സർക്കാരിൽ പാർട്ടി നിയന്ത്രണമുണ്ടായില്ല; പിണറായി സർക്കാരിനെതിരെ രൂക്ഷവിമർശനവുമായി സിപിഎം കേന്ദ്ര കമ്മിറ്റി റിപ്പോർട്ട്

തിരുവനന്തപുരം: പിണറായി സർക്കാരിന്റെ കാലത്തു പാർട്ടിക്ക് സർക്കാരിൽ നിയന്ത്രണമുണ്ടായിരുന്നില്ലെന്നു തുറന്നു സമ്മതിച്ച് സിപിഎം. മുൻപെല്ലാം പാർട്ടിക്കു കേരളത്തിൽ ഭരണമുണ്ടായിരുന്നപ്പോൾ സർക്കാർ നടപ്പാക്കുന്ന പദ്ധതികൾ നിരീക്ഷിക്കാനും മാർഗനിർദേശം നൽകാനും പാർട്ടി ഉപസമിതിയെ വച്ചിരുന്നു. 

എന്നാൽ കഴിഞ്ഞതവണ അതുണ്ടായില്ലെന്നാണു വിമർശനം. കേരളം ഉൾപ്പെടെയുള്ള സംസ്ഥാനങ്ങളിലെ നിയമസഭാ തിരഞ്ഞെടുപ്പു ഫലം വിശകലനം ചെയ്തു കേന്ദ്ര കമ്മിറ്റി തയാറാക്കിയ റിപ്പോർട്ട് ഇന്നലെ പാർട്ടിയുടെ വെബ്സൈറ്റിൽ പ്രസിദ്ധീകരിച്ചു.

പിണറായി സർക്കാരിന്റെ കാലത്തു പൊലീസിന്റെയും ബ്യൂറോക്രസിയുടെയും സ്വേച്ഛാധിപത്യത്തിനെതിരെ ജനവികാരം ശക്തമായുണ്ടായിരുന്നു. പാർട്ടി പ്രവർത്തകർക്കും എതിർപ്പുണ്ടായിരുന്നു. ചില മന്ത്രിമാർ ഉദ്യോഗസ്ഥരെ അമിതമായി ആശ്രയിച്ചു. 

മുൻപു ഭരണത്തിലിരിക്കുമ്പോൾ പാർട്ടിയുടെ ബഹുജന സംഘടനകൾ ജനകീയവിഷയങ്ങൾ ഏറ്റെടുത്തു ജനങ്ങളെ അണിനിരത്തിയിരുന്നു. കഴിഞ്ഞ 10 വർഷം അതിനു കഴിഞ്ഞില്ല. അഹങ്കാരം, അഴിമതി, സ്വജനപക്ഷപാതം, ആഡംബര ജീവിത ശൈലി എന്നിങ്ങനെയുള്ള മോശം പ്രവണത ചില നേതാക്കളിലുണ്ടായി. ഇതു സമയത്തു തിരുത്താത്തതിനാൽ പാർട്ടിയിലുള്ള ജനവിശ്വാസം നഷ്ടമായി.

ഭരണവിരുദ്ധ വികാരമില്ലായിരുന്നുവെന്നു സംസ്ഥാന നേതൃത്വം ഇപ്പോഴും വിശദീകരിക്കുമ്പോൾ, ഭരണവിരുദ്ധ വികാരമുണ്ടായെന്നു കേന്ദ്ര കമ്മിറ്റി റിപ്പോർട്ട് അടിവരയിട്ടു പറയുന്നു. ശബരിമല സ്വർണക്കൊള്ളക്കേസിൽ എ.പത്മകുമാറിനെ അറസ്റ്റ് ചെയ്തപ്പോൾ അഖിലേന്ത്യാ നേതൃത്വം സംസ്ഥാന സെന്ററിൽ ബന്ധപ്പെട്ട് അച്ചടക്കനടപടിക്കു നിർദേശം നൽകിയിരുന്നു. അതു ചെയ്തിരുന്നെങ്കിൽ ഈ വിഷയത്തിൽ ഇത്രയും വലിയ തിരിച്ചടിയുണ്ടാകില്ലായിരുന്നു.

പിഎം ശ്രീ വിഷയത്തിൽ സിപിഐയുമായുള്ള തർക്കം പരിഹരിച്ചത് അഖിലേന്ത്യാ നേതൃത്വം ഇടപെട്ടാണ്. അപ്പോഴേക്കും വൈകിപ്പോയിരുന്നു. വേണ്ടത്ര വനിതകൾ, യുവാക്കൾ, ന്യൂനപക്ഷ സമുദായക്കാർ എന്നിവരെ സ്ഥാനാർഥികളാക്കിയില്ല. ഇതിന്റെ ഉത്തരവാദിത്തം ജില്ലാ കമ്മിറ്റികളുടെ തലയിൽ മാത്രമിടരുത്. സംസ്ഥാന നേതൃത്വത്തിന് ഉത്തരവാദിത്തമുണ്ടെന്നും റിപ്പോർട്ട് വ്യക്തമാക്കുന്നു.