യൂറോപ്യൻ വിമാനത്താവളങ്ങളിൽ കടുത്ത യാത്രാദുരിതവുമായി ഐറിഷ് പൗരന്മാർ

യൂറോപ്യൻ യൂണിയന്റെ (EU) പുതിയ എൻട്രി/എക്സിറ്റ് സിസ്റ്റം (EES) പൂർണ്ണമായി നടപ്പിലാക്കിയതിനെത്തുടർന്ന് യൂറോപ്യൻ വിമാനത്താവളങ്ങളിൽ ഐറിഷ് പൗരന്മാർ മണിക്കൂറുകളോളം നീളുന്ന കടുത്ത ക്യൂവിലാണ്. 

യൂറോപ്യൻ യൂണിയൻ പൗരന്മാരായതിനാൽ ഐറിഷ് പാസ്‌പോർട്ട് കൈവശമുള്ളവർക്ക് ഈ പുതിയ ബയോമെട്രിക് പരിശോധനകൾ നിയമപരമായി ബാധകമല്ലെങ്കിലും, വിമാനത്താവളങ്ങളിലെ അടിസ്ഥാന സൗകര്യങ്ങളുടെ പോരായ്മ കാരണം ഇതര രാജ്യങ്ങളിലെ യാത്രക്കാർക്കൊപ്പം ഇവരും വലിയ തിരക്കിൽ കുടുങ്ങുകയാണ്. 

എന്താണ് ഈ പ്രതിസന്ധിക്ക് കാരണം?

നോൺ-ഇയു (Non-EU) രാജ്യങ്ങളിൽ നിന്നുള്ള പൗരന്മാർ, ബ്രിട്ടൻ, അമേരിക്ക ഉള്‍പ്പെട്ട മറ്റ്‌ രാജ്യങ്ങളില്‍ നിന്നുള്ള യാത്രക്കാർ ഷെങ്കൻ മേഖലയിൽ ആദ്യമായി പ്രവേശിക്കുമ്പോൾ അവരുടെ വിരലടയാളവും മുഖവും സ്കാൻ ചെയ്ത് രജിസ്റ്റർ ചെയ്യണമെന്നത് പുതിയ നിയമം വഴി നിർബന്ധമാക്കിയിട്ടുണ്ട്. എന്നാൽ കഴിഞ്ഞ കുറച്ചു മാസങ്ങളായി വിമാനത്താവളങ്ങളിൽ തിരക്ക് വർദ്ധിക്കുമ്പോൾ ഈ നിയമത്തിൽ താൽക്കാലിക ഇളവുകൾ നൽകാൻ അതിർത്തി ഉദ്യോഗസ്ഥർക്ക് അനുവാദമുണ്ടായിരുന്നു. തിരക്ക് കൂടുമ്പോൾ ബയോമെട്രിക് മെഷീനുകൾ ഒഴിവാക്കി പാസ്‌പോർട്ടിൽ മാനുവലായി സ്റ്റാമ്പ് ചെയ്യാൻ അവർക്ക് കഴിഞ്ഞിരുന്നു. 

എന്നാൽ ഈ താൽക്കാലിക ഇളവുകളുടെ കാലാവധി 6 സെപ്റ്റംബർ, 2026-ഓടെ അവസാനിച്ചു. ഇതോടെ തിരക്ക് എത്ര കൂടിയാലും ഓരോ നോൺ-ഇയു യാത്രക്കാരന്റെയും ബയോമെട്രിക് വിവരങ്ങൾ വിമാനത്താവളങ്ങളിലെ കിയോസ്കുകൾ വഴി കൃത്യമായി രേഖപ്പെടുത്തണമെന്ന് നിയമം വന്നു. പല വിമാനത്താവളങ്ങളിലും മെഷീനുകളുടെ തകരാറും ജീവനക്കാരുടെ കുറവും കാരണം ഒരു യാത്രക്കാരനെ പരിശോധിക്കാൻ വലിയ സമയമെടുക്കുന്നു. ഇതാണ് മണിക്കൂറുകളോളം നീളുന്ന ക്യൂവിലേക്ക് വഴിമാറിയത്. 

ഐറിഷ് യാത്രക്കാരെ ബാധിക്കുന്നത് എങ്ങനെ?

