ആദിവാസി ക്ഷേമ പദ്ധതിയുടെ മറവിൽ 36 ലക്ഷത്തോളം രൂപയുടെ വൻ സാമ്പത്തിക തട്ടിപ്പ് ; സിപിഎം ബ്രാഞ്ച് സെക്രട്ടറി ഉൾപ്പെടെയുള്ള മൂന്ന് ജീവനക്കാരെ പിരിച്ചുവിട്ടു

സുൽത്താൻ ബത്തേരി: വയനാട് കുടുംബശ്രീ മിഷന് കീഴിൽ ആദിവാസി ക്ഷേമ പദ്ധതിയുടെ മറവിൽ 36 ലക്ഷത്തോളം രൂപയുടെ വൻ സാമ്പത്തിക തട്ടിപ്പ് നടന്നതായി കണ്ടെത്തൽ. ആദിവാസി ഉത്പന്നങ്ങൾ വിപണനം ചെയ്യുന്ന എട്ട് കേന്ദ്രങ്ങളിലാണ് ക്രമക്കേട് നടന്നത്. സംഭവത്തെ തുടർന്ന് സിപിഎം ബ്രാഞ്ച് സെക്രട്ടറി ഉൾപ്പെടെയുള്ള മൂന്ന് താത്കാലിക കുടുംബശ്രീ ജീവനക്കാരെ ജോലിയിൽ നിന്ന് പിരിച്ചുവിട്ടു. പ്രാഥമിക അന്വേഷണ റിപ്പോർട്ടിന്റെ അടിസ്ഥാനത്തിലാണ് അടിയന്തര നടപടി.

ആദിവാസികളിൽ നിന്ന് വനവിഭവങ്ങൾ ശേഖരിച്ച് മൂല്യവർദ്ധിത ഉത്പന്നങ്ങളാക്കി വിൽപന നടത്തുന്ന കേന്ദ്ര സർക്കാർ പദ്ധതിയായ ‘വൻ ധൻ വികാസ് കേന്ദ്ര’ യുടെ മറവിലായിരുന്നു തട്ടിപ്പ്. പഞ്ചായത്തുകൾ അടിസ്ഥാനമാക്കി രൂപീകരിച്ച കേന്ദ്രങ്ങളിലൂടെയായിരുന്നു ഇടപാടുകൾ.

വനവിഭവ ശേഖരണത്തിനും ഉത്പന്ന നിർമ്മാണത്തിനുള്ള യന്ത്രസാമഗ്രികൾ വാങ്ങുന്നതിനുമായി ആദിവാസികൾക്ക് നൽകേണ്ടിയിരുന്ന തുകയാണ് ജീവനക്കാർ തട്ടിയെടുത്തത്. കൂടാതെ പദ്ധതിയുടെ പേരുപറഞ്ഞ് വിവിധ ആളുകളിൽ നിന്നും ഇവർ പണം പിരിച്ചതായും വിവരമുണ്ട്.

2023 വരെയുള്ള കാലയളവിലാണ് ഗുരുതരമായ ഈ അഴിമതി നടന്നിരിക്കുന്നത്. വിഡിവികെ കേന്ദ്രങ്ങൾ പോലുമില്ലാത്ത പൊഴുതന, തൊണ്ടർനാട്, മേപ്പാടി തുടങ്ങിയ പഞ്ചായത്തുകളുടെ പേരിൽ പോലും വ്യാജരേഖകൾ ചമച്ച് ഇവർ ലക്ഷങ്ങൾ തട്ടിയെടുത്തു. ഉത്പന്നങ്ങൾ വിപണനം നടത്തി എന്ന് അവകാശപ്പെടുന്ന സ്ഥലങ്ങളിലൊന്നും ഇതിനാധാരമായ വൗച്ചറുകളോ രസീതുകളോ കണ്ടെത്താനായിട്ടില്ല.

കുടുംബശ്രീ ജീവനക്കാർ നടത്തിയ അഴിമതി കാരണം, ഈ കേന്ദ്രങ്ങളുടെ ചുമതലക്കാരായിരുന്ന നിരപരാധികളായ ആദിവാസി വിഭാഗത്തിൽപെട്ട ആളുകൾ പോലും ഇപ്പോൾ പ്രതിസ്ഥാനത്ത് നിൽക്കേണ്ടി വരുന്ന അവസ്ഥയാണുള്ളതെന്ന് കുടുംബശ്രീയുടെ റിപ്പോർട്ടിൽ പറയുന്നു. തട്ടിപ്പ് പുറത്തുവന്നതിന് പിന്നാലെ സിപിഎം സിവിൽ സ്റ്റേഷൻ ബ്രാഞ്ച് സെക്രട്ടറി ഉൾപ്പെടെയുള്ള മൂന്ന് ജീവനക്കാരെയാണ് പിരിച്ചുവിട്ടത്. പ്രാഥമിക അന്വേഷണത്തിൽ 36 ലക്ഷം രൂപയുടെ തട്ടിപ്പാണ് നിലവിൽ കണ്ടെത്തിയിട്ടുള്ളത്. കേസിൽ വിശദമായ അന്വേഷണം നടത്തുന്നതോടെ കൂടുതൽ തുകയുടെ അഴിമതി വിവരങ്ങൾ പുറത്തുവരുമെന്നാണ് സൂചന.