മുണ്ടക്കയം പെരുവന്താനത്ത് വൻ ഉരുൾപൊട്ടൽ:റോഡ് തകർന്നു, ഗതാഗതം പൂർണ്ണമായി തടസ്സപ്പെട്ടു

പെരുവന്താനം: പെരുവന്താനം പുല്ലുപാറയ്ക്ക് സമീപം കനത്ത മലവെള്ളപ്പാച്ചിലിൽ വൻ ഉരുൾപൊട്ടൽ. ഉരുൾപൊട്ടലിന്റെ ആഘാതത്തിൽ റോഡിന്റെ ഒരു ഭാഗം പൂർണ്ണമായും തകർന്നു.

മലവെള്ളപ്പാച്ചിലിനൊപ്പം കൂറ്റൻ പാറകളും വൻതോതിൽ മണ്ണും റോഡിലേക്ക് പതിച്ചതോടെ ഇതുവഴിയുള്ള ഗതാഗതം പൂർണ്ണമായി തടസ്സപ്പെട്ടിരിക്കുകയാണ്.

​പ്രദേശത്ത് കനത്ത മഴ തുടരുന്നതിനിടെയാണ് നാടിനെ നടുക്കിയ ഉരുൾപൊട്ടലുണ്ടായത്. റോഡിലേക്ക് ഭീമൻ പാറകളും മണ്ണും വെന്നടിഞ്ഞത് ഗതാഗതം പുനഃസ്ഥാപിക്കുന്നതിന് വൻ തടസ്സം സൃഷ്ടിക്കുന്നുണ്ട്. കൂടുതൽ മണ്ണിടിച്ചിൽ സാധ്യത നിലനിൽക്കുന്നതിനാൽ ഇവിടുത്തെ യാത്രാ തടസ്സം പ്രദേശവാസികളെയും ദീർഘദൂര യാത്രക്കാരെയും ഒരുപോലെ വലച്ചു.

​വിവരമറിഞ്ഞ് പോലീസും ഫയർഫോഴ്സും ജനപ്രതിനിധികളും പ്രദേശത്തെത്തി രക്ഷാപ്രവർത്തനങ്ങൾക്കും ഗതാഗത ക്രമീകരണങ്ങൾക്കും നേതൃത്വം നൽകി വരുന്നു. റോഡിലെ മണ്ണും പാറക്കൂട്ടങ്ങളും നീക്കം ചെയ്ത് ഗതാഗതം പുനഃസ്ഥാപിക്കാനുള്ള ശ്രമങ്ങൾ അടിയന്തരമായി ആരംഭിച്ചിട്ടുണ്ട്. ദുരന്തസാധ്യത കണക്കിലെടുത്ത് മലയോര മേഖലകളിലൂടെയുള്ള യാത്രയിൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.