മനാമ: ഓണാഘോഷത്തോടനുബന്ധിച്ച് ബഹ്റൈൻ കേരളീയ സമാജം (BKS) വനിതാവേദി അവതരിപ്പിച്ച പരമ്പരാഗത കലാരൂപമായ 'ചരടുപിന്നിക്കളി'ക്കെതിരെ സമൂഹമാധ്യമങ്ങളിൽ നടക്കുന്ന പ്രചാരണങ്ങൾ വാസ്തവവിരുദ്ധവും നിർഭാഗ്യകരവുമാണെന്ന് സമാജം ഭാരവാഹികൾ വ്യക്തമാക്കി. പരിപാടിയുടെ പൂർണരൂപം കാണാതെ, ചില ഭാഗങ്ങളുടെ ഫോട്ടോകളും വിഡിയോകളും മാത്രം കണ്ട് വിമർശനം ഉന്നയിക്കുന്നത് അടിസ്ഥാനരഹിതമാണെന്ന് വാർത്താക്കുറിപ്പിൽ അറിയിച്ചു.
കേരളത്തിൽ അന്യംനിന്നുപോകുന്ന തനത് കലാരൂപങ്ങളെ പുനരുജ്ജീവിപ്പിക്കാനുള്ള ശ്രമത്തിന്റെ ഭാഗമായാണ് സെപ്റ്റംബർ 18-ന് ഈ പരിപാടി വേദിയിലെത്തിച്ചത്. പാട്ടിനും താളച്ചുവടുകൾക്കുമൊപ്പം ചരടുകൾ പിന്നി രൂപങ്ങൾ തീർക്കുകയും പിന്നീട് അഴിച്ചെടുക്കുകയും ചെയ്യുന്നതാണ് ഇതിന്റെ പരമ്പരാഗത ശൈലി. ഇതിന്റെ ഭാഗമായി കുട്ടികൾ മുതിർന്നവരുടെ (ഭൂരിഭാഗവും സ്വന്തം പിതാക്കളുടെ) ചുമലിൽ നിൽക്കുകയും റോപ്പിൽ പിടിച്ച് കവചം തീർക്കുകയും ചെയ്യുന്നത് കലാരൂപത്തിന്റെ സാമ്പ്രദായിക രീതിയാണ്.
കുട്ടികളുടെ സുരക്ഷ ഉറപ്പുവരുത്തിയ ശേഷമാണ് പരിപാടി അവതരിപ്പിച്ചതെന്ന് സമാജം വ്യക്തമാക്കി:
- പരിശീലനവും സുരക്ഷയും: രണ്ടു മാസത്തോളം നീണ്ട പരിശീലനത്തിന് ശേഷമാണ് ഇത് വേദിയിലെത്തിച്ചത്. പരിശീലന ഘട്ടത്തിൽ തന്നെ കുട്ടികൾക്ക് ശാരീരിക ബുദ്ധിമുട്ടുകൾ ഇല്ലെന്ന് ഭാരവാഹികൾ നേരിട്ട് കണ്ട് ഉറപ്പുവരുത്തിയിരുന്നു.
- മാതാപിതാക്കളുടെ പങ്കാളിത്തം: അമ്മമാരുടെ കൂട്ടായ്മയായ വനിതാവേദിയുടെ നേതൃത്വത്തിൽ നടന്ന പരിപാടിയിൽ കുട്ടികളും അവരുടെ മാതാപിതാക്കളും പൂർണ മനസ്സോടെയാണ് പങ്കെടുത്തത്. കാണികളിൽനിന്ന് മികച്ച പ്രതികരണമാണ് ലഭിച്ചത്.
- പഴയകാല ചരിത്രം: ഇത് ആദ്യമായല്ല ഈ കലാരൂപം ഇവിടെ അവതരിപ്പിക്കുന്നത്. മുമ്പും സ്വദേശികളുടെയും വിദേശികളുടെയും സാന്നിധ്യത്തിൽ വിജയകരമായി അവതരിപ്പിച്ചിട്ടുണ്ട്.
ചെറിയ കുട്ടികൾ പങ്കെടുക്കുന്ന അപകടകരമായ അക്രോബാറ്റിക്, എയറോബിക് പ്രകടനങ്ങളെ കയ്യടിച്ചു പ്രോത്സാഹിപ്പിക്കുന്നവർ, കേരളത്തിന്റെ പാരമ്പര്യ കലാരൂപങ്ങളെ എഡിറ്റ് ചെയ്ത ചെറിയ വീഡിയോ ക്ലിപ്പുകൾ വെച്ച് വിമർശിക്കുന്നത് ഇരട്ടത്താപ്പാണെന്നും ഭാരവാഹികൾ ചൂണ്ടിക്കാട്ടി. സമാജത്തിന്റെ ബാലകലോത്സവങ്ങളിൽ പോലും അപകടകരമായ അഭ്യാസങ്ങൾ ഒഴിവാക്കാൻ നടപടിയെടുത്ത ഭരണസമിതിയാണിത്.
പ്രവാസികളുടെ മാനസികോല്ലാസത്തിനും നാടിന്റെ സാംസ്കാരിക പൈതൃകം നിലനിർത്തുന്നതിനുമായാണ് ഇത്തരം പരിപാടികൾ സംഘടിപ്പിക്കുന്നത്. എന്നാൽ സമൂഹമാധ്യമങ്ങളിലെ പ്രചാരണങ്ങളെ ഗൗരവത്തോടെ കാണുന്നുവെന്നും കുട്ടികളുടെയും വനിതകളുടെയും സുരക്ഷയ്ക്കും ക്ഷേമത്തിനുമാണ് സമാജം എപ്പോഴും പ്രഥമ പരിഗണന നൽകുന്നതെന്നും ഭാരവാഹികൾ കൂട്ടിച്ചേർത്തു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.