വനംവകുപ്പ് പ്രഖ്യാപിച്ച ഒറ്റത്തവണ പൊതുമാപ്പ് സൗകര്യം; കൈവശമുള്ള ആനക്കൊമ്പിന്റെ വിവരങ്ങൾ വനംവകുപ്പിനു കൈമാറാൻ മോഹൻലാൽ;

കൊച്ചി: തന്റെ കൈവശമുള്ള ആനക്കൊമ്പിന്റെ വിവരങ്ങൾ വനംവകുപ്പിനു കൈമാറാൻ നടൻ മോഹൻലാൽ. മാർച്ചിൽ മലയാറ്റൂർ ഡിഎഫ്ഒയ്ക്കു നൽകിയ അപേക്ഷ ചീഫ് വൈൽഡ് ലൈഫ് വാർഡനു കൈമാറി.

ഹൈക്കോടതിയുടെ നിരീക്ഷണത്തെത്തുടർന്നു വനംവകുപ്പ് പ്രഖ്യാപിച്ച ഒറ്റത്തവണ പൊതുമാപ്പ് സൗകര്യം ഉപയോഗിച്ചാണ് മോഹൻലാൽ കൈവശമുള്ള ആനക്കൊമ്പിന്റെ വിവരങ്ങൾ കൈമാറുന്നത്.

മോഹൻലാലിന്റെ കൈവശമുള്ള രണ്ടു ജോഡി ആനക്കൊമ്പുകൾക്കും ആനക്കൊമ്പിൽ തീർത്ത 13 കരകൗശലവസ്തുക്കൾക്കും ഉടമസ്ഥതാ സർട്ടിഫിക്കറ്റ് നൽകിയത് ഹൈക്കോടതി റദ്ദാക്കിയിരുന്നു. നടപടിക്രമങ്ങൾ പാലിച്ചല്ല ഈ സർട്ടിഫിക്കറ്റ് നൽകിയതെന്നു കണ്ടെത്തിയതോടെയാണു കോടതി ഈ നിലപാടു സ്വീകരിച്ചത്.

വ്യക്തികൾക്കോ ഒരുവിഭാഗം ആളുകൾക്കോ തങ്ങളുടെ കൈവശമുള്ള വന്യജീവി ഉൽപന്നങ്ങളുടെ ശേഖരം വെളിപ്പെടുത്തുന്നതിനും നിയമനടപടികളിൽ നിന്ന് പരിരക്ഷ നേടുന്നതിനും സംസ്ഥാന സർക്കാരിന് പുതിയ വിജ്ഞാപനം പുറപ്പെടുവിക്കാമെന്നു കോടതി നിരീക്ഷണം നടത്തിയിരുന്നു. ഇതിന്റെ അടിസ്ഥാനത്തിലാണു നടപടികൾ പുരോഗമിക്കുന്നത്.