത്യാ സന്ദർശനമാണെന്നാണ് വിലയിരുത്തൽ.
ഒക്ടോബർ 22 വരെ നീളുന്ന സന്ദർശനത്തിനായി ഇന്ത്യയിലെത്തിയ യുഎസ് സംഘത്തിന്റെ പ്രധാന ലക്ഷ്യം ഗുജറാത്തിലെ ജാംനഗറിലുള്ള റിലയൻസ് റിഫൈനറി സന്ദർശിക്കലും മുകേഷ് അംബാനിയുമായുള്ള കൂടിക്കാഴ്ചയുമാണ്. അമേരിക്കയിൽ ഇടക്കാല തിരഞ്ഞെടുപ്പ് അടുത്തിരിക്കെ, രാജ്യത്ത് ഡീസൽ വില കുതിച്ചുയരുന്നത് വാഷിംഗ്ടണിന് വലിയ വെല്ലുവിളിയാണ് സൃഷ്ടിക്കുന്നത്. ലോകത്തെ മുൻനിര ക്രൂഡ് ഓയിൽ ഉൽപ്പാദകരായ അമേരിക്കയ്ക്കും റഷ്യയ്ക്കും പോലും ആവശ്യത്തിന് എണ്ണ ശുദ്ധീകരിക്കാനുള്ള (refining) ശേഷിയില്ലെന്നതാണ് നിലവിലെ ആഗോള പ്രതിസന്ധിക്ക് കാരണം. യുദ്ധങ്ങളും ഭൗമരാഷ്ട്രീയ സംഘർഷങ്ങളും മൂലം പല രാജ്യങ്ങളിലെയും റിഫൈനറികൾ പൂട്ടിയതോടെ ഇന്ധനക്ഷാമം രൂക്ഷമായിരിക്കുകയാണ്.
ഈ പ്രതിസന്ധി മറികടക്കാൻ റിലയൻസിന്റെ ജാംനഗർ റിഫൈനറിയെ ആശ്രയിക്കാതെ അമേരിക്കയ്ക്ക് മറ്റ് മാർഗ്ഗങ്ങളില്ല. ലോകത്തിലെ തന്നെ ഏറ്റവും വലിയ സിംഗിൾ സൈറ്റ് റിഫൈനറി കോംപ്ലക്സായ ജാംനഗറിന്, സംസ്കരിക്കാൻ ഏറ്റവും പ്രയാസമുള്ള കട്ടിയേറിയ ക്രൂഡ് ഓയിൽ ഉപയോഗിച്ച് ഉയർന്ന അളവിൽ ഡീസലും ഏവിയേഷൻ ഇന്ധനവും വേർതിരിച്ചെടുക്കാൻ ശേഷിയുണ്ട്. ഇതിനുപുറമെ, കഴിഞ്ഞ 50 വർഷത്തിനിടെ യുഎസിൽ നിർമ്മിക്കുന്ന ഏറ്റവും വലിയ റിഫൈനറി പദ്ധതിയായ ടെക്സസിലെ ബ്രൗൺസ്‌വിൽ പ്രൊജക്റ്റും റിലയൻസിന്റെ പങ്കാളിത്തത്തോടെയാണ് യാഥാർത്ഥ്യമാകുന്നത്.
സ്വന്തം രാജ്യത്തിന്റെ ഊർജ്ജ ആവശ്യങ്ങൾക്കായി അമേരിക്കൻ ഭരണകൂടം തന്നെ അംബാനിയുടെ സഹായം തേടുന്ന സാഹചര്യത്തിലാണ് ഇലോൺ മസ്ക് സ്വരം മാറ്റിയതെന്നാണ് വ്യക്തമാകുന്നത്. ജിയോ പ്ലാറ്റ്‌ഫോംസിന്റെ വരാനിരിക്കുന്ന ഐ.പി.ഒയ്ക്ക് മുന്നോടിയായി അംബാനിയെ പ്രതിരോധത്തിലാക്കാൻ ശ്രമിച്ച മസ്കിന്, ആഗോളതലത്തിൽ റിലയൻസിനുള്ള സ്വാധീനവും യുഎസ് സർക്കാരുമായുള്ള നിർണായക ബന്ധവും തിരിച്ചടിയായതോടെയാണ് ഇന്ത്യയിലെ പ്രവർത്തനങ്ങളിൽ വഴങ്ങേണ്ടി വന്നത്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.