പിഎം ശ്രീ’ പദ്ധതിയിൽ നിന്ന് കേരളത്തിന് പിന്മാറാൻ യാതൊരുവിധ നിയമ തടസ്സങ്ങളുമില്ല; വി. ശിവൻകുട്ടി

കേന്ദ്ര സർക്കാരിന്റെ ‘പിഎം ശ്രീ’ പദ്ധതിയിൽ നിന്ന് കേരളത്തിന് പിന്മാറാൻ യാതൊരുവിധ നിയമ തടസ്സങ്ങളുമില്ലെന്ന് മുൻ മന്ത്രിയും സിപിഐഎം നേതാവുമായ വി. ശിവൻകുട്ടി. മുൻകാല കോടതി വിധികൾ പരിശോധിച്ചാൽ ഈ കാര്യം ആർക്കും വ്യക്തമായി മനസ്സിലാകുമെന്നും അദ്ദേഹം മാധ്യമങ്ങളോട് പറഞ്ഞു. 

എൽഡിഎഫ് ഭരണകാലത്ത് പദ്ധതിയുടെ ധാരണാപത്രത്തിൽ ആദ്യം ഒപ്പിട്ടിരുന്നുവെങ്കിലും പിന്നീട് സംസ്ഥാനത്തിന്റെ താല്പര്യങ്ങൾ സംരക്ഷിക്കുന്നതിനായി അതിൽ നിന്ന് പൂർണ്ണമായി പിന്മാറുകയാണ് ചെയ്തത്. അന്ന് ഇടതുപക്ഷ തീരുമാനത്തിനെതിരെ സമരം ചെയ്തവരാണ് ഇന്ന് യാതൊരു മടിയുമില്ലാതെ ഈ പദ്ധതിയുമായി മുന്നോട്ട് പോകുന്നതെന്നും, പിഎം ശ്രീയിൽ നിന്ന് കേരളം ഇതുവരെ ഒരു രൂപ പോലും കൈപ്പറ്റിയിട്ടില്ലെന്നും അദ്ദേഹം ഓർമ്മിപ്പിച്ചു.

പദ്ധതിയുമായി മുന്നോട്ട് പോകുന്ന പുതിയ യുഡിഎഫ് സർക്കാരിനോട് നിർണ്ണായകമായ ചില ചോദ്യങ്ങളും വി. ശിവൻകുട്ടി ഉന്നയിച്ചു. വിദ്യാഭ്യാസ മേഖലയെ പൂർണ്ണമായി സ്വകാര്യവത്കരിക്കാൻ ലക്ഷ്യമിട്ടുള്ള കേന്ദ്രത്തിന്റെ ദേശീയ വിദ്യാഭ്യാസ നയം കേരളത്തിലും നടപ്പിലാക്കാൻ യുഡിഎഫ് സർക്കാർ തയ്യാറെടുക്കുകയാണോ എന്ന് അദ്ദേഹം ചോദിച്ചു. കോൺഗ്രസ് ഭരിക്കുന്ന മറ്റ് ചില സംസ്ഥാനങ്ങൾ ഇതിനകം തന്നെ ഈ നയം നടപ്പിലാക്കിയിട്ടുണ്ട്. 

എന്നാൽ, കേരളത്തിന്റെ പൊതുവിദ്യാഭ്യാസ രംഗത്തെ തകർക്കുന്ന ഈ നയം സംസ്ഥാനത്ത് ഒരുകാരണവശാലും നടപ്പിലാക്കില്ലെന്ന കൃത്യമായ നിലപാടായിരുന്നു എൽഡിഎഫ് സർക്കാരിനുണ്ടായിരുന്നത്. ഈ വിഷയത്തിൽ നിലവിലെ യുഡിഎഫ് സർക്കാരിന്റെയും മുഖ്യമന്ത്രിയുടെയും യഥാർത്ഥ നിലപാട് എന്താണെന്ന് ജനങ്ങളോട് വ്യക്തമാക്കണമെന്നും വി. ശിവൻകുട്ടി ആവശ്യപ്പെട്ടു.