സംസ്ഥാനത്ത് വൈദ്യുതി പ്രതിസന്ധി രൂക്ഷമാകുന്നു; പരിഹാസവുമായി സിപിഎം നേതാക്കൾ

തിരുവനന്തപുരം: ഡാമുകളിൽ ജലനിരപ്പ് കുറഞ്ഞതിനെ തുടർന്ന് സംസ്ഥാനത്ത് വൈദ്യുതി പ്രതിസന്ധി രൂക്ഷമാകുന്നു. സംസ്ഥാനത്തിന്റെ വിവിധ ഭാഗങ്ങളിൽ കഴിഞ്ഞദിവസം മുന്നറിയിപ്പില്ലാതെ ഏർപ്പെടുത്തിയ വൈദ്യുതി നിയന്ത്രണം വലിയ പ്രതിഷേധത്തിന് ഇടയാക്കിയിരിക്കുകയാണ്. പലയിടങ്ങളിലും രാത്രികാലങ്ങളിൽ 25 മിനിറ്റ് വരെയാണ് വൈദ്യുതി മുടങ്ങിയത്. 

ലോകകപ്പ് ഫുട്ബോൾ ആവേശം നിലനിൽക്കുന്ന സമയമായതിനാൽ രാത്രിയുണ്ടാകുന്ന പവർ കട്ട് കായിക പ്രേമികളെ ഏറെ പ്രകോപിപ്പിച്ചിട്ടുണ്ട്.

ഇതിനിടെ കെഎസ്ഇബിയുടെ നടപടിക്കെതിരെ പരിഹാസവുമായി സിപിഎം നേതാക്കൾ രംഗത്തെത്തി. സിപിഎം നേതാക്കളായ വി. ശിവൻകുട്ടിയും വി.കെ. പ്രശാന്തുമാണ് പവർ കട്ടിനെതിരെ വിമർശനം ഉന്നയിച്ചത്. ‘ഇന്ദിര കട്ട് ഇത്തിരി കൂടുന്നുണ്ട്, ഇന്ന് രണ്ട് വട്ടമായി’ എന്നായിരുന്നു വി.കെ. പ്രശാന്തിന്റെ പരിഹാസം കലർന്ന ഫേസ്ബുക്ക് പോസ്റ്റ്. 

വൈദ്യുതി തടസ്സപ്പെട്ട പശ്ചാത്തലത്തിലായിരുന്നു അദ്ദേഹത്തിന്റെ പ്രതികരണം. ‘ഇതിനെ ഇന്ദിരാ കട്ട് എന്നാണോ വിളിക്കുന്നത്’ എന്നായിരുന്നു വി.ശിവൻകുട്ടിയുടെ പരിഹാസം. നേതാക്കളുടെ പോസ്റ്റിന് താഴെ പലയിടങ്ങളിലും വൈദ്യുതി മുടങ്ങിയതായി പരാതിപ്പെട്ട് നിരവധി ആളുകൾ എത്തി. സാധാരണയായി അറ്റകുറ്റപ്പണികൾക്കായി വൈദ്യുതി മുടങ്ങുമ്പോൾ കെഎസ്ഇബി ഉപഭോക്താക്കളെ മെസേജ് വഴി മുൻകൂട്ടി അറിയിക്കാറുണ്ട്.

എന്നാൽ നിലവിലെ നിയന്ത്രണങ്ങളെക്കുറിച്ച് യാതൊരു മുന്നറിയിപ്പും ലഭിക്കുന്നില്ലെന്നാണ് പ്രധാന പരാതി. അറിയിപ്പുകൾ നൽകാതെ വൈദ്യുതി നിയന്ത്രണം ഏർപ്പെടുത്തുന്നത് ശരിയല്ലെന്നും, നിയന്ത്രണങ്ങൾ ഉണ്ടെങ്കിൽ അത് ജനങ്ങളെ മുൻകൂട്ടി അറിയിക്കണമെന്നുമാണ് പൊതുജനങ്ങളും പ്രതിപക്ഷവും ആവശ്യപ്പെടുന്നത്.