ന്യൂഡൽഹി: 76ന്റെ നിറവില് പ്രധാനമന്ത്രി നരേന്ദ്രമോദി. രാജ്യത്തെ ഏറ്റവും ജനപ്രിയ നേതാവായി തുടരുന്ന മോദി പാർട്ടിയിലെയും സർക്കാരിലെയും ആധിപത്യം നിലനിർത്തുകയാണ് ഇന്നും.
പതിനേഴാം വയസില് ആർഎസ്എസിലൂടെ തുടങ്ങിയ പൊതുപ്രവർത്തനമാണ്. 1987ല് മുപ്പത്തിയേഴാം വയസില് ഗുജറാത്ത് ബിജെപി ജനറല് സെക്രട്ടറിയായി. 2001ല് മുഖ്യമന്ത്രിയായി. ഗുജറാത്ത് കലാപത്തിനു ശേഷമുള്ള വിവാദങ്ങളും നിയമനടപടികളും നേരിട്ട് 2014 മുതല് ഇന്ത്യയുടെ പ്രധാനമന്ത്രി പദത്തിലുമെത്തി. ഇന്ന് ലോകത്തെ കരുത്തരായ നേതാക്കളില് ഒരാളായി മോദി മാറി കഴിഞ്ഞു.
സംഘപരിവാർ സ്വപ്നം കണ്ട പല ലക്ഷ്യങ്ങളും മോദി ഭരണത്തിലാണ് യാഥാർത്ഥ്യമായത്. അയോധ്യ രാമക്ഷേത്രം, ജമ്മു കാശ്മീരിന്റെ പ്രത്യേക പദവി റദ്ദാക്കല്, വഖഫ് നിയമ ഭേദഗതി എന്നിവ നടപ്പിലാക്കി. ഏകീകൃത സിവില്കോഡ് സംസ്ഥാനങ്ങളില് നടപ്പാക്കാൻ നടപടിയും തുടങ്ങി.
റിട്ടയർമെന്റ് ചർച്ചകള് മറികടന്ന് നരേന്ദ്രമോദി പാർട്ടിയിലും സർക്കാറിലും സമ്പൂർണ ആധിപത്യം നേടുന്നതാണ് കഴിഞ്ഞ ഒരു വർഷം ദേശീയ രാഷ്ട്രീയം കണ്ടത്. ലോക്സഭാ തെരഞ്ഞെടുപ്പിലെ കനത്ത തിരിച്ചടിയോടെ മോദി യുഗം അവസാനിച്ചെന്ന പ്രവചനങ്ങള് തുടർച്ചയായ നിയമസഭാ തെരഞ്ഞെടുപ്പ് വിജയങ്ങളിലൂടെ മോദി അസ്ഥാനത്താക്കി.
ഈ വർഷം പശ്ചിമ ബംഗാളിലും ഒറ്റയ്ക്ക് നയിച്ച് നേടിയ ഉജ്ജ്വല വിജയത്തിലൂടെ മോദി വീണ്ടും കരുത്തുകാട്ടി. പാർട്ടിയിലും സർക്കാറിലും സർവ്വാധിപത്യം ഉറപ്പിച്ചു. പിന്നാലെ കടുത്ത മോദി വിമർശകരായ പ്രതിപക്ഷ നേതാക്കള്പോലും ഒറ്റരാത്രികൊണ്ട് എൻഡിഎ പാളയത്തിലേക്ക് ചാടുന്ന നാടകങ്ങള്ക്കും ഇന്ത്യൻ ജനാധിപത്യം സാക്ഷിയായി.
എന്നാല് കേവലം ഒരുമാസം കൊണ്ട് യുവാക്കളുടെ തിളച്ചുമറിഞ്ഞ രോഷം ദേശീയ രാഷ്ട്രീയം മാറ്റിമറിച്ചു. ബ്രിക്സ് ഉച്ചകോടിയിലടക്കം മോദിയുടെ നേതൃത്ത്വത്തെ ലോകനേതാക്കള് പുകഴ്ത്തുമ്പോഴും ജന്തർ മന്തർ സമരത്തിന്റെ അലയൊലികള് രാജ്യമെമ്പാടും അടങ്ങിയിട്ടില്ല.
ഉത്തർ പ്രദേശും സ്വന്തം ഗുജറാത്തും അടക്കം 7 സംസ്ഥാനങ്ങളില് അടുത്ത വർഷം തെരഞ്ഞെടുപ്പ് നടക്കാനിരിക്കെ മോദി നേരിടുന്ന ഏറ്റവും വലിയ വെല്ലുവിളി ഈ യുവരോഷം മറികടക്കുക എന്നത് തന്നെയാണ്. ജന്മദിനാഘോഷങ്ങളോടൊപ്പം മുഖ്യമന്ത്രിയായും പ്രധാനമന്ത്രിയായും തുടർച്ചയായി 25 വർഷം മോദി പൂർത്തിയാകുന്നതും ബിജെപി ഒരു മാസം നീളുന്ന പരിപാടികളോടെ ആഘോഷിക്കുകയാണ്.
ഇന്ന് രാജ്യമെമ്പാടും വൈകീട്ട് 6 മണിമുതല് ദീപങ്ങള് തെളിക്കാൻ ബിജെപി ആഹ്വാനം ചെയ്തിട്ടുണ്ട്. എൻഡിഎ നേതാക്കളെല്ലാം ഇന്ന് മോദിക്കൊപ്പം വാരാണസിയിലെ പരിപാടിയില് പങ്കെടുക്കും. വഴങ്ങേണ്ടിടത്ത് വഴങ്ങിയും വേണ്ടിടത്ത് കരുത്തുകാട്ടിയും തന്ത്രങ്ങള് പയറ്റുന്നതാണ് മോദി ശൈലി.
ആ മോദിക്ക് ജെൻസികള് ഉയർത്തിയ ചോദ്യങ്ങള്ക്ക് ഉത്തരം നല്കി കളം തിരിച്ചുപിടിക്കാനാകുമോ എന്നതാണ് ചോദ്യം. 2029 ലെ ലോക്സഭാ തെരഞ്ഞെടുപ്പിലേക്ക് മോദിക്ക് പകരം വയ്ക്കാൻ ആരെന്ന് ഇപ്പോഴും ബിജെപിയില് ചർച്ചകള് ഉയർന്നിട്ടില്ല.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.