അയർലൻഡിൽ താമസിക്കുന്ന മലയാളി പ്രവാസികൾ ഉൾപ്പെടെയുള്ള നോൺ-ഇഇഎ (Non-EEA) പൗരന്മാർക്ക് ആശ്വാസ വാർത്ത

ഡബ്ലിൻ :അയർലൻഡിൽ താമസിക്കുന്ന മലയാളി പ്രവാസികൾ ഉൾപ്പെടെയുള്ള നോൺ-ഇഇഎ (Non-EEA) പൗരന്മാർക്ക് വലിയ ആശ്വാസം നൽകിക്കൊണ്ട് ഇമിഗ്രേഷൻ സർവീസ് ഡെലിവറി (ISD) പുതിയ പ്രവർത്തന മാർഗ്ഗനിർദ്ദേശങ്ങൾ പുറപ്പെടുവിച്ചു.

നിലവിൽ ഓൺലൈൻ വഴി ഐറിഷ് റെസിഡൻസ് പെർമിറ്റ് (IRP) പുതുക്കുന്നതിലുണ്ടാകുന്ന കാലതാമസം അപേക്ഷകരിൽ വലിയ ആശങ്ക ഉണ്ടാക്കിയിരുന്നു. എന്നാൽ, അപേക്ഷ സമർപ്പിച്ച് കാത്തിരിക്കുന്ന കാലയളവിൽ ആർക്കും തങ്ങളുടെ നിയമപരമായ താമസാനുമതിയോ ജോലി ചെയ്യാനുള്ള അവകാശമോ നഷ്ടപ്പെടില്ലെന്ന് സർക്കാർ ഔദ്യോഗികമായി വ്യക്തമാക്കി.

പ്രവാസികളുടെ തൊഴിൽ സുരക്ഷിതത്വം ഉറപ്പാക്കാൻ ആകെ 24 ആഴ്ച നീളുന്ന ഒരു പ്രത്യേക സുരക്ഷാ സംവിധാനമാണ് ഇമിഗ്രേഷൻ വകുപ്പ് ഒരുക്കിയിരിക്കുന്നത്. ഇതനുസരിച്ച്, നിലവിലുള്ള ഐആർപി കാർഡിന്റെ കാലാവധി തീരുന്നതിന് 12 ആഴ്ച മുൻപ് വരെ അപേക്ഷകർക്ക് ഓൺലൈൻ പോർട്ടൽ വഴി പുതുക്കലിനായി അപേക്ഷിക്കാം. ഇനി അഥവാ കൃത്യസമയത്ത് അപേക്ഷിച്ചിട്ടും കാർഡിന്റെ കാലാവധി കഴിഞ്ഞുപോയാൽ പോലും, തൊട്ടടുത്ത 12 ആഴ്ചത്തേക്ക് (ഏകദേശം 3 മാസം) യാതൊരു തടസ്സവുമില്ലാതെ രാജ്യത്ത് തുടരാൻ അപേക്ഷകന് നിയമപരമായ അവകാശമുണ്ടായിരിക്കും.

തൊഴിലുടമകൾക്കുള്ള കർശന നിർദ്ദേശം

കാർഡിന്റെ കാലാവധി തീരുന്നതിന്റെ പേരിൽ ജീവനക്കാരെ ജോലിയിൽ നിന്ന് മാറ്റിനിർത്താൻ കമ്പനികൾക്ക് അവകാശമില്ലെന്ന് കാണിച്ച് ഇമിഗ്രേഷൻ രജിസ്ട്രേഷൻ ഓഫീസ് അയർലൻഡിലെ മുഴുവൻ തൊഴിലുടമകൾക്കും നിയമപരമായ നോട്ടീസ് അയച്ചിട്ടുണ്ട്. പഴയ കാർഡിന്റെ കാലാവധി അവസാനിക്കുന്നതിന് മുൻപായി പുതുക്കാനുള്ള അപേക്ഷ സമർപ്പിച്ചിട്ടുണ്ടെങ്കിൽ, മുൻപുണ്ടായിരുന്ന വിസയിലെ എല്ലാ തൊഴിൽ നിബന്ധനകളും അടുത്ത 12 ആഴ്ചത്തേക്ക് കൂടി അതേപടി തുടരും.

ക്രിട്ടിക്കൽ സ്കിൽസ് വിസയോ ജനറൽ എംപ്ലോയ്‌മെന്റ് പെർമിറ്റോ ഉള്ളവർക്ക് ഇതനുസരിച്ച് കമ്പനികളിൽ തടസ്സമില്ലാതെ തുടരാനും ശമ്പളം കൈപ്പറ്റാനും സാധിക്കും. കമ്പനികളുടെ ഹ്യൂമൻ റിസോഴ്സ് (HR) വിഭാഗത്തിൽ തങ്ങളുടെ വിസ നിയമപരമാണെന്ന് തെളിയിക്കാൻ അപേക്ഷകർ ഓൺലൈൻ പോർട്ടലിൽ നിന്ന് ലഭിക്കുന്ന സവിശേഷമായ ‘ഒറെഗ്’ (OREG Number) ആപ്ലിക്കേഷൻ നമ്പറോ അല്ലെങ്കിൽ അപേക്ഷ സ്വീകരിച്ചുകൊണ്ടുള്ള ഔദ്യോഗിക ഇമെയിലോ കാണിച്ചാൽ മതിയാകും.നിലവിലെ കാത്തിരിപ്പ് സമയവും കാർഡ് വിതരണവും

