മരണത്തിലും വേർപിരിയാതെ ദമ്പതികൾ: കിടപ്പു രോഗിയായ ഭാര്യയെ പരിശോധിച്ചു ഡോക്ടര്‍ മടങ്ങവേ ഭര്‍ത്താവ് കുഴഞ്ഞുവീണു മരിച്ചു; പിന്നാലെ ഭാര്യയും,

കൊച്ചി:  മണിക്കൂറുകളുടെ വ്യത്യാസത്തില്‍ ദമ്പതികള്‍ മരിച്ചു. ഇളമ്പകപ്പിള്ളി തറനിലം പുരുഷോത്തമൻ (73), ഭാര്യ ഇടവൂർ കളപ്പുരയ്ക്കല്‍ ലതാ പുരുഷോത്തമൻ (67) എന്നിവരാണ് മരണപ്പെട്ടത്.

കിടപ്പുരോഗിയായ ലതയെ ഡോക്ടർ വീട്ടിലെത്തി പരിശോധിച്ചു മടങ്ങുന്നതിനിടെ ഭർത്താവ് പുരുഷോത്തമൻ കുഴഞ്ഞുവീഴുകയായിരുന്നു. ഉടൻ ആശുപത്രിയിലെത്തിക്കാൻ ശ്രമിച്ചെങ്കിലും വഴിമധ്യേ മരണം സംഭവിക്കുകയായിരുന്നു. തുടർന്ന് പുരുഷോത്തമന്റെ സംസ്കാരം ശനിയാഴ്ച രാവിലെ 10 മണിക്ക് നടത്താൻ തീരുമാനിച്ചിരിക്കെ, അന്ന് രാത്രി 11 മണിയോടെ ഭാര്യ ലതയും മരണത്തിന് കീഴടങ്ങി. 

ജിഷ്ണു, അതുല്‍ വിഷ്ണു എന്നിവരാണ് മക്കള്‍. മരുമക്കള്‍: ഗീതു, ശ്രീലക്ഷ്മി. ഇരുവരുടെയും വേർപാടിന്റെ ദുഃഖത്തില്‍ ഒക്കല്‍ എസ്.എൻ.ഡി.പി. ശാന്തി നിലയത്തില്‍ ദമ്പതികളുടെ സംസ്കാര ചടങ്ങുകള്‍ നടന്നു.