കോട്ടയം: കാഞ്ഞിരപ്പള്ളിയിൽ നടന്ന വിവാഹസദ്യ തട്ടിപ്പിന്റെ പേരിൽ പേരിലെ സാമ്യം മൂലം നിരപരാധിയായ കാറ്ററിംഗ് ഉടമയും കുടുംബവും കടുത്ത പ്രതിസന്ധിയിൽ.
മാഞ്ഞൂർ NSS സ്കൂളിന് സമീപം പ്രവർത്തിക്കുന്ന 'ഉദയം കാറ്ററിംഗ്' ഉടമ രാജേന്ദ്രനാണ് ചെയ്യാത്ത കുറ്റത്തിന് ക്രൂരമായ സൈബർ ആക്രമണങ്ങൾക്കും ബിസിനസ് തകർച്ചയ്ക്കും ഇരയാകുന്നത്.
കഴിഞ്ഞ ഞായറാഴ്ച കാഞ്ഞിരപ്പള്ളി കേന്ദ്രീകരിച്ച് പ്രവർത്തിക്കുന്ന വിഷ്ണു എന്നയാളുടെ ഇവന്റ് മാനേജ്‌മെന്റ് രണ്ട് വിവാഹങ്ങൾക്ക് അഡ്വാൻസ് തുക കൈപ്പറ്റിയ ശേഷം സദ്യ നൽകാതെ മുങ്ങിയിരുന്നു. എന്നാൽ, മാധ്യമങ്ങളിലും സോഷ്യൽ മീഡിയയിലും "കോട്ടയത്തെ ഉദയം കാറ്ററിംഗ് പണം വാങ്ങി സദ്യ നൽകിയില്ല" എന്ന തരത്തിൽ വാർത്തകൾ വന്നതാണ് മാഞ്ഞൂരിലെ സ്ഥാപനത്തിന് വിനയായത്.
25 വർഷത്തെ അധ്വാനം ഒരൊറ്റ ദിവസം കൊണ്ട് വഴിമുട്ടി
1999 മുതൽ കാറ്ററിംഗ് രംഗത്ത് സജീവമായി പ്രവർത്തിക്കുന്ന രാജേന്ദ്രൻ, 2018 മുതലാണ് മാഞ്ഞൂർ കേന്ദ്രീകരിച്ച് 'ഉദയം കാറ്ററിംഗ്' എന്ന പേരിൽ സ്വന്തം സ്ഥാപനം ആരംഭിക്കുന്നത്. എന്നാൽ വാർത്ത തെറ്റായി പ്രചരിച്ചതോടെ അർദ്ധരാത്രിയിൽ പോലും ഫോണിലൂടെയും വാട്സാപ്പിലൂടെയും കടുത്ത തെറിവിളികളും ഭീഷണികളുമാണ് ഇദ്ദേഹത്തിന് നേരിടേണ്ടി വരുന്നത്.
ഇതുകൂടാതെ നവംബർ, ഡിസംബർ, ജനുവരി മാസങ്ങളിലേക്ക് മുൻകൂട്ടി ബുക്ക് ചെയ്തിരുന്ന ഓർഡറുകൾ പലരും റദ്ദാക്കുകയും അഡ്വാൻസ് തുക തിരികെ ചോദിക്കുകയും ചെയ്യുകയാണ്. 14 ഓളം സ്ഥിരം തൊഴിലാളികളാണ് ഈ അടുക്കളയെ ആശ്രയിച്ച് ജീവിക്കുന്നത്. സ്ഥാപനം പെട്ടെന്ന് പ്രതിസന്ധിയിലായതോടെ ഈ കുടുംബങ്ങളുടെ ഉപജീവനവും വഴിമുട്ടിയിരിക്കുകയാണ്.
കണ്ണീരോടെ രാജേന്ദ്രൻ; തുണയാകാൻ പൊതുസമൂഹം
തന്റെ ഭാര്യ ഗുരുതരമായ ആരോഗ്യപ്രശ്നങ്ങൾ കാരണം ഡയാലിസിസിന് വിധേയയായിക്കൊണ്ടിരിക്കുകയാണെന്നും, ജീവിതകാലം മുഴുവൻ കഷ്ടപ്പെട്ട് ഉണ്ടാക്കിയ സൽപ്പേര് ഒറ്റ നിമിഷം കൊണ്ടാണ് ഇല്ലാതായതെന്നും പൊട്ടിക്കരഞ്ഞുകൊണ്ട് രാജേന്ദ്രൻ പറയുന്നു. തട്ടിപ്പ് നടത്തിയ കാഞ്ഞിരപ്പള്ളിയിലെ സ്ഥാപനവുമായി തങ്ങൾക്ക് യാതൊരു ബന്ധവുമില്ലെന്ന് ഇദ്ദേഹം ആവർത്തിച്ച് വ്യക്തമാക്കുന്നു.
ഇവന്റ് മാനേജ്‌മെന്റുകൾക്ക് ഓർഡർ നൽകുമ്പോൾ സ്ഥാപനത്തിന്റെ മേൽവിലാസവും ലൈസൻസും കൃത്യമായി പരിശോധിക്കാൻ ഉപഭോക്താക്കൾ തയ്യാറാകണമെന്നും, പേരിലെ സാമ്യം വെച്ച് നിരപരാധികളെ വഴിയിൽ അപമാനിക്കരുതെന്നും നാട്ടുകാർ ആവശ്യപ്പെടുന്നു. സമൂഹമാധ്യമങ്ങളിലൂടെ പ്രചരിച്ച തെറ്റായ വാർത്ത തിരുത്താനും, പാവപ്പെട്ട തൊഴിലാളികൾക്ക് താങ്ങായ ഈ സ്ഥാപനത്തെ ചേർത്തുപിടിക്കാനും പൊതുസമൂഹം മുന്നോട്ടുവരണമെന്നാണ് നാട്ടുകാരുടെയും കുടുംബത്തിന്റെയും അഭ്യർത്ഥന.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.