അപേക്ഷകളുടെ എണ്ണത്തിലുണ്ടായ വൻ വർദ്ധനവ് കൈകാര്യം ചെയ്യുന്നതിനായി ഇമിഗ്രേഷൻ വിഭാഗത്തിൽ കൂടുതൽ ജീവനക്കാരെ നിയമിക്കുകയും അധിക സമയം ജോലി ചെയ്യാനുള്ള ക്രമീകരണങ്ങൾ ഏർപ്പെടുത്തുകയും ചെയ്തിട്ടുണ്ട്. ഇതിന്റെ ഫലമായി നിലവിൽ അപേക്ഷകൾ തീർപ്പാക്കുന്നതിനുള്ള സമയം ഗണ്യമായി കുറഞ്ഞിട്ടുണ്ട്. ഇപ്പോൾ സാധാരണ അപേക്ഷകൾ 6 മുതൽ 8 ആഴ്ചയ്ക്കുള്ളിൽ പ്രോസസ്സ് ചെയ്ത് തീർക്കുന്നുണ്ട്. എന്നാൽ സങ്കീർണ്ണമായ കേസുകൾക്കും മറ്റ് ചില പ്രത്യേക വിസ വിഭാഗങ്ങൾക്കും പരമാവധി 16 ആഴ്ച വരെ സമയമെടുക്കുന്നുണ്ട്.

ഓൺലൈൻ പരിശോധനകൾ പൂർത്തിയായി അപേക്ഷ അംഗീകരിച്ചു കഴിഞ്ഞാൽ, പുതിയ ഐആർപി കാർഡ് പ്രിന്റ് ചെയ്ത് അപേക്ഷകന്റെ വിലാസത്തിലേക്ക് തപാൽ മാർഗ്ഗം അയക്കാൻ 10 മുതൽ 15 പ്രവൃത്തി ദിവസങ്ങൾ വരെ എടുക്കും. അതിനാൽ ഓൺലൈനായി അപേക്ഷിക്കുമ്പോൾ വീട്ടുവിലാസവും ശരിയായ എയർകോഡും (Eircode) കൃത്യമായി രേഖപ്പെടുത്താൻ പ്രത്യേകം ശ്രദ്ധിക്കണം.

വിദ്യാർത്ഥികൾക്കുള്ള പ്രത്യേക നിബന്ധനകളും യാത്രാ വിലക്കും

സ്റ്റാമ്പ് 2 (Stamp 2) വിസയിലുള്ള അന്താരാഷ്ട്ര വിദ്യാർത്ഥികൾക്ക് മറ്റ് ജീവനക്കാരെപ്പോലെ 12 ആഴ്ച മുൻപ് അപേക്ഷിക്കാൻ സാധിക്കില്ല. അവർ തങ്ങളുടെ പുതിയ കോഴ്സ് ഔദ്യോഗികമായി ആരംഭിച്ചതിന് ശേഷം മാത്രമേ പുതുക്കാനുള്ള അപേക്ഷ സമർപ്പിക്കാൻ പാടുള്ളൂ. കൂടാതെ അവർ പഠിക്കുന്ന കോഴ്സ് അയർലൻഡ് സർക്കാരിന്റെ അംഗീകൃത കോഴ്സുകളുടെ പട്ടികയായ ‘ILEP’-ൽ ഉള്ളതായിരിക്കണം.കാലാവധി കഴിഞ്ഞ ഐആർപി കാർഡുമായി പ്രവാസികൾ അയർലൻഡിന് പുറത്തേക്ക് (യുകെ, യൂറോപ്പ് അല്ലെങ്കിൽ നാട്ടിലേക്ക്) യാത്ര ചെയ്യരുതെന്ന് ഇമിഗ്രേഷൻ വകുപ്പ് കർശന മുന്നറിയിപ്പ് നൽകുന്നു. 

ഡിജിറ്റൽ അപേക്ഷ നിലവിലുണ്ടെങ്കിൽ പോലും കയ്യിൽ സാധുവായ കാർഡില്ലാതെ യാത്ര ചെയ്താൽ തിരികെ അയർലൻഡ് വിമാനത്താവളത്തിൽ എത്തുമ്പോൾ അതിർത്തി സുരക്ഷാ ഉദ്യോഗസ്ഥർ പ്രവേശനം നിഷേധിക്കാൻ സാധ്യതയുണ്ട്. എന്നാൽ മരണാനന്തര ചടങ്ങുകൾ, ഗുരുതരമായ ആരോഗ്യപ്രശ്നങ്ങൾ തുടങ്ങിയ അടിയന്തിര സാഹചര്യങ്ങളിൽ (Emergencies) യാത്ര ചെയ്യേണ്ടി വരുന്നവർക്ക് ഫ്ലൈറ്റ് ടിക്കറ്റും മറ്റ് തെളിവുകളും ഐഎസ്ഡി പോർട്ടലിൽ സമർപ്പിച്ചാൽ മുൻഗണനാടിസ്ഥാനത്തിൽ (Expedited Process) അപേക്ഷകൾ വേഗത്തിൽ തീർപ്പാക്കി നൽകുന്നതാണ്.