150 ഗ്രാമിന് പകരം 125 ഗ്രാം ബിസ്കറ്റ്; പാർലെയ്ക്കും മെട്രോ ഹൈപ്പർമാർക്കറ്റിനും 50,000 രൂപ പിഴയീടാക്കി ഉപഭോക്തൃ കോടതി

കണ്ണൂർ: 150 ഗ്രാം എന്ന് രേഖപ്പെടുത്തി വിറ്റ ബിസ്കറ്റ് പായ്ക്കറ്റിൽ 125 ഗ്രാം മാത്രമാണെന്ന് കണ്ടെത്തിയ സംഭവത്തിൽ നിർമാതാക്കളായ പാർലെ കമ്പനിയും വിൽപനക്കാരായ മെട്രോ ഹൈപ്പർ മാർക്കറ്റും ചേർന്ന് 50,000 രൂപ നഷ്ടപരിഹാരം നൽകാൻ കണ്ണൂർ ജില്ലാ ഉപഭോക്തൃ തർക്കപരിഹാര കമ്മീഷന്റെ ഉത്തരവ്. 

അഞ്ചരക്കണ്ടി കല്ലായി സ്വദേശി ടി.പി. ആസിഖ് നൽകിയ പരാതിയിലാണ് കമ്മീഷൻ പ്രസിഡന്റ് രവി സുഷ, അംഗങ്ങളായ മോളിക്കുട്ടി മാത്യു, കെ.പി. സജീഷ് എന്നിവരടങ്ങിയ ബെഞ്ചിന്റെ വിധി.

2024 ജൂലായ് 26-നാണ് ചക്കരക്കല്ലിലെ മെട്രോ ഹൈപ്പർ മാർക്കറ്റിൽനിന്ന് പരാതിക്കാരൻ 150 ഗ്രാം എന്ന് രേഖപ്പെടുത്തിയ പാർലെ 20-20 ബിസ്കറ്റ് വാങ്ങിയത്. എന്നാൽ, സമീപത്തെ കടയിൽ വെച്ച് തൂക്കം നോക്കിയപ്പോൾ 125 ഗ്രാം മാത്രമാണെന്ന് മനസ്സിലായതിനെത്തുടർന്നാണ് അദ്ദേഹം ഉപഭോക്തൃ കോടതിയെ സമീപിച്ചത്.

തങ്ങൾ നിർമ്മിച്ച പായ്ക്കറ്റ് ആയിരിക്കില്ല അതെന്നും യന്ത്രസഹായത്തോടെയാണ് ഉത്പന്നങ്ങൾ നിർമ്മിക്കുന്നതെന്നുമായിരുന്നു പാർലെ കമ്പനിയുടെ വാദം. എന്നാൽ, വിറ്റത് പാർലെ ഉത്പന്നമാണെന്ന് സമ്മതിച്ച മെട്രോ ഹൈപ്പർ മാർക്കറ്റ്, തൂക്കക്കുറവിന്റെ ഉത്തരവാദിത്വം നിർമാതാവിനാണെന്ന നിലപാടാണ് സ്വീകരിച്ചത്. രേഖകളും ലീഗൽ മെട്രോളജി റിപ്പോർട്ടും പരിശോധിച്ച കമ്മീഷൻ, ഉത്പന്നം പാർലെയുടേതാണെന്നും അളവിൽ കുറവുള്ള ഉത്പന്നം വിറ്റത് ഗുരുതര വീഴ്ചയാണെന്നും വിലയിരുത്തി. വിൽപ്പനക്കാരനും ഇതിൽ നിന്നും ഒഴിഞ്ഞുമാറാനാകില്ലെന്നും കമ്മീഷൻ വ്യക്തമാക്കി.

ഇതിന്റെ അടിസ്ഥാനത്തിൽ പാർലെ കമ്പനി 25,000 രൂപയും മെട്രോ ഹൈപ്പർ മാർക്കറ്റ് 10,000 രൂപയും നഷ്ടപരിഹാരമായി നൽകണം. കൂടാതെ കമ്പനി 10,000 രൂപയും ഹൈപ്പർമാർക്കറ്റ് 5,000 രൂപ വീതവും കോടതിച്ചെലവായും നൽകണം. ഉത്തരവിന്റെ പകർപ്പ് ലഭിച്ച് ഒരു മാസത്തിനകം തുക നൽകിയില്ലെങ്കിൽ, ഉത്തരവിട്ട തീയതി മുതൽ 12 ശതമാനം പലിശ സഹിതം തുക നൽകേണ്ടിവരുമെന്നും കമ്മീഷൻ മുന്നറിയിപ്പ് നൽകി. പരാതിക്കാരനുവേണ്ടി അഡ്വ. കെ.പി. മുഹമ്മദ്‌ സിനാൻ ഹാജരായി.