“ഭരണം മാറിയിട്ടും മൈക്കിന്റെ വിഷയം മാത്രം മാറിയിട്ടില്ല”; ചെന്നിത്തല

കഴിഞ്ഞ എൽഡിഎഫ് സർക്കാരിന്റെ കാലത്ത് വലിയ വാർത്താപ്രാധാന്യവും ഒപ്പം നിരവധി സോഷ്യൽ മീഡിയ ട്രോളുകളും ഏറ്റുവാങ്ങിയ ഒന്നായിരുന്നു വേദികളിലെ ‘മൈക്ക് തകരാറുകൾ’. അന്നത്തെ മുഖ്യമന്ത്രി പിണറായി വിജയൻ പങ്കെടുത്ത പല പൊതുപരിപാടികളിലും മൈക്ക് പണിമുടക്കുന്നതും അതിനെതിരെ അദ്ദേഹം പരസ്യമായി പ്രതികരിക്കുന്നതും കേരളക്കര കൗതുകത്തോടെയാണ് കണ്ടിരുന്നത്. 

എന്നാൽ ഇപ്പോൾ ഭരണം മാറിയിട്ടും മൈക്കിന്റെ ഈ കഷ്ടകാലത്തിന് വലിയ മാറ്റമൊന്നുമില്ലെന്ന് ഓർമ്മിപ്പിച്ചു കൊണ്ട് രംഗത്തെത്തിയിരിക്കുകയാണ് ആഭ്യന്തര മന്ത്രി രമേശ് ചെന്നിത്തല. ‘ഹരിവരാസനം’ എന്ന പുതിയ സിനിമയുടെ പൂജാവേദിയിൽ വെച്ചായിരുന്നു മന്ത്രിയുടെ ഈ വേറിട്ട പ്രതികരണം.

ചിത്രത്തിന്റെ അണിയറപ്രവർത്തകർ ഒത്തുചേർന്ന ചടങ്ങിൽ വിശിഷ്ടാതിഥിയായി എത്തിയതായിരുന്നു രമേശ് ചെന്നിത്തല. സിനിമയുടെ ഭാഗമായുള്ള പ്രത്യേക പരിപാടിയിൽ പങ്കെടുത്തവർക്ക് ‘തൂഫാൻ വാരിയേഴ്സ്’ ബാഡ്ജ് ധരിപ്പിക്കുന്നതിനിടയിലാണ് വേദിയിലെ മൈക്ക് പെട്ടെന്ന് തകരാറിലായത്. 

മൈക്ക് അനൗൺസ്മെന്റിൽ തടസ്സം നേരിട്ടതോടെ ഒട്ടും സമയം കളയാതെ, “ഭരണം മാറിയിട്ടും മൈക്കിന്റെ വിഷയം മാത്രം മാറിയിട്ടില്ല എന്നുള്ളതാണ്” എന്ന് രമേശ് ചെന്നിത്തല മൈക്കിലൂടെ തന്നെ ചിരിയോടെ പറഞ്ഞു. മന്ത്രിയുടെ ഈ അപ്രതീക്ഷിത കൗണ്ടർ കേട്ടതോടെ സദസ്സിൽ ഇരുന്നവരെല്ലാം വലിയ രീതിയിൽ ചിരിക്കുകയും കയ്യടിക്കുകയുമായിരുന്നു. ഇതിന്റെ ദ്യശ്യങ്ങൾ ഇപ്പോൾ സോഷ്യൽ മീഡിയയിലും വൈറലാവുകയാണ്.