പാലായിൽ കാറിൽ നിന്ന് പോണ്ടിച്ചേരി മദ്യം പിടികൂടി; ഉടമ ഓടി രക്ഷപ്പെട്ടു

കോട്ടയം: പാലായിൽ കാറിൽ കടത്താൻ ശ്രമിച്ച പോണ്ടിച്ചേരി മദ്യം എക്സൈസ് സംഘം പിടികൂടി.

കേരളത്തിൽ വിൽപനാനുമതിയില്ലാത്തതും പോണ്ടിച്ചേരിയിൽ മാത്രം വിൽക്കുന്നതുമായ വിദേശമദ്യമാണ് എക്സൈസ് സംഘത്തിന്റെ പരിശോധനയിൽ കണ്ടെടുത്തത്. പാലാ സ്പൈസ് വാലി ക്ലബ്ബിന്റെ വളപ്പിൽ പാർക്ക് ചെയ്തിരുന്ന കാറിൽ നിന്നാണ് മദ്യം പിടിച്ചെടുത്തത്.

​ആറു കുപ്പി പുതിയ മദ്യവും, മറ്റൊരു കുപ്പിയിൽ ഊറ്റി സൂക്ഷിച്ച നിലയിലുള്ള മദ്യവുമാണ് വാഹനത്തിൽ ഉണ്ടായിരുന്നത്. ഇതിനുപുറമേ, ഉപയോഗിച്ച നിലയിലുള്ള രണ്ട് ഒഴിഞ്ഞ മദ്യക്കുപ്പികളും കാറിനുള്ളിൽ നിന്ന് കണ്ടെടുത്തു.

​എക്സൈസ് സംഘം പരിശോധനയ്ക്കായി എത്തുന്നതുകണ്ട് കാറിന്റെ ഉടമ ക്ലബ്ബിൽ നിന്നും ഓടി രക്ഷപ്പെടുകയായിരുന്നു. പ്രതിക്കായി എക്സൈസ് അന്വേഷണം ഊർജ്ജിതമാക്കിയിട്ടുണ്ട്. 

ലോക്ക് ചെയ്ത നിലയിലായിരുന്ന കാർ പൂർണ്ണമായി തുറന്ന് വിശദമായ പരിശോധന നടത്തുന്നതിനായി എക്സൈസ് സംഘം ഇപ്പോൾ മറ്റ് വിദഗ്ധരുടെ സഹായം തേടിയിരിക്കുകയാണ്.