അയർലൻഡ് ഷെങ്കൻ മേഖലയുടെ ഭാഗമല്ലാത്തതിനാൽ, ഐറിഷ് പൗരന്മാർ യൂറോപ്പിലെ മറ്റ് രാജ്യങ്ങളിലേക്ക് പോകുമ്പോൾ പാസ്‌പോർട്ട് നിയന്ത്രണങ്ങളിലൂടെ കടന്നുപോകേണ്ടതുണ്ട്. പല യൂറോപ്യൻ വിമാനത്താവളങ്ങളിലും ഇയു (EU) പൗരന്മാർക്കും നോൺ-ഇയു പൗരന്മാർക്കും പ്രത്യേകം ക്യൂ തിരിക്കാത്തതാണ് ഐറിഷ് പൗരന്മാർക്ക് വിനയായത്. ഫലമായി, നിയമത്തിൽ നിന്ന് ഒഴിവാക്കപ്പെട്ടിട്ടും മണിക്കൂറുകളോളം യുകെ, യുഎസ് യാത്രക്കാർക്കൊപ്പം ഐറിഷ് പൗരന്മാരും വരി നിൽക്കേണ്ടി വരുന്നു. 

സ്പെയിനിലെ മലാഗ, അലികാന്റെ, പോർച്ചുഗലിലെ ലിസ്ബൺ, ഇറ്റലിയിലെ മിലാൻ, റോം തുടങ്ങിയ പ്രധാന വിനോദസഞ്ചാര കേന്ദ്രങ്ങളിലെ വിമാനത്താവളങ്ങളിൽ രണ്ട് മുതൽ ആറ് മണിക്കൂർ വരെയാണ് നിലവിലെ കാത്തിരിപ്പ് സമയം. യാത്രാമേഖലയിലെ പ്രമുഖ സംഘടനകളും എയർലൈൻ കമ്പനികളും ഈ സംവിധാനത്തെ കടുത്ത ഭാഷയിലാണ് വിമർശിക്കുന്നത്. 

എയർലൈനുകളുടെ പുതിയ ക്രമീകരണങ്ങൾ

നിലവിലെ അതിർത്തി പ്രതിസന്ധി കണക്കിലെടുത്ത് വിമാന കമ്പനികൾ തങ്ങളുടെ യാത്രാ നിയമങ്ങളിൽ മാറ്റം വരുത്താൻ നിർബന്ധിതരായിട്ടുണ്ട്. പ്രമുഖ ഐറിഷ് എയർലൈനായ റയാൻഎയർ (Ryanair) തങ്ങളുടെ എയർപോർട്ട് ചെക്ക്-ഇൻ, ബാക്ക് ഡ്രോപ്പ് സമയപരിധി നിലവിലെ 40 മിനിറ്റിൽ നിന്നും 60 മിനിറ്റായി വർദ്ധിപ്പിച്ചിട്ടുണ്ട്. സുരക്ഷാ പരിശോധനകളും പാസ്‌പോർട്ട് ക്യൂവും കാരണം യാത്രക്കാർക്ക് വിമാനം നഷ്ടപ്പെടുന്നത് ഒഴിവാക്കാനാണ് ഈ മുൻകരുതൽ. ഇതോടൊപ്പം കിയോസ്കുകളിലെ തകരാറുകൾ പരിഹരിക്കാൻ ഈ നിയമത്തിൽ കുറച്ചുകൂടി ഇളവുകൾ നൽകണമെന്ന് റയാൻഎയർ യൂറോപ്യൻ യൂണിയനോട് ആവശ്യപ്പെട്ടിട്ടുമുണ്ട്. 

യാത്രക്കാർ ശ്രദ്ധിക്കേണ്ട കാര്യങ്ങൾ

• യൂറോപ്യൻ വിമാനത്താവളങ്ങളിൽ എത്തുമ്പോൾ 'EU/EEA/CH' യാത്രക്കാർക്കായുള്ള പ്രത്യേക അതിവേഗ പാതകൾ (Fast Tracks) ശ്രദ്ധിക്കുക.
• സുരക്ഷാ ജീവനക്കാർ അറിയാതെ നിങ്ങളെ നോൺ-ഇയു ബയോമെട്രിക് ക്യൂവിലേക്ക് തിരിച്ചുവിട്ടാൽ, നിങ്ങളുടെ കൈവശമുള്ളത് ഐറിഷ് ഇയു പാസ്‌പോർട്ട് ആണെന്ന കാര്യം അവരെ ബോധ്യപ്പെടുത്തി പ്രത്യേക വഴിയിലൂടെ മാറാൻ ശ്രമിക്കുക.