ആരോഗ്യ വകുപ്പിന്റെയും ആശുപത്രി അധികൃതരുടെയും കടുത്ത അനാസ്ഥ; കാൻസർ ബാധിതനായ ആദിവാസി വയോധികന്റെ ശരീരം പുഴുവരിച്ച നിലയിൽ

കൽപ്പറ്റ: നവോത്ഥാന കേരളത്തിന്റെ പൊതുജനാരോഗ്യ അവകാശവാദങ്ങളെ മുഴുവൻ ലജ്ജിപ്പിച്ചു കൊണ്ട് വയനാട്ടിൽ നിന്നും മനസ്സാക്ഷിയെ പിടിച്ചുലയ്ക്കുന്ന വാർത്ത. ഗുരുതരമായ കാൻസർ ബാധിതനായ ആദിവാസി വയോധികന്റെ ശരീരം പുഴുവരിച്ച നിലയിൽ കണ്ടെത്തി. 

പണിയ വിഭാഗത്തിൽപ്പെട്ട തിരുനെല്ലി പഞ്ചായത്തിലെ തൃശിലേരി സ്വദേശിയായ ബോളൻ (65) എന്ന വയോധികനാണ് ആരോഗ്യ വകുപ്പിന്റെയും ആശുപത്രി അധികൃതരുടെയും കടുത്ത അനാസ്ഥയ്ക്ക് ഇരയായത്. അതീവ ഗുരുതരാവസ്ഥയിലായ ഇദ്ദേഹത്തെ നിലവിൽ മാനന്തവാടി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. രോഗം മൂർച്ഛിച്ച് അതിശക്തമായ വേദനയോടെ വിവിധ ആശുപത്രികളെ സമീപിച്ചെങ്കിലും കൃത്യമായ ചികിത്സയോ പരിചരണമോ നൽകാൻ അധികൃതർ തയ്യാറായില്ലെന്നാണ് കൂടെയുള്ളവർ പറയുന്നത്.

ഏറെ നാളായി അംബേദ്കർ ക്യാൻസർ സെന്ററിൽ ചികിത്സയിലായിരുന്ന ബോളനെ രോഗം കടുത്തതിനെത്തുടർന്നാണ് വീട്ടിലേക്ക് കൊണ്ടുവന്നത്. തുടർന്ന് നില വഷളായതോടെ ബന്ധുക്കൾ വിവിധ താലൂക്ക് ആശുപത്രികളിലും പിന്നീട് മാനന്തവാടി മെഡിക്കൽ കോളേജിലും എത്തിച്ചെങ്കിലും നിഷേധാത്മകമായ സമീപനമാണ് നേരിടേണ്ടി വന്നത്. വിദഗ്ദ്ധ ചികിത്സയ്ക്കായി കോഴിക്കോട് മെഡിക്കൽ കോളേജിലേക്ക് കൊണ്ടുപോകാൻ ഡോക്ടർമാർ നിർദ്ദേശിച്ചെങ്കിലും, ആ സമയത്ത് രോഗിക്ക് അത്യാവശ്യമായി നൽകേണ്ടിയിരുന്ന പ്രാഥമിക പരിചരണമോ മുറിവുകൾ വെച്ചുകെട്ടാനുള്ള മനസ്സാക്ഷിയോ ആശുപത്രി ജീവനക്കാർ കാട്ടിയില്ല.

ആശുപത്രി അധികൃതരുടെ ഭാഗത്തുനിന്നുണ്ടായ ക്രൂരമായ അനാസ്ഥയുടെ ആഴം വ്യക്തമാക്കുന്നതാണ് പുറത്തുവരുന്ന വിവരങ്ങൾ. ആശുപത്രിയിൽ വെച്ച് വയോധികന് ചായ നൽകുന്നതിനിടെ ചുണ്ടിന്റെ വശങ്ങളിൽ നിന്നും ശരീരത്തിലെ മറ്റ് മുറിവുകളിൽ നിന്നും പുഴുക്കൾ താഴേക്ക് ചാടുന്ന ദയനീയ കാഴ്ചയാണ് കൂടെയുള്ളവർ കണ്ടത്. ഈ വിവരം ഡ്യൂട്ടിയിലുണ്ടായിരുന്ന നഴ്സുമാരെയും മറ്റ് ജീവനക്കാരെയും അറിയിച്ചെങ്കിലും അതീവ തൃപ്തികരമല്ലാത്തതും പരിഹാസഭരിതവുമായ മറുപടിയാണ് ലഭിച്ചതെന്ന് രോഗിയുടെ സഹായികൾ പരാതിപ്പെടുന്നു. തുടർന്ന് നാട്ടുകാരും രാഷ്ട്രീയ-സാമൂഹിക സംഘടനാ പ്രവർത്തകരും ആശുപത്രിയിൽ ഒത്തുകൂടി ശക്തമായി പ്രതിഷേധിക്കുകയും ദൃശ്യങ്ങൾ മൊബൈലിൽ പകർത്താൻ ആരംഭിക്കുകയും ചെയ്തതോടെയാണ് മുറിവുകൾ വൃത്തിയാക്കാനും പ്രാഥമിക ചികിത്സ നൽകാനും ആശുപത്രി അധികൃതർ ഒടുവിൽ തയ്യാറായത്.

സംഭവം വൻ വിവാദമായതോടെ രാഷ്ട്രീയ പ്രവർത്തകരും ഗോത്രവർഗ്ഗ സംഘടനകളും വിഷയത്തിൽ സജീവമായി ഇടപെട്ടിട്ടുണ്ട്. വയനാട്ടിലെ ആദിവാസി ജനവിഭാഗങ്ങളുടെ ആരോഗ്യ സുരക്ഷ ഉറപ്പാക്കുന്നതിൽ മെഡിക്കൽ കോളേജ് ഉൾപ്പെടെയുള്ള സംവിധാനങ്ങൾ പൂർണ്ണ പരാജയമാണെന്ന് നാട്ടുകാർ ആരോപിക്കുന്നു. ബോളന് അടിയന്തരമായി ഏറ്റവും മികച്ച വിദഗ്ദ്ധ ചികിത്സയും ശാസ്ത്രീയ പരിചരണവും സൗജന്യമായി ഉറപ്പാക്കണമെന്ന ആവശ്യം ശക്തമാണ്. മനുഷ്യത്വരഹിതമായ ഈ കൃത്യവിലോപത്തിന് കാരണക്കാരായ ജീവനക്കാർക്കെതിരെ കർശനമായ നിയമനടപടികൾ സ്വീകരിക്കണമെന്നും, ഇത്തരം ക്രൂരതകൾ ഇനി ആവർത്തിക്കാതിരിക്കാൻ ആരോഗ്യ വകുപ്പ് അടിയന്തര അന്വേഷണം പ്രഖ്യാപിക്കണമെന്നുമാണ് പൊതുസമൂഹത്തിന്റെ ആവശ്യം.