കൊച്ചി: എറണാകുളത്തിനും അങ്കമാലിക്കുമിടെ ട്രെയിനുകളില്‍ സ്ത്രീ യാത്രക്കാരെ കൊള്ളയടിച്ച മൂന്നു പ്രതികളെ റെയില്‍വേ പൊലീസ് അറസ്റ്റ് ചെയ്തു.
തിരുവനന്തപുരം- മംഗളൂരു സെൻട്രല്‍ എക്സ്‌പ്രസ്, എറണാകുളം -കാരയ്ക്കല്‍ എക്സ്‌പ്രസ് ട്രെയിനുകളിലെ റിസർവേഷൻ കോച്ചില്‍ ഉറങ്ങിക്കിടന്ന യാത്രക്കാരികളുടെ പണവും ആഭരണങ്ങളുമടങ്ങുന്ന ബാഗുകള്‍ തട്ടിയെടുത്ത അസാം നാഗോണ്‍ സ്വദേശികളായ സെയ്ദുള്‍ ഹഖ് (22), മുർഷിദ് ഇസ്ലാം (22), ഓഖ-എറണാകുളം എക്സ്‌പ്രസില്‍ ജനറല്‍ കോച്ചിലെ യാത്രക്കാരിയുടെ പണവും ഇലക്‌ട്രോണിക്സ് ഉപകരണങ്ങളും കവർന്ന അസാം നാഗോണ്‍ സ്വദേശി റസാഖ് അലി (42) എന്നിവരാണ് വീണ്ടും കവർച്ചയ്‌ക്ക് തയ്യാറെടുക്കവെ പിടിയിലായത്.
ഹോട്ടല്‍ തൊഴിലാളികളായിരുന്ന സെയ്ദുള്‍ ഹഖും മുർഷിദ് ഇസ്ലാമും പെരുമ്പാവൂരില്‍ ഒരുമിച്ചാണ് താമസം. നിർമ്മാണ തൊഴിലാളിയായ റസാഖ് അലിയും പെരുമ്പാവൂരിലാണ് തങ്ങുന്നതെങ്കിലും മറ്റു രണ്ടു പേരുമായി ബന്ധമുണ്ടെന്ന സൂചനയില്ല. ട്രെയിൻ നീങ്ങിത്തുടങ്ങുമ്പോള്‍ ബാഗുകള്‍ തട്ടിയെടുത്ത് കടക്കുന്നതാണ് പ്രതികളുടെ രീതി.
30ന് പുലർച്ചെ മംഗലാപുരം എക്സ്‌പ്രസ് അങ്കമാലി സ്റ്റേഷനില്‍ എത്തിയപ്പോഴാണ് രണ്ട് യാത്രക്കാരികളുടെ 6 പവൻ ആഭരണങ്ങളും ഒരു ലക്ഷം രൂപയുടെ മൊബൈല്‍ ഫോണുകളും ആഡംബര വാച്ചുകളുമടങ്ങിയ ബാഗുകളുമായി സെയ്ദുളും മുർഷിദും കടന്നത്. 28 ന് രാത്രി എറണാകുളത്ത് നിന്ന് നാഗപട്ടണത്തേക്ക് പോയ കാരയ്ക്കല്‍ എക്സ്‌പ്രസിലെ യാത്രക്കാരിയുടെ 40000 രൂപയും ഫോണും ട്രെയിൻ ആലുവ വിട്ട നേരം തട്ടിയെടുത്തതും ഇവരാണ്. 31ന് പുലർച്ചെ ഓഖ എക്സ്‌പ്രസ് ആലുവയില്‍ എത്തിയപ്പോഴാണ് യാത്രക്കാരിയുടെ 3000 രൂപയും ഇലക്‌ട്രോണിക്സ് ഉപകരണങ്ങളും റസാഖ് അലി എമർജൻസി ജനാലയിലൂടെ കൈയിട്ട് കവർ‌ന്നത്.
മയക്കുമരുന്ന് കച്ചവടത്തിന്പണം കണ്ടെത്താൻ കവർച്ച
കൊച്ചി: കവർച്ചയില്‍ നിന്നുള്ള പണം ഉപയോഗിച്ച്‌ അസാമില്‍ നിന്ന് കേരളത്തിലേക്ക് വൻതോതില്‍ കഞ്ചാവും ഹെറോയിനും കടത്താൻ പ്രതികള്‍ ലക്ഷ്യമിട്ടെന്ന് റെയില്‍വേ ഡിവൈ.എസ്.പി ജോർജ് ജോസഫ് പറഞ്ഞു. കവർന്ന സ്വർണം പലയിടത്തായി ഒളിപ്പിച്ചിരുന്നു. കാണിക്ക വഞ്ചി കവർന്നതിന് ആലങ്ങാട് പൊലീസിന്റെ പിടിയിലായിട്ടുള്ള സെയ്ദുള്‍ ഹഖ് ജയില്‍ ശിക്ഷ അനുഭവിച്ചിട്ടുണ്ട്. സി.സി ടിവി ക്യാമറകള്‍ കേന്ദ്രീകരിച്ചുള്ള പരിശോധനയിലാണ് പ്രതികളെ കണ്ടെത്തിയത്.
എറണാകുളം റെയില്‍വേ സി.ഐ ബാലൻ, എസ്.എച്ച്‌.ഒ എ. നിസാറുദ്ദീൻ, സൗത്ത് ആർ.പി.എഫ് സി.ഐ ബിനോയ് ആന്റണി, ആലുവ ആർ.പി.എഫ് സി.ഐ വേണു എന്നിവർ അന്വേഷണത്തിന് നേതൃത്വം നല്‍കി.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.