മാറ്റിപ്പാർപ്പിച്ചത് 3,00,000 ലധികം ആളുകളെ,വരും മണിക്കൂറുകൾ നിർണ്ണായകമെന്ന് പെഡ്രോ സാഞ്ചസ്

പാരീസ്/മാഡ്രിഡ്: ഫ്രാൻസിലും സ്പെയിനിലും കാട്ടുതീ നിയന്ത്രണാതീതമായി പടർന്നുപിടിക്കുന്നു. സ്ഥിതിഗതികൾ ഗുരുതരമായതിനെ തുടർന്ന് ഇരു രാജ്യങ്ങളിൽ നിന്നുമായി 3,00,000 ലധികം ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു.

ഫ്രാൻസിന്റെ തെക്കുപടിഞ്ഞാറൻ മേഖലകളിലും സ്പെയിനിലെ മാഡ്രിഡിന് സമീപമുള്ള പ്രദേശങ്ങളിലുമാണ് ദിവസങ്ങളായി കാട്ടുതീ പടരുന്നത്. സമാധാനകാലത്ത് ഇരു രാജ്യങ്ങളും നേരിടുന്ന ഏറ്റവും വലിയ കാട്ടുതീ ദുരന്തങ്ങളിലൊന്നാണിതെന്ന് വിലയിരുത്തപ്പെടുന്നു.

ഫ്രാൻസിലെ പ്രമുഖ നഗരമായ ബോർഡോയ്ക്ക് സമീപമുള്ള Gironde മേഖലയിലാണ് കാട്ടുതീ കടുത്ത ഭീഷണി ഉയർത്തുന്നത്. കാറ്റിന്റെ ദിശയിലുണ്ടാകുന്ന പെട്ടെന്നുള്ള മാറ്റങ്ങൾ കാരണം തീ അപ്രതീക്ഷിത ദിശകളിലേക്ക് പടരുകയാണെന്ന് ഫ്രഞ്ച് ആഭ്യന്തര മന്ത്രി ലോറന്റ് നുനെസ് എക്സിലൂടെ (X) അറിയിച്ചു. പ്രദേശത്തുനിന്ന് 2,50,000 ആളുകളെ ഒഴിപ്പിച്ചിട്ടുണ്ട്. തീ അണയ്ക്കുന്നതിനായി സ്വിറ്റ്സർലൻഡിൽ നിന്നുള്ള സംഘം ഉൾപ്പെടെ 2,500 ഓളം അഗ്നിശമന സേനാംഗങ്ങളെയും 1,500 സൈനികരെയും 1,200 പോലീസുകാരെയും നിയോഗിച്ചിട്ടുണ്ട്. 

ഫ്രാൻസിൽ ചൊവ്വാഴ്ച തീ അണയ്ക്കുന്നതിനിടെ രണ്ട് അഗ്നിശമന സേനാംഗങ്ങൾ കൊല്ലപ്പെട്ടിരുന്നു.സ്പെയിനിലെ മാഡ്രിഡ്, ആവില, ടോളിഡോ, വലെൻസിയയിലെ കാസ്റ്റെല്ലോൺ എന്നിവിടങ്ങളിൽ നിന്നായി 75,000 ആളുകളെ ഒഴിപ്പിച്ചു. വലെൻസിയയിലെ പുതിയ തീപിടുത്തം നിയന്ത്രണവിധേയമാക്കാൻ ശ്രമങ്ങൾ തുടരുകയാണെന്ന് കേന്ദ്ര സർക്കാർ പ്രതിനിധി പിലോർ ബെർണബെ വ്യക്തമാക്കി. 

സ്പെയിനിൽ ശനിയാഴ്ച ഒരാൾ കൊല്ലപ്പെട്ടിട്ടുണ്ട്. വരും മണിക്കൂറുകൾ നിർണായകമാണെന്ന് സ്പാനിഷ് പ്രധാനമന്ത്രി പെഡ്രോ സാഞ്ചസ് ആവില സന്ദർശനത്തിനിടെ അറിയിച്ചു. ഇരു രാജ്യങ്ങൾക്കും സഹായവുമായി യൂറോപ്യൻ യൂണിയനിലെ മറ്റ് രാജ്യങ്ങളിൽ നിന്ന് വിമാനങ്ങളും ജീവനക്കാരും എയർക്രാഫ്റ്റുകളും എത്തിയിട്ടുണ്ട്. മേയ് മാസം മുതൽ അനുഭവപ്പെടുന്ന കടുത്ത ഉഷ്ണതരംഗവും മഴയുടെ കുറവുമാണ് കാട്ടുതീ വേഗത്തിൽ പടരാൻ കാരണമായത്.