പത്തനംതിട്ടയിലെ സൂപ്പർമാർക്കറ്റിൽ കാട്ടുപന്നിയുടെ ആക്രമണം; കടയുടമയായ സ്ത്രീയ്ക്ക് പരിക്ക്

പത്തനംതിട്ട റാന്നിയിലെ മന്ദിരംപടിയിൽ ഇന്ന് രാവിലെ മിനി സൂപ്പർമാർക്കറ്റിൽ കാട്ടുപന്നിയുടെ ആക്രമണത്തിന്റെ കടയുടമയ്ക്ക് പരുക്ക്. 

കടയുടെ മുൻവശത്തെ ചില്ലുവാതിൽ പൂർണ്ണമായി തകർത്ത് അകത്തേക്ക് കയറിയ കാട്ടുപന്നി, കടയുടമയായ ബീന എന്ന സ്ത്രീയെ ഓടിച്ചിട്ട് ആക്രമിക്കുകയായിരുന്നു.

പന്നി കുത്താൻ വന്നപ്പോൾ സ്വയം പ്രതിരോധിക്കാൻ ശ്രമിക്കുന്നതിനിടയിലാണ് ബീനയുടെ കൈയ്ക്ക് പരിക്കേറ്റത്. 

സംഭവത്തിന് പിന്നാലെ ജനവാസ മേഖലയിലേക്ക് ഓടിയ കാട്ടുപന്നിയെ, നാട്ടുകാരുടെ സുരക്ഷ മുൻനിർത്തി പഞ്ചായത്തിന്റെ പ്രത്യേക അനുമതിയോടെ ആക്രമണം നടന്ന സ്ഥലത്തുനിന്ന് ഒരു കിലോമീറ്റർ അകലെ വെച്ച് വെടിവെച്ചുകൊന്നു.